រដ្ឋាភិបាល​កម្ពុជា​សោក​ស្តាយ ចំពោះ​ការ​ប៉ះ​ទង្គិច​រវាង​ពលរដ្ឋ​កម្ពុជា-វៀតណាម

ព្រឹត្តិការណ៍នៃអំពើហិង្សា ដែលបានផ្ទុះឡើង រវាងយុវជនកម្ពុជា និងប្រជាពលរដ្ឋវៀតណាម នៅតាម​តំបន់​ព្រំដែន​នេះ ត្រូវ​បាន​អ្នក​នាំ​ពាក្យ​ទីស្តីការ​គណរដ្ឋមន្រ្តី ថ្លែងបង្ហាញការសោកស្តាយ ចំពោះការប្រើប្រាស់​កម្លាំង​បាយ មិន​អនុវត្តន៍​នូវ​ច្បាប់​ជាតិ និង​អន្តរជាតិ ដើម្បី​ឈាន​ទៅ​រក​ការ​បញ្ចប់​ជម្លោះ ខាងព្រំដែននេះ។
Loading...
  • ដោយ: អ៊ុម វ៉ារី អត្ថបទ និងយកការណ៍៖ អ៊ុម វ៉ារី ([email protected]) -ភ្នំពេញថ្ងៃទី២៩ មិថុនា ២០១៥
  • កែប្រែចុងក្រោយ: June 29, 2015
  • ប្រធានបទ: ព្រំដែន
  • អត្ថបទ: មានបញ្ហា?
  • មតិ-យោបល់

បន្ទាប់ពីហេតុការណ៍ប៉ះទង្គិច បានកើតឡើង កាលពីថ្ងៃអាទិត្យថ្ងៃទី២៨ ខែមិថុនា រហូតមកដល់ពេលនេះ រដ្ឋាភិបាលកម្ពុជា នៅមិនទាន់ចេញសេចក្តីថ្លែងការណ៍ ឬសេចក្ដីប្រតិកម្មអ្វីនៅឡើយ ដោយរង់ចាំការអង្កេត ពីហេតុការណ៍នេះជាមុនសិន។ ប៉ុន្តែយ៉ាងហោចណាស់ រដ្ឋាភិបាលកម្ពុជា បានសម្ដែងការសោកស្ដាយ ដោយ​សារហេតុការណ៍ នៃអំពើហិង្សានេះ បានកើតឡើង ដោយមិនបានយកច្បាប់ជាតិ និងអន្តរជាតិ មក​ដោះ​ស្រាយ តែបែរជាមាន ការប្រើនូវកម្លាំងបាយ បង្ករបួសស្នាមដូច្នេះ។

អ្នកនាំពាក្យទីស្តីការគណរដ្ឋមន្រ្តី លោក ផៃ ស៊ីផាន ក្នុងកិច្ចសម្ភាសជាមួយ ទស្សនាវដ្តីមនោរម្យ.អាំងហ្វូ នា​ព្រឹកថ្ងៃទី២៩ ខែមិថុនានេះ បានអះអាងថា រដ្ឋាភិបាលកម្ពុជានឹងបន្តធ្វើការសិក្សាស្រាវជ្រាវ ដើម្បីស្វែងរក​ដើម​ហេតុចំបង ដែលនាំឲ្យមានការប៉ះទង្គិចគ្នា រវាងប្រជាពលរដ្ឋនៃប្រទេសទាំងពីរ។ លោកបានឲ្យដឹងថា៖ «យើង​កំពុងតែតាមតានមើល ហើយស្វែងរកថា តើហេតុដូចម្តេចបានកើតរឿងហ្នឹង? ។ ចង់ដឹងថា ការ​ទាស់​ទែង​គ្នា​ហ្នឹង នៅត្រង់ចំណុចណា? តើអ្នកណា ដែលជាអ្នកទៅបង្កើតភាពប្រទុស្សរាយនេះ?»

ការថ្លែងអះអាងខាងលើ របស់មន្ត្រីអ្នកនាំពាក្យ បានធ្វើឡើងមួយថ្ងៃ ក្រោយការផ្ទុះអំពើហិង្សា វាយដុំគ្នា កាល​ពីថ្ងៃទី២៨ ខេមិថុនា ឆ្នាំ២០១៥ម្សិលម៉ិញ នៅតាមព្រំដែនកម្ពុជា វៀតណាមខេត្តស្វាយរៀង រវាងប្រជាពលរដ្ឋ​វៀតណាម និងក្រុមយុវជនកម្ពុជា ដែលបានចុះអង្កេតព្រំដែន ដឹកនាំដោយតំណាងរាស្រ្ត មកពីគណបក្ស​សង្គ្រោះជាតិ។ ហេតុការណ៍ប៉ះទង្គិចគ្នានេះ បានកើតឡើងត្រង់ចំណុច ភូមិឆ្លក ឃុំត្នោត ស្រុកកំពង់រោទិ៍ ខេត្ត ស្វាយរៀង (បង្គោលព្រំដែនលេខ២០៣)។ ក្រុមពលរដ្ឋកម្ពុជា ប្រមាណជាង១០០នាក់ ត្រូវបានពលរដ្ឋ និង​កម្លាំងសមត្ថកិច្ចវៀតណាមរារាំង ស្ទាក់ផ្លូវ មិនអោយចូលទៅពិនិត្យមើលព្រំដែន ដែលមានការសង្ស័យថា វៀតណាមបានរំកិល រំលោភចូលក្នុងដីកម្ពុជា។

យ៉ាងណាក៏ដោយ លោក ផៃ ស៊ីផាន បានសង្កត់ធ្ងន់ថា បញ្ហាព្រំដែន ជាបញ្ហារបស់រដ្ឋាភិបាល នៃប្រទេស​ទាំង​ពីរ ដែលត្រូវធ្វើការដោះស្រាយជាមួយគ្នា មិនមែនជាសមត្ថកិច្ច របស់ពលរដ្ឋឡើយ។ មន្ត្រីអ្នកនាំពាក្យ​បាន​បន្ថែមថា៖ «តាមខ្សែបន្ទាត់ព្រំដែន ទោះតំបន់នោះដោះស្រាយ ឬមិនទាន់ដោះស្រាយ ហើយស្ថិតក្នុងការងារ របស់រាជរដ្ឋាភិបាលទាំងសងខាង មិនមែនស្ថិតក្នុងចលនាអ្នកណាមួយ ដើម្បីដោះស្រាយនោះទេ នេះគួឲ្យ​សោកស្តាយ។ (…) យើងនឹងនៅបន្តតាមផ្លូវច្បាប់ជាតិ និងអន្តរជាតិ ដើម្បីកុំឲ្យអំពើនេះ កើតឡើង​ជាថ្មីម្តង​ទៀត។»

លោក អ៊ំ សំអាន និងលោក រៀល ខេមរិន្ទ្រ តំណាងរាស្រ្ត មកពីគណបក្សសង្គ្រោះជាតិ ត្រូវបានគេ​រាយ​ការណ៍​ថា បានរងរបួស នៅក្នុងព្រឹត្តិការណ៍នោះ។ ប៉ុន្តែទស្សនាវដ្តីមនោរម្យ.អាំងហ្វូ មិនអាចសុំការបញ្ជាក់បន្ថែម ពី​បញ្ហានេះ និងពីមូលហេតុ ដែលឈានដល់ទំនាស់នេះឡើយ ដោយគ្មានអ្នកទទួលទូរស័ព្ទ៕

សូមទស្សនាវីដេអូឃ្លីប ដែលបានបង្ហោះទំព័រហ្វេសប៊ុក របស់លោក អ៊ំ សំអាន ដូចខាងក្រោម៖

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...