ភេរវកម្មនៅក្រុងនីស ភាគខាងត្បូងបារាំង៖ ស្លាប់យ៉ាងហោច៨០នាក់
- ដោយ: សេក មនោរកុមារ អត្ថបទ និងយកការណ៍៖ សេក កុមារ ([email protected]) - បារីស ថ្ងៃទី១៤ កក្កដា ២០១៦
- កែប្រែចុងក្រោយ: July 15, 2016
- ប្រធានបទ: ភេរវកម្ម-នីស
- អត្ថបទ: មានបញ្ហា?
- មតិ-យោបល់
-
ហេតុការណ៍បានកើតឡើង នៅលើដងផ្លូវ «Promenade des Anglais» ដែលនៅជាប់សមុទ្រ នៃទីក្រុង នីស (Nice) ភាគខាងត្បូងបារាំង នាវេលាយប់ម៉ោង រវាងពី២២និង៣០នាទី ទៅម៉ោង២៣ ខណៈពេលដែលមានការបាញ់កាំជ្រួច សម្រាប់អបអរសាទរបុណ្យជាតិ ថ្ងៃ១៤កក្កដា។ សាលាក្រុង និងស្នងការនគរបាលប្រចាំតំបន់ «Alpes-Maritimes» បានបញ្ជាក់ថា ទង្វើនេះពិតជា«ភេរវកម្ម»។
តុល្យភាពនៅវេលានេះ ដែលទើបនឹងធ្លាក់មកដល់ បានឲ្យដឹងថា យ៉ាងតិចមនុស្ស៨០នាក់បានស្លាប់ និងជាង២០នាក់ទៀតរងរបួស ក្នុងនោះមានកុមារតូចៗជាច្រើននាក់។ ជនរងរបួសទាំងនេះ កំពុងស្ថិតក្នុងការសង្គ្រោះជាបន្ទាន់ដ៏ដិតដល់មួយ។
អ្នកសារព័ត៌មានដែលនៅផ្ទាល់នឹងកន្លែង បានអះអាងថា រថយន្ដដឹកទំនិញពណ៌ស ដែលមានប្រវែងបណ្ដោយប្រមាណជា ១៥ម៉ែត្រ ត្រូវបានបើកបំបុកចូលហ្វូងមនុស្ស ជាច្រើនពាន់នាក់។ អ្នកសារព័ត៌មានដដែល បានបង្ហាញពីទិដ្ឋភាពដ៏រន្ធត់ និងខ្លោចផ្សារ នៃជនរងគ្រោះទាំងស្លាប់ទាំងរបួស ខណៈក្រុមអ្នកជួយសង្គ្រោះ បានចាប់ផ្ដើមមកដល់ និងកំពុងធ្វើការយ៉ាងញាប់ដៃជើង ដើម្បីប្រមូលសាកសព និងអ្នករបួស។
ភេរវជនត្រូវបានគេស្គាល់អត្តសញ្ញាណ ថាជាជនជាតិបារាំង ដែលមានដើមកំណើត មកពីប្រទេសទួរនេស៊ី និងមានអាយុ៣០ឆ្នាំ។
មកដល់ម៉ោងនេះ ការវាយប្រហារភេរវកម្មនេះ នៅមិនទាន់មានក្រុមណាមួួយ ចេញមុខមកទទួលខុសត្រូវនៅឡើយ។ ប៉ុន្តែរដ្ឋាភិបាលបារាំង បានដាក់ការសង្ស័យ ទៅលើក្រុមអ៊ីស្លាមជ្រុលនិយម ឬអាចជាក្រុមរដ្ឋអ៊ីស្លាម (ពាក្យអារ៉ាប់ហៅ Daech ពាក្យកាត់បារាំងហៅ EI ពាក្យកាត់អង់គ្លេសហៅ ISIS)៕