អ្នករៀបចំក្រឡារាំ សញ្ជាតិអូស្ត្រាលី លោក វ៉ាឌី រ៉ូបស៊ុន (Wade Robson) បានប្ដឹងឡើងទៅតុលាការចោទប្រកាន់ អតីត​ស្ដេចចម្រៀងប៉ុប ដែលបានស្លាប់តាំងពីឆ្នាំ២០០៩ ពីបទ«បំពានផ្លូវភេទលើកុមារ»។ ពាក្យបណ្ដឹងនេះ បង្កអោយមាន​ការ​ក្ដៅក្រហាយយ៉ាងខ្លាំង ពីសំណាក់អ្នកស្នងមរតករបស់ ម៉ៃឃើល ចាក់ស៊ុន (Michael Jackson) នៅចុងសប្ដាហ៍នេះ។

ស្ដេចចម្រៀងប៉ុប ម៉ៃឃើល ចាក់ស៊ុន កាលពេលលោកនៅរស់។

នៅក្នុងពាក្យបណ្ដឹងដែលដាក់ប្ដឹងដោយមេធាវីរបស់វ៉ាឌី រ៉ូបស៊ុន ទៅកាន់តុលាការនៃទីក្រុងឡូស អេនជឺឡេស តាំងពី​ថ្ងៃ​ទី០១ខែឧសភាមកនោះ លោកវ៉ាឌី រ៉ូបស៊ុន បានស្នើសុំទៅចៅក្រម នូវសំណងខូចខាតជាច្រើន ដែលត្រូវកាត់ចេញ​ពី​មរតករបស់អតីតស្ដេចចម្រៀងប៉ុប។ នៅក្នុងសំនុំរឿងក្ដីលើកមុនតាំងពីឆ្នាំ២០០៥កន្លងមក លោកវ៉ាឌី រ៉ូបស៊ុន ធ្លាប់បាន​ប្រកាសថា តារាចម្រៀងដ៏ល្បីមិនបានប៉ះពាល់រូបរាងកាយលោកទេ ខណៈពេលនោះ លោកស្ថិតនៅក្នុងវ័យជំទង់​នៅ​ឡើយ។

សម្រាប់មេធាវីខាងការពារក្ដី វាជាការចោទប្រកាន់«ធ្វើឲ្យរបួស និងគួរឲ្យអាណិត» !

មេធាវីរបស់វ៉ាឌី រ៉ូបស៊ុន បានថ្លែងទៅកាន់អ្នកសារព័ត៌មានថា «ម៉ៃឃើល ចាក់ស៊ុន ជាបីសាចមួយ ហើយនៅក្នុងបេះដូង​របស់គាត់ នរណាៗក៏បានដឹងដែរ»។ នៅក្នុងសេចក្ដីប្រកាសព័ត៌មានមួយទៀត មានបញ្ជាក់ថា វ៉ាឌី រ៉ូបស៊ុន បានរងនូវ​គំនាបខាងផ្លូវចិត្ត កាលពីឆ្នាំកន្លងទៅ។ លោកមេធាវីបានបន្តយ៉ាងដូច្នេះថា «វ៉ាឌីបានបាក់ស្ប៉ាត ដោយសារភាពតឹង​តែង​ក្នុងក្បាល និងទារុណកម្មផ្លូវភេទ ដែលវ៉ាឌី បានទទួលក្នុងរយៈពេល៧ឆ្នាំ ខណៈពេលដែលវ៉ាឌី នៅក្មេងនៅឡើយ។ វ៉ាឌី បានរងនូវការលាងខួរក្បាល ពីសំណាក់ជនកំណាចឃោឃៅខាងផ្លូវភេទ រហូតដល់បញ្ហាទាំងនេះធ្លាក់សង្កត់លើវ៉ាឌី មែន​ទែនងើបលែងរួច។»

ជាការឆ្លើយតបវិញ មេធាវីម្នាក់នៃអ្នកស្នងមរតករបស់អតីតអ្នកចម្រៀងម៉ៃឃើល ចាក់ស៊ុន បាននិយាយថា «រឿងតាក់​តែងឡើងដោយលោក រ៉ូបស៊ុន វាបានធ្វើឲ្យរបួស និងជារឿងគួរឲ្យអាណិត។ នេះហើយជាយុវជនម្នាក់ ដែលបានចូល​ខ្លួន​ទៅធ្វើជាសាក្សីពីរដង ជាមួយនឹងពាក្យសម្បថតាំងពី២០ឆ្នាំកន្លងមក។ យុវជននេះ ថែមទាំងបានផ្ដល់កិច្ចសម្ភាស ទៅឲ្យ​ប្រព័ន្ធផ្សព្វផ្សាយជាច្រើន ថាម៉ៃឃើល ចាក់ស៊ុន មិនដែលធ្វើអ្វីដែលមិនត្រឹមត្រូវនោះទេ។ តែនៅថ្ងៃនេះ ៤ឆ្នាំក្រោយ​មរណភាពរបស់ម៉ៃឃើល សាច់រឿងដ៏គួរអោយស្រក់ទឹកភ្នែក និងមិនសូវពិតនេះ  ត្រូវបានតាក់តែងឡើង។ យើងប្រាកដ​ណាស់ ថាតុលាការនឹងដឹងថាវាជាអ្វី។»

គួររំលឹកថា ម៉ៃឃើល ចាក់ស៊ុន ធ្លាប់ត្រូវបានគេប្ដឹងជាច្រើនឆ្នាំ ពីបទរំលោភបំពានខាងផ្លូវភេទ ទៅលើកុមារមិនទាន់គ្រប់​អាយុរ ប៉ុន្តែសំនុំរឿងបានបិទទៅវិញ ដោយមានការព្រមព្រៀងជាមួយដើមបណ្ដឺងនៅឆ្នាំ២០០៥។ ប៉ុន្តែស្ដេចចម្រៀងប៉ុប បានស្លាប់ទៅដោយនាំទាំងហេតុការណ៍ទាំងអស់ទៅជាមួយ កាលពីថ្ងៃទី២៥មិថុនាឆ្នាំ២០០៩ ក្នុងមូលហេតុប្រើប្រាស់​​ថ្នាំ​លើសកំណត់ ក្នុងអាយុ៥០ឆ្នាំ៕

-------------------------------------------------
ដោយ ឈូករ័ត្ន - ប៉ារីស​ ថ្ងៃទី១០ ខែឧសភា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ