គ្រូបង្វឹកក្រុមម៉ែនឆេស្ទើ យូណៃធីត (Manchester United) លោកដេវីដ ម៉យ (David Moyes) បានធ្វើការសុំទោសដល់ក្លិប និងអ្នកគាំទ្រទាំងអស់ ខណៈដែលការប្រកួតមិត្តភាពកន្លងមក ក្រុមម្ចាស់ជើងឯកអង់គ្លេសមួយនេះ មានភាពអន់ខ្សោយ​មែនទែន។ ប៉ុន្តែលោកម៉យ បានលើកឡើងថា កត្តាទាំងនោះដោយសារតែប៉ះក្រុមខ្លាំងៗរបស់ជប៉ុន។

លោកដេវីដ ម៉យ គ្រូបង្វឹងរបសើក្រុមបីសាចក្រហម ម៉ែនឆេស្ទើ យូណៃធីត

នៅពេលដែលសួរថា តើគាត់មានការបារម្មណ៏ដែរទេ ចំពោះលទ្ធផលចាញ់ និងស្មើ នៅតំបន់អាស៊ី គ្រូបង្វឹកវ័យ៥០ឆ្នាំ បាន​និយាយថា គាត់គ្មានការបារម្មណ៏ទេ តែផ្ទុយទៅវិញ គាត់មានការសប្បាយចិត្ត។

គាត់បាននិយាយថា៖ «វាគ្រាន់តែជាការប្រកួតមិត្តភាព ត្រៀមបើករដូវកាល ហើយយើងទើបតែចាប់ផ្តើម​ស្វែងយល់​ពី​ក្រុម។ យើងបានលេងជាមួយក្រុមខ្លាំងរបស់ជប៉ុនចំនួន២ក្រុម។ យើងនឹងធ្វើឲ្យល្អជាងនេះ។ ខ្ញុំបាន​មើលឃើញពីចំណុច​ល្អមួយចំនួន​ហើយ ហើយខ្ញុំគិតថា វានឹងរីកចំរើន។»

បុរសសញ្ជាតិស្កុតឡែនរូបនេះ បានបន្តថា៖ «យើងនឹងត្រៀមខ្លួនរួលរាល់ មុនពេលរដូវកាលថ្មីចាប់ផ្តើម ហើយក៏គ្មានបញ្ហា​ទៀតដែរ។ ខ្ញុំពេញចិត្តដំណើរទេសចរណ៏មិត្តភាពនេះ ហើយនេះជាដំណើរដ៏ល្អរបស់ក្លិបម៉ែនញូ។ ចំនួនអ្នកគាំទ្រ មួយ​ភាគធំនៅជុំវិញពិភពលោក អាចនឹងចំណាយពេលបន្តិតទៀត ដើម្បីជឿជាក់លើខ្ញុំ។»

ក្នុងរជ្ជកាលថ្មី ដែលដឹកនាំដោយលោក ដេវីដ ម៉យ ម៉ែនញូ បានចាញ់សឹង្ហាអលស្តា (Singha All Stars) ១-០ នៅក្នុង​ទីក្រុង​បាងកក។ ប៉ុន្តែក្រុមរបស់គាត់អាចស្តារដើមបានវិញ នៅពេលប៉ះក្រុម អេលីក អលស្តា (A-League All Stars)។

ក្រុមបីសាចក្រហម បានលត់ក្រុមអូស្ត្រាលី ៥-១ នៅក្នុងទីក្រុងស៊ីដនី មុនពេលដែលធ្វើដំណើរទៅកាន់ប្រទេសជប៉ុន ប៉ះ​ក្រុម យ៉ូកូហាម៉ា អេហ្វម៉ារីណូស (Yokohama F-Marinos) ប៉ុន្តែពេលនោះ ពួកគេធ្វើមិនបានល្អទេ ខណៈដែលម៉ែនញូ​ចាញ់ ៣-២។ ហើយបន្ទាប់មកទៀតស្មើ ២-២ ជាមួយក្រុម សេរ៉េស្ស៊ូ អូសាកា (Cerezo Osaka)។

ប្រកួតបន្ទាប់របស់ម៉ែនញូ នឹងត្រូវប៉ះក្រុម ឃីតឈី អេហ្វស៊ី (Kitchee FC) របស់ហុងកុង នៅថ្ងៃច័ន្ទ ទី២៩ ខែកក្កដានេះ។ ការប្រកួតនឹងមានផ្សាយបន្តផ្ទាល់ តាមរយះកញ្ចក់ទូរទស្សន៏ខ្សែកាបរាជធានីភ្នំពេញ ភីភីស៊ីធីវី ស្ពត (Ppctv Sport) ផងដែរ នៅវេលាម៉ោង ០៧៖០០នាទីយប់ (ភ្នំពេញ)៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២៩ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ