ក្រុមបាល់ទាត់ម្ចាស់ជើងឯកថ្មីរបស់បារាំង ប៉ារីស ហ្សិនជឺម៉ិន (PSG) បានប្រកាសជាផ្លូវការថា ពួកគេពិតជាចង់ទិញយក​តារាឆ្នើមរបស់ក្រុមម៉ែនឆេស្ទើ យូណៃធីត (Manchester United) វ៉ែន រ៉ូនី (Wayne Rooney) ពិតមែន នេះបើតាមកាសែត​បារាំងឡេគីប (L’Equipe) បានរាយការណ៏ កាលពីថ្ងៃទី២២ ម្សិលមិញ។

កីឡាករ វ៉ែន រ៉ូនី នៃក្រុមបាល់ទាត់ម៉ែនឆេស្ទើ យូណៃធីត។

អនាគតរបស់កីឡាករវ័យ២៧ឆ្នាំ បានក្លាយជាភាពស្រពិចស្រពិលមួយ បន្ទាប់ពីលោកសឺអាឡិច ហ្វឺកឺសិន (Sir Alex Ferguson) បានប្រកាសថា ខ្សែប្រយុទ្ធអន្តរជាតិអង់គ្លេសរូបនេះ បានទទួលសំណើរ ដែលត្រូវផ្ទេរចេញពីក្លឹបហើយ។

រ៉ូនី ក៏បានចេញមកបដិសេដដែរ ដោយបានបញ្ជាក់ថា គាត់មានគម្រោងនៅជាមួយក្លឹបជាបន្តទៀត បន្ទាប់ពីខ្លួនគាត់​ក៏ជា​ផ្នែកមួយ ដែលបានជួយឲ្យម៉ែនញូ លើកពាននៅរដូវកាលនេះ។ ប៉ុន្តែគាត់មិនរីករាយនោះទេ ខណៈដែលរូបគាត់ស្ថិតក្នុង​នាមជាកីឡាករបម្រុង។

អតីតខ្សែប្រយុទ្ធក្រុមអេវើតុន (Everton) រូបនេះ ត្រូវបានស្ថិតក្នុងដំណែងជាកីឡាករបម្រុងក្នុងការប្រកួតសំខាន់ៗ ឬត្រូវ​បានលោកហ្វឺកឺសិន ដាក់ឲ្យលេងខុសដំណែង ឬឲ្យលេងជាខ្សែបម្រើទៅវិញ ដែលធ្វើឲ្យគាត់មានការអាកអន់ចិត្ត​យ៉ាងខ្លាំង។

គ្រូបង្វឹកម៉ែនញូថ្មី លោកដេវីដ ម៉យ (David Moyes) ចង់ឲ្យរ៉ូនី នៅបន្តទៀតជាមួយក្រុម ហើយគាត់ក៏មានគម្រោងសម្រាប់​កីឡាកររូបនេះដែរ នៅរដូវកាលថ្មី។ ប៉ុន្តែពេលនេះ គាត់ត្រូវប្រជែងជាមួយក្លឹបធំៗជាច្រើន ដែលកំពុងតែចង់បានខ្សែ​ប្រយុទ្ធរបស់លោក។

ក្រុមបាសេឡូណា (Barcelona), ឆែលស៊ី (Chelsea) និងក្រុមបាយឺន ម៉ូនិជ (Bayern Munich) សុទ្ធតែកំពុងចាប់អារម្មណ៏​កីឡាកររូបនេះ។ ប៉ុន្តែក្រុមប៉ារីស ហ្សិនជឺម៉ិន ទំនងជាចាប់អារម្មណ៏ខ្លាំងជាងគេ ខណៈដែលពួកគេនឹងត្រៀមទឹកប្រាក់ដ៏ធំ ដើម្បីនាំយកខ្សែប្រយុទ្ធអង់គ្លេសឲ្យបាន។

កាសែតអង់គ្លេសមឺរឺ (Mirror) ក៏បានរាយការណ៏ដែរ កាលពីម្សិលមិញ ដែលពួកគេបានចេញផ្សាយថា ក្រុមចំណាយទឹក​ប្រាក់ច្រើន ប៉ារីស ហ្សិនជឺម៉ិន បានត្រៀមទឹកប្រាក់ជាង ១៥០លានដុល្លា (ជាតម្លៃខ្ពស់ជាងគេបង្អស់​នៅក្នុងប្រវត្តិសាស្រ្ត​បាល់ទាត់) ដើម្បីទិញយកខ្សែប្រយុទ្ធ វ៉ែន រ៉ូនី ទៅចូលរួមក្រុមជាមួយពួកគេឲ្យបាននៅរដូវក្តៅនេះ។

ក្រុមយក្សរបស់បារាំង ចង់បានរ៉ូនី ដើម្បីធ្វើជាដៃគូរជាមួយកីឡាករស្លាតាន់ អ៊ីប្រាហ៊ីមម៉ូវីក (Zlatan Ibrahimovic) នៅរដូវ​កាលថ្មី ដែលពួកគេរំពឹងថា នឹងអាចការពារដំណែងជើងឯករបស់ខ្លួនបាន បើសិនជារ៉ូនី អាចមកចូលរួមជាមួយក្រុម ដែល​មានមូលដ្ឋាននៅក្នុងទីក្រុងប៉ារីសពិតមែន៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២៣ ខែឧសភា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ