មនុស្ស​បិត​មុខ​ពីរ​នាក់ ជា​មួយ​ឯក​សណ្ឋាន​ពណ៌​ខ្មៅ ប្រដាប់​ដោយ​អាវុធ​ដ៏​ទំនើប បាន​បើក​ការ​វាយ​ប្រហារ ទៅ​លើ​ការិយាល័យ​សារព័ត៌មាន​មួយ នៅ​សង្កាត់​ទី​១១ កណ្ដាល​រដ្ឋធានី​ប៉ារីស​ប្រទេស​បារាំង នៅ​ព្រឹក​នេះ (ម៉ោង​ក្នុង​ស្រុក)។ ការ​ផ្ទុះ​អាវុធ​បាន​កើត​ឡើង ខណៈ​ពេល​ដែល​ក្រុម​បុគ្គលិក កំពុង​ធ្វើ​ការ​ឲ្យ​ទស្សនាវដ្ដី ឆារលី អេបដូ (Charlie Hebdo) ដែល​ចេញ​ផ្សាយ​ប្រចាំ​សប្ដាហ៍។ ព័ត៌មាន​ដែល​បាន​ផ្សាយ​ឲ្យ​ដឹង នៅ​ពេល​ចុង​ក្រោយ​នេះ បាន​បញ្ជាក់​ថា មាន​មនុស្ស​ស្លាប់​យ៉ាង​ហោច​១២​នាក់។

នៅម៉ោង ១២​និង​១៥​នាទី​មុន​នេះ (ម៉ោង​ក្នុង​ស្រុក) ស្នង​ការ​នគរបាល​នៃ​រដ្ឋធានី​ប៉ារីស បាន​ប្រកាស​តួ​លេខ​ផ្លូវ​ការ​ថា មាន​មនុស្ស​ស្លាប់​១០​នាក់ និង​របួស​ប្រាំ​នាក់។ ប៉ុន្តែ​នៅ​បន្តិច​ក្រោយ​មក ខាង​នគរបាល និង​ក្រសួង​មហាផ្ទៃ​បារាំង​បាន​ប្រកាស​ថា​មនុស្ស​ស្លាប់ មាន​ចំនួន​១១​នាក់ ក្នុង​នោះ​មាន​នគរបាល​២​នាក់​ផង។ ចំណែក​ឯ​ខាង​ការិយាល័យ​ស៊ើប​អង្កេត​បារាំង ប្រចាំ​ក្រុង​ប៉ារីស ទើប​នឹង​បញ្ជាក់​ក្នុង​នាទី​ចុង​ក្រោយ​ថា មាន​មនុស្ស​ស្លាប់​យ៉ាង​ហោច​១២​នាក់ និង​របួស​២០​នាក់ ក្នុង​នោះ​៤នាក់​របួស​ធ្ងន់។

នៅតាមកញ្ចក់ទូរទស្សន៍ ដែលបានផ្សាយបន្តផ្ទាល់ពីព្រឹត្តិការណ៍ភេវរកម្មនេះ បានបង្ហាញឲ្យឃើញ ពីកម្លាំង​ប្រដាប់អាវុធរបស់អាជ្ញាធរ បានហ៊ុំព័ទ្ធសង្កាត់ទាំងមូល មានក្រុមអ្នកស៊ើបអង្កេត និងក្រុមអ្នកជួយ​សង្គ្រោះ​ច្រើននាក់ បានកំពុងធ្វើការងាររបស់ខ្លួនយ៉ាងញាប់ដៃ។ ទូរទស្សន៍ក៏បានបង្ហាញពីរូបភាព ដែលថតបាន​ដោយ​អ្នករស់នៅក្នុងសង្កាត់នោះ ដែលគេបានស្ដាប់លឺពីការផ្ទុះអាវុធឆ្លើយឆ្លងគ្នា ក្នុងរយៈពេលច្រើននាទី រវាង​ក្រុម​ភេវរករ និងក្រុមនគរបាលប្រឆាំងភេវរកម្ម។

អ្នកសារព័ត៌មានដែលបានរួចរស់ពីហេតុការណ៍នេះ បាននិយាយថា វាគឺជាការបាញ់សម្លាប់យ៉ាង​ស្រស់ៗ​តែ​ម្ដង។ ភេវរជនដែលបិទមុខទាំងនោះ មានបំពាក់ដោយអាវុធពាក់កណ្ដាលស្វ័យប្រវត្តិ (ប្រហាក់ប្រហែល នឹង​កាំភ្លើងអាការ) និងមានអាវុធបាញ់ចេញរ៉ុកែតមួយផង បានបើកការបាញ់រះទៅលើមនុស្ស ដែលកំពុង​អង្គុយ​នៅក្នុងការិយាល័យ។ ការបាញ់រះបានធ្វើក្នុងរយៈពេល៥នាទី ហើយកម្លាំងនគរបាល ដែលបានចូល​មក​ធ្វើ​អន្តរាគមន៍មុនគេនោះ ក៏បានត្រូវរងរបួសដែរ។ សម្រាប់វិទ្យុ France Info បានរាយការណ៍ថា ការវាយ​ប្រហារ​នេះ មានទិសដៅចង់សងសឹកឲ្យ«សាវ័ក»របស់ព្រះអាឡាហ៍។

បន្ទាប់ពីបានបាញ់រះរួច ភេវរជនទាំងពីរនាក់ បានដើរចេញទៅវិញដោយស្រែកថា Allahou Akbar ដោយយក​ដៃចង្អុលឡើងលើមេឃ ហើយបានបើករថយន្ដរបស់ខ្លួន ចេញទៅវិញ។ ការបាញ់ឆ្លើយឆ្លងគ្នាបានបន្តទៀត នៅលើមហាវិថី Richard Lenoir រវាងកងកម្លាំងនគរបាល ដែលត្រូវបានបញ្ជូនមកបន្ថែម ស្ថិតនៅមិនឆ្ងាយ​ប៉ុន្មាន ពីការិយាល័យសារព័ត៌មាន ដែលទំនងជាបង្ខំឲ្យភេវរជនបោះបង់ចោលរថយន្ដរបស់ខ្លួន ហើយធ្វើ​ដំណើរ​គេចខ្លួន ដោយថ្មើរជើង។

មូលហេតុ?

តាំងពីច្រើនឆ្នាំមកហើយ ទស្សនាវដ្ដី ឆារលី អេបដូ បានរងនូវការគម្រាមជាច្រើន បន្ទាប់ពីរូបភាពកំប្លែងមួយ ស្ដីពីសាវ័ក មហាមេដ (Mohamed) របស់ព្រះអាឡាហ៍ ត្រូវបានផ្សព្វផ្សាយ។ នៅមុនហេតុការណ៍ប៉ុន្មាននាទី ទស្សនាវដ្ដីមួយនេះ បានផ្សាយនៅទំព័រហ្វេសប៊ុករបស់ខ្លួន ដែលមានលក្ខណៈចំអកជាថ្មីទៀត នូវរូបលោក Abou Bakr al-Baghdadi ជាអាចារ្យអ្នកផ្សាយសាសនា របស់ក្រុមអ៊ីស្លាមនិយម ដែលកំពុងបង្កើតជារដ្ឋមួយ​រវាងប្រទេសស៊ីរី និងអៀរ៉ាក់។

ការប្រកាសអាសន្ន ដល់កម្រិត«ភេវរកម្ម»

ក្រសួងមហាផ្ទៃបារាំង បានប្រកាសអាសន្ន ដល់កម្រិត«ភេវរកម្ម» នៅក្នុងរដ្ឋធានី ប៉ារីស និងនៅតំបន់ជុំវិញ​ទាំងអស់ (Ile-de-France)។ ការប្រកាសអាសន្ននេះ នឹងអនុញ្ញាតឲ្យកម្លាំងនគរបាលពិសេសរបស់បារាំង ដាក់ទីកន្លែងសំខាន់ៗ ក្នុងនោះមានស្ថាប័នសារព័ត៌មាននានា វិមានរដ្ឋាភិបាល ហាងលក់ទំនិញធំៗ ព្រះវិហារ​សាសនា... ទៅក្នុងកិច្ចការពារដ៏តឹងរ៉ឹង។ ភេវរកម្មនេះ មានកម្រិតដ៏ខ្លាំងមួយ សម្រាប់ប្រទេសបារាំង បន្ទាប់​ពី​ភេវរកម្ម កាលពីឆ្នាំ១៩៦១។

ប្រធានាធិបតីបារាំង លោក ហ្វ្រង់ស៊័រ ហូឡង់ (François Hollande) បានធ្វើដំណើរមកដល់កន្លែងកើត​ហេតុ​ភ្លាមៗ ហើយបានថ្លែងទៅកាន់អ្នកសារព័ត៌មានថា៖ «មិនបាច់សង្ស័យទេ។ នេះ ជាភេវរកម្ម។» លោក ហូឡង់ បានថ្កោលទោសអំពើរនេះ ដោយចាត់ទុកថា ជាអំពើដ៏កំសាកធ្វើប្រឆាំងនឹងអ្នកសារព័ត៌មាន ដែល​ប្រើប្រាស់​ត្រឹមតែដងប៉ាកាជាអាវុធនោះ។ លោកបានសន្យាថា ជនល្មើសនឹងត្រូវចាប់ខ្លួន ដើម្បីយកផ្ដន្ទាទោស ទោះជា​ត្រូវប្រើពេលយូរប៉ុណ្ណាក៏ដោយ និងបានអំពាវនាវឲ្យមាន ឯកភាពជាតិបារាំង នៅចំពោះមុខការគម្រាម​កំហែង​នេះ៕

ទស្សនាវដ្ដីមនោរម្យ.អាំងហ្វូ នឹងត្រឡប់មកវិញ ជាមួយអត្ថបទលើកក្រោយ ពីហេតុការណ៍នេះ