សម រង្ស៊ី ថា ហ៊ុន សែន ធ្លាប់ធ្វើតែការ«កាត់ច្បិចមកចាប់កំហុស»
- ដោយ: មនោរម្យ.អាំងហ្វូ ([email protected]) - ប៉ារីស ថ្ងៃទី២០ តុលា ២០១៧
- កែប្រែចុងក្រោយ: October 20, 2017
- ប្រធានបទ: នយោបាយខ្មែរ
- អត្ថបទ: មានបញ្ហា?
- មតិ-យោបល់
-
«លោក ហ៊ុន សែន គាត់ធ្លាប់តែធ្វើអញ្ចឹង!» នេះ បើតាមការលើកឡើង របស់លោក សម រង្ស៊ី អតីតប្រធានគណបក្សសង្គ្រោះជាតិ ដើម្បីប្រតិកម្ម ទៅនឹងការផ្សព្វផ្សាយរបស់រដ្ឋាភិបាលលោក ហ៊ុន សែន កាលពីម្សិលម៉ិញ នូវវីដេអូឃ្លីបខ្លីមួយ មានរយៈពេលជាង១នាទី ដែលជាការថ្លែងរបស់លោក នៅចំពោះក្រុមអ្នកគាំទ្រ ក្នុងក្រុង ឡូវែល សហរដ្ឋអាមេរិក កាលពីខែមិថុនា ឆ្នាំ២០១១កន្លងទៅ។
នៅក្នុងវីដេអូឃ្លីបនោះ គេឮសូរលោក សម រង្ស៊ី ដែលកាលនោះជាប្រធានគណបក្ស សម រង្ស៊ី បានអំពាវនាវ ឲ្យកងទ័ពបែរចុងការណុង ងាកមកផ្តួលរំលំរបបដឹកនាំ របស់លោក ហ៊ុន សែន។
មេដឹកនាំប្រឆាំងរូបនេះ បានថ្លែងក្នុងវីដេអូឃ្លីបថា៖ «អ៊ីចឹងដូចជាវាទុំ ផ្លែឈើវាទុំ វាស្ទើរតែដង្កូវស៊ី រុញតែបន្តិចទៅធ្លាក់ហើយ ការបះបោរប្រជារាស្ត្រផុសផុលបន្តិច។ យើងត្រូវការការរៀបចំ...យើងត្រូវការការផ្គត់ផ្គង់ ឧបត្ថម្ភខ្លះ។ យើងត្រូវការផ្ដល់បង្អែកខ្លះ ដើម្បីឲ្យការបះបោរផ្ទុះឡើង ហើយកងកម្លាំងប្រដាប់អាវុធភាគច្រើន គឺចេញមកពីប្រជារាស្ត្រខ្មែរក្រ ប្រាក់ខែតិច រស់អត់បានទេ បងប្អូន។»។
គេបានឮសំដី របស់អតីតប្រធានគណបក្ស សម រង្ស៊ី ក្នុងវីដេអូខ្លីនោះទៀតថា៖ «មានតែបែរចុងកាណុង ដើម្បីផ្តួលរំលំរបបនេះទៅ។ នេះ ជាសេចក្ដីអំពាវនាវរបស់គណបក្ស សម រង្ស៊ី។ រូបខ្ញុំ សម រង្ស៊ី សូមអំពាវនាវឲ្យប្រជារាស្ត្រខ្មែរ កងកម្លាំងប្រដាប់អាវុធរួមគ្នាទម្លាក់ ហ៊ុន សែន ចេញពីតំណែងរបបក្បត់ជាតិ។ យើងត្រូវតែបញ្ចប់នៅពេលនេះ។ (...) យើងចង់ឲ្យ ហ៊ុន សែន ចុះចេញពីតំណែង កាន់តែឆាប់កាន់តែល្អ។»។
នៅចំពោះការយកវីដេអូនេះ មកផ្សព្វផ្សាយឡើងវិញ ពីសំណាក់រដ្ឋាភិបាលកម្ពុជា ត្រូវបានលោក សម រង្ស៊ី ចេញមុខមកបកស្រាយថា វាជាសមិទ្ធផលថ្មីមួយទៀត នៃ«កាត់ត» ឬ«ច្បិចយក»មួយផ្នែក ពីការថ្លែងរបស់លោក ដើម្បីធ្វើការចាប់កំហុស ទៅលើរូបលោក។ លោកថា៖ «យើងអាចកាត់ត យើងអាចច្បិចខ្សែអាត់ណាមួយ វីដេអូឃ្លីបណាមួយ មកបង្ហាញក្រៅពីបរិបទរបស់វា។ គឺខុសពីន័យដើមរបស់វា»។
អតីតប្រធានគណបក្សសង្គ្រោះជាតិ បានបដិសេធថា តែបើគេមើលទៅក្នុងបរិបទ នៃវីដេអូឃ្លីបទាំងមូលវិញ លោកមិនបាននិយាយដូច្នេះទេ។ លោក សម រង្ស៊ី បានពន្យល់ថា៖ «ខ្ញុំថា សុំមើលឧទាហរណ៍ជាប្រវត្តិសាស្ត្រ។ ឧទាហរណ៍លោក សូសេស្គូ (ឈ្មោះពេញ Nicolae Ceaușescu) ជាមេដឹកនាំផ្ដាច់ការ នៅប្រទេសរ៉ូម៉ានី។ តែនៅឆ្នាំ១៩៨៩ ប្រជារាស្ត្របះបោរ។ គាត់បញ្ជាកងទ័ពទៅបង្ក្រាបប្រជារាស្ត្រ តែកងទ័ព មិនសុខចិត្តបាញ់សម្លាប់ប្រជារាស្ត្រ កងទ័ពបែរចុងកាណុង ទៅបង្ក្រាប ទៅកំចាត់ថ្នាក់ដឹកនាំពុករលួយវិញ។ នេះ ជាឧទាហរណ៍ប្រវត្តិសាស្ត្រទេ ទោះខ្ញុំនិយាយ ឬមិននិយាយ បើនរណាសិក្សាពីប្រវត្តិសាស្ត្រ នឹងឃើញដូចគ្នា។»។
ទស្សនាវដ្ដីមនោរម្យ.អាំងហ្វូ ទទួលបានវីដេអូដើមនោះទាំងស្រុង នៃការថ្លែងរបស់លោក ក្នុងជំនួបជាមួយអ្នកគាំទ្រ នៅក្រុង ឡូវែល សហរដ្ឋអាមេរិក និងសូមយកមកចាក់ផ្សាយទាំងស្រុង ដូចខាងក្រោម៖
យ៉ាងណា រដ្ឋាភិបាលកម្ពុជាកំពុងបង្ហាញពីគម្រោងរបស់ខ្លួន ក្នុងការដាក់ពាក្យបណ្ដឹងប្រឆាំងលោក សម រង្ស៊ី ជុំវិញការថ្លែងរបស់លោក នៅក្នុងវីដេអូដ៏ខ្លីខាងលើ។ នេះ បើតាមការអះអាង របស់លោក ឈុំ សុជាតិ អ្នកនាំពាក្យក្រសួងការពារជាតិ។
លោក ឈុំ សុជាតិ បានថ្លែងថា៖ «ទង្វើនេះ ជាទង្វើមួយដែលយើងមិនអាចអត់ឱនបាន។ យើងសិក្សាបន្ថែម ពីការញុះញង់បំបែកបំបាក់ជាតិព្រោះអាហ្នឹង ធ្វើឲ្យបាត់សន្តិសុខជាតិ។ គាត់ញុះញង់ ឲ្យកងទ័ពប្រឆាំងនឹងរដ្ឋាភិបាល ប្រឆាំងនឹងការដឹកនាំ ជាអំពើមួយដែលក្បត់ជាតិ។ យើងនឹងពិចារណាតាមច្បាប់ទៀត ហើយឲ្យដាក់ទោសទណ្ឌតាមច្បាប់។»
ប្រសិនជារដ្ឋាភិបាលកម្ពុជា ដាក់បណ្ដឹងនេះចូលទៅកាន់តុលាការ លោក សម រង្ស៊ី នឹងទទួលបានសំនុំរឿងក្ដីមួយទៀត បន្ថែមពីលើសំនុំរឿងជាច្រើន ដែលលោកកំពុងមាន នៅក្នុងប្រព័ន្ធតុលាការកម្ពុជា។ ក្នុងពេលកន្លងមក លោកបានចំអកទៅនឹងពាក្យបណ្ដឹងទាំងនោះថា ឲ្យប្ដឹងកាន់តែច្រើន កាន់តែល្អ ហើយលោកនឹងមិនចាប់អារម្មណ៍ ជាមួយប្រព័ន្ធតុលាការ ដែលលោកហៅថា ជា«អាយ៉ង»របស់រដ្ឋាភិបាលកម្ពុជា និងគណបក្សប្រជាជនកម្ពុជា នៅក្នុងប្រទេសនោះឡើយ។
តែអ្វីដែលគេឆ្ងល់ខ្លាំងជាងនេះនោះ គឺនៅត្រង់ថា ហេតុអ្វីរដ្ឋាភិបាលលោក ហ៊ុន សែន ងាកមកចាប់អារម្មណ៍លើលោក សម រង្ស៊ី ខណៈមន្ត្រីរដ្ឋាភិបាល ក៏ដូចជាមន្ត្រីគណបក្សប្រជាជនកម្ពុជា ក្នុងពេលកន្លងមក តែងចាត់ទុកមេដឹកនាំប្រឆាំងរូបនេះ ថា«មិនសំខាន់» ឬ«ហួសដឺឡេ (Délais)»ទៅហើយនោះ? ក្រុមអ្នកឃ្លាំមើល បានយល់ឃើញថា ការយកវីដេអូដ៏ចាស់ជរា មកបង្ហោះឡើងវិញបែបនេះ កើតចេញពីហេតុផលនយោបាយ ច្រើនជាងហេតុផល«ផ្លូវច្បាប់» និងជាពិសេស រដ្ឋាភិបាលលោក ហ៊ុន សែន គ្រាន់តែចង់បន្ថែមងារ «ជនក្បត់ជាតិ» ឬតាមភាសាលោក ហ៊ុន សែន ថា«អាក្បត់ជាតិ» ឲ្យលោក សម រង្ស៊ី ដើម្បីងាយហៅជាងមុនប៉ុណ្ណោះ៕