ភ្នំពេញ៖ ការចាប់លំដាប់លេខរៀងនៃគណបក្សនេះ បាននិមន្តជាព្រះរាជអធិបតីភាពសម្តេចព្រះសង្ឃរាជទាំងពីរគណៈ។ សម្តេចព្រះសង្ឃរាជនៃគណៈមហានិកាយ អគ្គមហាសង្ឃរាជាធិបតី ទេព វង្ស និងសម្តេចព្រះមហាសង្ឃរាជ​នៃគណៈធម្ម-​យុត្តិកនិកាយ សម្តេចព្រះអភិសិរីសុគន្ធាមហាសង្ឃរាជរាជាធិបតី បួ គ្រី ។

លោក ទេព នីថា នៅពេលចំណាត់លេខរៀងរបស់គណបក្សបានធ្វើរួច។

នាព្រឹកថ្ងៃទី២៣ ខែឧសភា ព្រឹកម៉ិញនេះ នៅទីស្តីការគណកម្មាធិការជាតិរៀបចំការបោះឆ្នោត (គ.ជ.ប) បានរៀបចំពីធី​ចាប់ឆ្នោតកំណត់លំដាប់លេខរៀងគណបក្សនយោបាយដាក់លើសន្លឹកឆ្នោត។ សម្រាប់ការបោះឆ្នោតជ្រើសតាំង​តំណាង​រាស្រ្តនីតិកាលទី៥ ឆ្នាំ២០១៣ មានចំនួនគណបក្សចំនួនប្រាំបីចូលរួម ក្នុងចំណោមគណបក្សចំនួន៤២ ដែលបានចុះឈ្មោះ​នៅក្រសួងមហាផ្ទៃ។

ក្នុងរយៈពេល១៥ថ្ងៃនៃការចុះបញ្ចីឈ្មោះគណបក្សនយោបាយចាប់ពីថ្ងៃទី២៩ខែមេសា ដល់ថ្ងៃទី១៣ខែឧសភាឆ្នាំ​២០១៣ មានគណបក្សចំននួនប្រាំបីដែល គ.ជ.ប សម្រេចទទួលស្គាល់ជាផ្លូវការដើម្បីចូលរួមការបោះឆ្នោតនាថ្ងៃខាងមុខរួមមាន គណបក្សប្រជាជនកម្ពុជា គណបក្សសញ្ជាតិកម្ពុជា គណបក្សសម្ពន្ធ័ដើម្បីប្រជាធិបតេយ្យ គណបក្សហ្វុនស៊ិនប៉ិច គណបក្សសាធារណរដ្ឋប្រជាធិបតេយ្យ គណបក្សសង្គ្រោះជាតិ គណបក្សខ្មែរឈប់ក្រ គណបក្សខ្មែរអភិវឌ្ឍន៍សេដ្ឋកិច្ច។

និម្មិតសញ្ញា និងឈ្មោះនៃគណបក្សទាំងប្រាំបី ត្រូវបានលើកបង្ហាញម្តងមួយៗជាសាធារណៈ និងដាក់ចូលក្នុង​ស្រោម​សំបុត្រស រួចដាក់ចូលក្នុងហិបឆ្នោត។ លោក អ៊ឹម សួស្តី ជាអ្នកជ្រាវ(ច្របល់)សន្លឹកឆ្នោតទាំងនោះចំនួនប្រាំបីដង ទើប​ប្រគេនជូនសម្តេចសង្ឃរាជទាំងពីរគណៈ ចាប់ឆ្លាស់ព្រះអង្គរហូតគ្រប់ទាំងប្រាំបីគណបក្ស។

លទ្ធផលនៃការចាប់ឈ្មោះគណបក្សនោះ លេខរៀងទីមួយត្រូវបានទៅគណបក្សសញ្ជាតិកម្ពុជា លេខរៀងទីពីរបានទៅ​គណបក្សហ្វុនស៊ិនប៉ិច លេខរៀងទីបីបានទៅគណបក្សសាធារណរដ្ឋប្រជាធិបតេយ្យ លេខរៀងទីបួនបានទៅ​គណបក្ស​ប្រជាជនកម្ពុជា លេខរៀងទីប្រាំបានទៅគណបក្សខ្មែរអភិវឌ្ឍន៍សេដ្ឋកិច្ច លេខរៀងទីប្រាំមួយបានទៅ​គណបក្សខ្មែរឈប់​ក្រ លេខរៀងទីប្រាំពីរបានទៅគណបក្សសង្គ្រោះជាតិ លេខរៀងចុងក្រោយគណបក្សសម្ពន្ធ័ដើម្បីប្រជាធិបតេយ្យ។

បន្ទាប់ពីមានការចុះហត្ថលេខា ទទួលស្គាល់ដោយតំណាងគណបក្សនីមួយៗ លើបញ្ជីកំណត់«លេខរៀង​គណបក្សលើ​សន្លឹកឆ្នោត» បានចប់សព្វគ្រប់រួចមក សម្តេចព្រះសង្ឃរាជទាំងពីរគណៈសូមសំណូមពរដល់ប្រជាពលរដ្ឋខ្មែរមូល កុំឲ្យ​មានកម្មពពៀរ វេរានឹងគ្នា សូមឲ្យបានតែសុខ(...)។ ជ្រកក្រោមម្លប់ដ៏ត្រជាក់នៃព្រះធម៌ និងសូមរក្សាសាមគ្គីធម៌​ដែលនាំ​មកនូវសេចក្តីសុខ សន្តិភាពជារៀងរហូត ជូនដល់សង្គមជាតិ មាតុភូមិយើងទាំងមូល។

សូមរម្លឹកថា នៅថ្ងៃទី២៨ ឧសភា ខាងមុខនេះ ជាការបោះឆ្នោតជ្រើសតាំងតំណាងរាស្រ្តនីតិកាលទី៥ ជាការបោះឆ្នោត​លើកទី១៦ របស់កម្ពុជា ចាប់រាប់ពីការបោះឆ្នោតសភាលើកទីមួយនៅឆ្នាំ១៩៤៦មក។

ក្នុងរាជាណាចក្រកម្ពុជាទីពីរ ឆ្នាំ១៩៩៨ គ.ជ.ប បានរៀបចំឲ្យមានការរបោះឆ្នោតចំនួនដប់លើក។ ការបោះឆ្នោតសកល​ចំនួនប្រាំមួយលើក និងអសកលចំនួនបួន​លើក។ ការបោះឆ្នោតសកល រួមមានការបោះឆ្នោតជ្រើសតាំង​តំណាងរាស្រ្ត​ចំនួនបីលើក និងការបោះឆ្នោតឃុំ-សង្កាត់បីលើក ។ ឯការបោះឆ្នោតអសកលមាន ការជ្រើសតាំងសមាជិកព្រឹទ្ធសភា​ពីរ​លើក ជ្រើសរើសក្រមប្រឹក្សារាជធានី-ចេត្ត-ក្រុង-ស្រុក-ខណ្ឌចំនួនមួយលើក និងការបោះឆ្នោតឡើងវិញ នៅខណ្ឌ​ពោធិ៍សែនជ័យចំនួនមួយលើក។ នេះបើតាមកាលើកឡើងរបស់ លោក អ៊ឹម សួស្តី ប្រធានគណកម្មាធិការជាតិ​រៀបចំការ​បោះឆ្នោត ក្នុងពិធិ ចាប់ឆ្នោតកំណត់លំដាប់លេខរៀង គណបក្សនយោបាយដាក់លើសន្លឹកឆ្នោត៕

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី២៣ ឧសភា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ