សម រង្ស៊ី ថា​​ឈ្នះ​ក្ដី​លើ​ ហោ ណាំហុង នៅ​​បារាំង​ជា​ថ្មី​ រឿង​​បរិហារ​កេរ្តិ៍​តាម​ហ្វេសប៊ុក

លោក សម រង្ស៊ី ប្រធានគណបក្សសង្គ្រោះជាតិ ដែលកំពុងនិរទេសខ្លួនឯង នៅឯបរទេសនោះ បានអះអាងថា តុលាការ​ក្នុង​ប្រទេស​បារាំង បានសម្រេចឲ្យលោកឈ្នះក្ដី ជាថ្មីម្ដងទៀត នៅក្នុង​បណ្ដឹង​បរិហារកេរ្តិ៍ ដែលប្ដឹង​ដោយ​លោក ហោ ណាំហុង អតីត​រដ្ឋមន្ត្រី​ការបរទេស​កម្ពុជា។
សម រង្ស៊ី ថា​​ឈ្នះ​ក្ដី​លើ​ ហោ ណាំហុង នៅ​​បារាំង​ជា​ថ្មី​ រឿង​​បរិហារ​កេរ្តិ៍​តាម​ហ្វេសប៊ុក
លោក ហោ ណាំហុង អតីតរដ្ឋមន្ត្រីការបរទេសកម្ពុជា។ (រូបថតហ្វេសប៊ុក)
Loading...
  • ដោយ: កេសរ កូល អត្ថបទ៖ កេសរកូល ([email protected]) - ភ្នំពេញ ថ្ងៃទី០៩ កក្កដា ២០១៦
  • កែប្រែចុងក្រោយ: July 10, 2016
  • ប្រធានបទ: ប្រព័ន្ធយុត្តិធម៌
  • អត្ថបទ: មានបញ្ហា?
  • មតិ-យោបល់

ប្រធានគណបក្សសង្គ្រោះជាតិ ដែលជាគណបក្សប្រឆាំងនៅកម្ពុជា បានប្រកាសតាមទំព័រហ្វេសប៊ុកផ្លូវការ​របស់​​លោកថា តុលាការក្នុងប្រទេសបារាំង បានសម្រេចក្តីឲ្យលោក ហោ ណាំហុង ចាញ់លោកជាថ្មីម្តងទៀត កាល​ពីថ្ងៃទី០៨ ខែកក្កដា ឆ្នាំ២០១៦ នៅក្នុងបណ្តឹងបរិហារកេរ្តិ៍ ដែលអតីតរដ្ឋមន្ត្រីក្រសួង​ការបរទេស​កម្ពុជា​រូប​នេះ បានប្ដឹងប្រឆាំងលោក។ បណ្ដឹងនោះ មានជាប់ពាក់ព័ន្ធ នឹង​រឿងរ៉ាវ​បរិហារកេរ្ត៍ដដែល នៅ​ជំរំ ឬ​គុក​បឹង​ត្របែក ក្នុង​របបខ្មែរ​ក្រហម។

លោក សម រង្ស៊ី ខ្លួនលោក ធ្លាប់ប្រាប់ទៅសារព័ត៌មាន ខេមបូឌាដេលី ដែលចេញផ្សាយ កាលពីថ្ងៃទី២២ ខែមីនាថា បណ្ដឹងជាថ្មីមួយនេះ ត្រូវបានលោក ហោ ណាំហុង ប្ដឹងលោក​ទៅកាន់តុលាការនៃរដ្ឋធានីប៉ារីស ប្រទេស​បារាំង ពាក់ព័ន្ធនឹងការបង្ហោះ នៅលើបណ្ដាញសង្គម កាលពីថ្ងៃទី២០ ខែវិច្ឆិកា ឆ្នាំ២០១៥ នូវសារ​ទូរលេខមួ​យ របស់ស្ថានទូតអាមេរិកប្រចាំនៅកម្ពុជា។

ជាការរំលឹកឡើងវិញ កាល​ពី​ថ្ងៃ​ទី​២០ ខែ​វិច្ឆិកា ឆ្នាំ​២០១៥ លោក សម រង្ស៊ី បាន​សរសេរ​លើ​ទំព័រ​ហ្វេសប៊ុក ​របស់​​លោក​ថា លោកមាន​ឯកសារ​ផ្ទៃ​ក្នុង​ ពី​ស្ថានទូត​សហរដ្ឋ​អាមេរិក​ ប្រចាំ​ប្រទេស​កម្ពុជា ដែល​ទើប​តែ​បាន​បញ្ចេញ​​ជា​សាធារណៈ និងមាន​ខ្លឹមសារ​ថា៖ «លោក ហោ ណាំហុង បាន​វិល​មក​ប្រទេស​កម្ពុជា វិញ បន្ទាប់​​ពី​ពួក​ខ្មែរ​ក្រហម​ឡើង​កាន់​អំណាច ហើយ​គាត់​រួច​ពី​ការ​ស្លាប់ ព្រោះ​គាត់​ធ្លាប់​រៀន​សូត្រ​ជាមួយ អៀង សារី។ គាត់​បាន​ក្លាយ​ទៅ​ជា​មេ​ជំរំ (ឬ​គុក) បឹង​ត្របែក ហើយ​គាត់​ព្រម​ទាំង​ភរិយា​គាត់ បាន​សហការ​ជាមួយ​ពួក​ខ្មែរ​ក្រហម​ក្នុង​ការ​សម្លាប់​មនុស្ស​ជាច្រើន ដែល​ជាប់​ឃុំឃាំង​នៅ​ទីនោះ។»។

ចំពោះការប្ដឹងផ្ដល់ជាថ្មីនេះ មេធាវី​របស់ លោក ហោ ណាំហុង នៅក្នុងប្រទេសកម្ពុជា គឺ​លោក ការ សាវុត្ថ បានថ្លែងបដិសេធ ថាលោកមិនបានដឹងអ្វីទេ ទាំងពេលដាក់បណ្ដឹង និងទាំងនៅពេលចេញសាល​ក្រម។ នេះបើតាមការអះអាង របស់លោកមេធាវី ប្រាប់ទៅកាន់វិទ្យុអាស៊ីសេរី កាលពី​ថ្ងៃ​ទី​២២ ខែមីនា និងទៅកាន់​សារព័ត៌មាន «FreshNews» នៅថ្ងៃទី៨ ខែកក្កដានេះ។ លោក សាវុត្ថ គ្រាន់តែបានអះអាងថា លោក ហោ ណាំហុង ធ្លាប់​បាន​ឈ្នះក្ដីលើលោក សម រង្ស៊ី កាលពីបណ្ដឹងលើកមុនរួចហើយប៉ុណ្ណោះ។

លោក ហោ ណាំហុង បាន​ប្ដឹងលោក សម រង្ស៊ី ទៅកាន់តុលាការ រាប់ចាប់​តាំង​ពី​ឆ្នាំ​២០០៨ បន្ទាប់ពីប្រធាន​គណបក្ស​ប្រឆាំងរូបនេះ បានចោទ​ប្រកាន់លោក ថា​ជា​ប្រធាន​ជំរំ​ឃុំឃាំង ឬ​គុក​បឹង​ត្របែក ​ក្នុង​របប​ខ្មែរ​ក្រហម។ លោកបាន​អះ​អាង​ថា ​ការ​ចោទ​ប្រកាន់​របស់ លោក សម រង្ស៊ី បានធ្វើ​ឲ្យ​លោក និងគ្រួសារ​ឈឺ​ចាប់​យ៉ាង​ខ្លាំង។ លោក ហោ ណាំហុង បាននិយាយថា នោះគឺដោយសារតែ​បង​ប្អូន និង​សាច់ញាតិ​របស់​លោក​ ជាង ៣០​នាក់ ​ក៏ត្រូវ​​បាន​​ខ្មែរ​​ក្រហម​​សម្លាប់ ដូចជាប្រជាជនខ្មែរដទៃទៀតដែរ។

ទាក់ទងនឹងបណ្ដឹងលើកមុន ក្នុងប្រទេសបារាំងនេះ លោក ហោ ណាំហុង បានឈ្នះលោក សម រង្ស៊ី នៅ​សាលា​ដំបូង (Cour correctionnel) និងនៅសាលាឧទ្ធរណ៍ (Cour d'appel) តែលោក ណាំហុង បានចាញ់លោក រង្ស៊ី នៅ​តុលាការ​កំពូល (Cour de Cassation)។ នេះបើតាមឯកសារ​សាលក្រម​មួយ របស់តុលាការ​កំពូល​បារាំង ដែល​ទស្សនាវដ្ដីមនោរម្យ.អាំងហ្វូ ទទួលបានមួយច្បាប់។

ផ្ទុយទៅវិញ  លោក សម រង្ស៊ី ត្រូវបានតុលាការនៅក្នុងប្រទេសកម្ពុជា ផ្ដន្ទាទោសឲ្យជាប់ពន្ធនាគារ ២ឆ្នាំ។ ប្រធាន​គណបក្សប្រឆាំងរូបនេះ បានរងនូវចេញសាលក្រមតាមចាប់ខ្លួន ​ដ៏ប្រទាំងប្រទើស ទាក់ទងនឹងការផ្ដន្ទាទោសខាងលើ រហូតលោក​បាន​ធ្វើ​និរទេស​ខ្លួនឯង នៅឯបរទេសមកដល់សព្វថ្ងៃ។

តបទៅនឹងសំនួរអ្នកសារព័ត៌មាន ដែលចង់ដឹងថា លោកយល់ព្រមសុំទោស លោក ហោ ណាំហុង ឬទេនោះ លោក សម រង្ស៊ី បានបន្តសរសេរ នៅលើទំព័រហ្វេសប៊ុករបស់លោក នៅថ្ងៃ​ទី​២០ ខែ​វិច្ឆិកា ឆ្នាំ​២០១៥ ដដែល​ថា៖ «លោក ហោ ណាំហុង ទេ​ដែល​ត្រូវ​សូម​ទោស​ដួង​វិញ្ញាណក្ខន្ធ និង​ក្រុម​គ្រួសារ​ជន​រងគ្រោះ ដែល​​ត្រូវ​​បាន​ពួក​ខ្មែរ​ក្រហម​សម្លាប់ បន្ទាប់​ពី​យក​ចេញ​ពី​គុក​បឹង​ត្របែក​ នៅ​ចុង​ទសវត្សរ៍​ឆ្នាំ​១៩៧០ ដោយសារ​តែ​លោក ហោ ណាំហុង នេះ បាន​ចូល​ដៃ​ជាមួយ​ពួក​ខ្មែរ​ក្រហម ហើយ​បាន​មួលបង្កាច់​ជន​ស្លូត​ត្រង់ ដើម្បី​យក​ចិត្ត​ពួក​ខ្មែរ​ក្រហម ហើយ​រួច​ខ្លួន​ចំពោះ​រូប​គាត់ (ហោ ណាំហុង ហៅ​មិត្ត យ៉ែម) និង​ក្រុម​គ្រួសារ​គាត់»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...