ទីបំផុតក្រុមបីសាចក្រហម ម៉ែនឆេស្ទើ យូណៃធីត (Manchester United) ឬហៅថា «ម៉ែនញូ» បានយល់ព្រមតែងតាំង​លោក ដេវីដ ម៉យ (David Moyes) ក្នុងដំណែងជាគ្រូបង្វឹកថ្មីរបស់ពួកគេហើយ ក្នុងកិច្ចសន្យារយះពេល៦ឆ្នាំ។

លោកអាឡិច ហ្វឺកឺសិន (ខាងឆ្វេង) ចាប់ដៃលោកដេវិដ ម៉យ។

បុរសវ័យ៥០រូបនេះ នឹងមកកាន់ទឹកដី អូលត្រាហ្វដ (Old Trafford) នៅថ្ងៃទី០១ ខែកក្កដា បន្ទាប់ពីចំណាយពេល​ពេញ​មួយរដូវកាល ជាមួយក្រុមអេវើតុន (Everton)។

ម៉យ នឹងមកជំនួសដំណែងលោក សឺអាឡិច ហ្វឺកឺសិន (Sir Alex Ferguson) ដែលនឹងត្រូវចូលនិវត្តន៏ក្រោយ​ចប់រដូវកាល​នេះ ហើយការប្រកួតសំខាន់លើកដំបូងរបស់គាត់ នឹងត្រូវប្រកួតក្នុងពានរង្វាន់ ខមម៉ូញ៉ូនីធី ស្ស៊ៀល (Community Shield) ដែលត្រូវជួបក្រុម ម៉ែនឆេស្ទើ ស៊ីធី (Manchester City) ឬក្រុមវីកែន (Wigan) ក្នុងកីឡាដ្ឋានវ៊ែមប្លី (Wembley) នាថ្ងៃទី១១ ខែសីហា។

លោក ម៉យ ដែលបានចំណាយពេល១១ឆ្នាំ ជាមួយនឹងក្រុមអេវើតុន បាននិយាយថា «វាជាកិត្តិយសមួយដ៏អស្ចារ្យ សម្រាប់​ខ្ញុំ ដែលបានក្លាយជាគ្រូបង្វឹកក្រុមម៉ែនឆេស្ទើ យូណៃធីត។ ខ្ញុំដឹងថា លោកសឺអាឡិច ជាអ្នកណែនាំឲ្យខ្ញុំនូវការងារ​មួយ​នេះ។ ខ្ញុំសូមគោរពដឹងគុណ និងអរគុណ សម្រាប់អ្វីៗគ្រប់យ៉ាងដែលគាត់បានធ្វើ និងផ្តល់ឲ្យក្លឹបមួយនេះ។»

អនាគតគ្រូបង្វឹកក្រុមបីសាចក្រហមរូបនេះ បានបន្តថា «ខ្ញុំដឹងថា វាពិតជាពិបាក ក្នុងការធ្វើឲ្យដូចគ្រូបង្វឹកដែលល្អ​បំផុត (ហ្វឺកឺសិន) ប៉ុន្តែឱកាសមកដឹកនាំក្រុមម៉ែនញូ ជារឿងដែលមិនងាយកើតឡើងញឹកញាប់នោះទេ ហើយខ្ញុំសង្ឃឹមថា ខ្ញុំ​នឹង​ធ្វើបានល្អនៅរដូវកាលក្រោយ។»

បុរសសញ្ជាតិស្កុតឡែន បានបន្តថា «ខ្ញុំមានកិច្ចការដ៏ល្អមួយ ជាមួយក្រុមអេវើតុន និងមានទំនាក់ទំនងដ៏ល្អជាមួយ​ម្ចាស់​ក្លឹប អ្នកដឹកនាំគ្រប់ជាន់ថ្នាក់ និងកីឡាករទាំងអស់។ ចាប់ពីពេលនេះ រហូតដល់ចប់រដូវកាល ខ្ញុំនឹងខិតខំធ្វើអ្វីៗគ្រប់យ៉ាង ដើម្បីឲ្យក្រុមមួយនេះស្ថិតនៅចំណាត់ថ្នាក់មួយ ល្អបំផុត។»

គាត់បានបន្ថែមថា «អ្នកគាំទ្ររបស់ក្រុមអេវើតុន ជាផ្នែកមួយដ៏ធំ ក្នុងរយះកាលដែលខ្ញុំនៅក្នុងទឹកដី ហ្គូឌីសិនផាក (Goodison Park) ដែលបានធ្វើឲ្យខ្ញុំរីករាយ ខ្ញុំនឹងចងចាំនូវទឹកចិត្តរបស់ពួកគេទាំងអស់ ដែលបានគាំទ្រដល់ខ្ញុំ និងក្រុម​កីឡាករកន្លងមក។ អេវើតុន នឹងស្ថិតនៅក្នុងបេះដូងរបស់ខ្ញុំអស់មួយជីវិត។»

លោក ហ្វឺកឺសិន ដែលបានធ្វើជាគ្រូបង្វឹកក្រុមបីសាចក្រហម អស់រយះពេលជិត២៧ឆ្នាំនោះ បាននិយាយថា «នៅពេល​ដែលយើងពិភាក្សា ពីបេក្ខជនដែលត្រូវមកដឹកនាំបន្តនោះ យើងដឹងថា ដេវីដ ម៉យ ជាបុគ្គលដ៏សាកសម្យ ជាមួយនឹង​ការងារដ៏ធំធេងនេះ»។

លោកបានបន្តថា «ខ្ញុំពេញចិត្តការងាររបស់គាត់យូរហើយ ហើយខ្ញុំក៏ធ្លាប់ចង់បានរូបគាត់ មកធ្វើជាជំនួយការ​នៅទីនេះ​ម្តងដែរ កាលពីឆ្នាំ១៩៩៨។ គាត់ជាបុរសវ័យក្មេងមួយរូប ដែលបានចាប់ផ្តើមអាជីព ជាគ្រូបង្វឹក ហើយបន្ទាប់មក​ក៏ធ្វើបាន​យ៉ាងល្អ ជាមួយក្រុមអេវើតុន។ វាពិតជាគ្មានមន្ទិលសង្ស័យអ្វីទេសម្រាប់ខ្ញុំ ព្រោះគាត់មានសមត្ថភាពគ្រប់យ៉ាងទាំងអស់ ដែលក្លឹបយើងត្រូវការ៕»

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១០ ខែឧសភា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ