ព្រឹត្តិការណ៍នយោបាយចុងក្រោយ នៅកម្ពុជា បានបង្កការព្រួយបារម្ភខ្លាំងក្លា សម្រាប់បណ្ដាប្រទេសជាច្រើន ក្នុងសហភាពអ៊ឹរ៉ុប ដែលជាលំហរទីផ្សារនាំចេញ ធំជាងគេ របស់កម្ពុជា។ ក្នុងចំណោមប្រទេសទាំងនោះ ប្រទេសបារាំង អាល្លឺម៉ង់ អង់គ្លេស និងអ៊ីតាលី បានបង្ហាញជំហររបស់ផងខ្លួនរួចហើយ។ ប៉ុន្តែនៅថ្ងៃនេះ ប្រទេសស៊ុយអែតបានបញ្ចេញសម្លេងខ្លាំងៗបន្ថែមទៀត តាមរយៈមន្ត្រីការទូតរបស់របស់ខ្លួន ថានឹងពិចារណាឡើងវិញ អំពីទំនាក់ទំនងជាមួយប្រទេសកម្ពុជា ប្រសិនណាជារដ្ឋាភិបាលលោក ហ៊ុន សែន រំលាយគណបក្សសង្គ្រោះជាតិ ដែលជាគណបក្សប្រឆាំងធំជាងគេ និងមានអាសនៈនៅក្នុងរដ្ឋសភា បន្ទាប់ពីគណបក្សកាន់អំណាច។

អ្នកស្រី អេននីកា ប៊ិន ដេវីដ (Annika Ben David) ​អគ្គរាជទូត​ទទួលបន្ទុក​ផ្នែក​សិទ្ធិមនុស្ស លទ្ធិប្រជាធិបតេយ្យ និង​នីតិរដ្ឋ​របស់​ប្រទេស​ស៊ុយអ៊ែត បានលើកឡើងពីជំហរខាងលើនេះ ​ប្រាប់​ក្រុម​អ្នកសារព័ត៌មាន នៅ​ក្នុង​និវេសនដ្ឋាន ឬ​ផ្ទះ​របស់​អគ្គរាជទូត​ស៊ុយអ៊ែត នៅរាជធានីភ្នំពេញ នៅ​រសៀល ​ថ្ងៃ​ទី​១៩ ខែ​តុលាម្សិលម៉ិញ ខណៈពេលដែលអ្នកស្រី បានបញ្ចប់ដំណើរទស្សនកិច្ចស្វែងយល់របស់អ្នកស្រី នៅកម្ពុជា។

Press meeting at the Swedish residence, #Cambodia pic.twitter.com/IYgxEJyb9A

— Annika Ben David (@annikabendavid) 19 octobre 2017

នេះ​ជាដំណើរទស្សនកិច្ច​ លើក​ទី​១ របស់​អ្នកស្រី ដែល​មក​ពិនិត្យមើល​ស្ថានភាព​សិទ្ធិមនុស្ស​នៅ​កម្ពុជា នៅក្រោយ​ពេល រដ្ឋាភិបាល​ស៊ុយអ៊ែត សំដែង​ការ​ព្រួយបារម្ភ​យ៉ាង​ខ្លាំង ចំពោះ​ដំណើរការ​គោរព​សិទ្ធិមនុស្ស និង​លទ្ធិប្រជាធិបតេយ្យ​កម្ពុជា។ តែការព្រួយបារម្ភនេះ មិនមានន័យថា រដ្ឋាភិបាល​ស៊ុយអ៊ែត ​ជឿ​ទាំងស្រុង​អំពី​ដំណើរ​ដើរ​ថយក្រោយ ​នូវ​សិទ្ធិមនុស្ស និងលទ្ធិ​ប្រជាធិបតេយ្យ​នៅ​កម្ពុជានោះទេ។ អ្នកស្រីបញ្ជាក់ថា ដោយហេតុដូច្នេះ​ហើយ ទើប​អ្នកស្រី​មក​ជួប​ដោយ​ផ្ទាល់ ជាមួយ​គ្រប់​ភាគីកម្ពុជា និងជាពិសេស ជាមួយ​តំណាង​រដ្ឋាភិបាល​កម្ពុជា។

អ្នកស្រី អេននីកា ប៊ិន ដេវីដ បាន​ប្រាប់​ក្រុម​អ្នកសារព័ត៌មាន​ថា អ្នកស្រីបាន​ជួប​​ជាមួយ​រដ្ឋមន្ត្រី​២​រូប គឺ​រដ្ឋមន្ត្រី​ក្រសួង​កិច្ចការ​នារី និង​រដ្ឋមន្ត្រី​ក្រសួង​ព័ត៌មាន ហើយបានលើកនៅ​ក្នុង​ជំនួប ​ជាមួយ​រដ្ឋមន្ត្រី​ក្រសួង​ព័ត៌មាន លោក ខៀវ កាញារីទ្ធ អំពី​ការ​រឹតត្បិត និង​ការ​បិទ​ស្ថានីយ​វិទ្យុ។ អ្នកស្រី​អះអាង​ថា រដ្ឋមន្ត្រី​ក្រសួង​ព័ត៌មាន​ទទួល​ស្គាល់​ ពីការ​បិទ​ស្ថានីយ​វិទ្យុ​ទាងនោះ​ពិតមែន ប៉ុន្តែ​ជា​ការ​ធ្វើឡើង​ តាមច្បាប់​របស់​កម្ពុជា។ មន្ត្រីការទូតនៃប្រទេសស៊ុយអែត ផ្នែកសិទ្ធិមនុស្សរូបនេះ បាន​បញ្ជាក់​ប្រាប់​ទៅលោក ខៀវ កាញារីទ្ធ វិញថា អ្នកស្រី​ព្រួយបារម្ភ ដោយការ​អនុវត្ត​ច្បាប់​នេះ មិន​ស្មើភាព​គ្នា និងបានសំដៅ​ ទៅលើ​តែក្រុម​ណាមួយ។

ប្រទេស​ស៊ុយអ៊ែត គឺជាម្ចាស់ជំនួយ ក្នុងទឹកប្រាក់ប្រមាណជា ១០០លានដុល្លារ ដើម្បីជួយទ្រទ្រង់ ​ផ្នែក​ការ​គោរព​សិទ្ធិមនុស្ស​ នៅ​កម្ពុជា។ អ្នកស្រី អេននីកា ប៊ិន ដេវីដ បានថ្លែងថា ប្រទេសស៊ុយអែត ចង់​ឃើញ​ស្ថានភាព​នៅ​កម្ពុជា បាន​វិល​ទៅ​រក​សភាព​ដើម​វិញ ដែល​បើក​ឲ្យ​សារព័ត៌មាន និង​សង្គម​ស៊ីវិល មាន​សេរីភាព​ពេញទី​ ក្នុង​ការ​បញ្ចេញមតិ និង​គ្មាន​ការ​ដាក់​គំនាប ​ទៅលើ​គណបក្សប្រឆាំង។ អ្នកស្រី​ថា គម្រោង​រំលាយ​បក្ស​ប្រឆាំង គឺជា​ការ​ជ្រើសរើស​ផ្លូវដើរ​ខុស។

កាលពីថ្ងៃចន្ទ ដើមសប្តាហ៍នេះ តំណាងរាស្ត្រគណបក្សប្រជាជនកម្ពុជា បានលើកដៃអនុម័ត ធ្វើវិសោធនកម្មច្បាប់ចំនួន៤ ដែលបើកផ្លូវ ឲ្យមានលទ្ធភាពក្នុងការរំលាយគណបក្ស ដែលមានអាសនៈក្នុងរដ្ឋសភា ហើយដកហូតយកអាសនៈទាំងនោះ ទៅចែកឲ្យគណបក្សផ្សេងទៀត ទោះជាគណបក្សទាំងនោះ គ្មានការគាំទ្រ (ឬមានការគាំទ្រតិចតួច) ពីពលរដ្ឋម្ចាស់ឆ្នោតក៏ដោយ។

យ៉ាងណា ក៏ការពិចារណាជាថ្មី អំពីទំនាក់ទំនងជាមួយកម្ពុជា ពីសំណាក់រដ្ឋាភិបាលស៊ុយអែត មិនត្រូវបានអ្នកស្រី អេននីកា ប៊ិន ដេវីដ លើកឡើងលំអិត នៅក្នុងជំនួបជាមួយក្រុមអ្នកសារព័ត៌មាននោះទេ។ អ្នកស្រីបានពន្យល់ថា អ្នកស្រីនឹងយកបញ្ហាកម្ពុជា ទៅជម្រាបជូនរដ្ឋាភិបាលស៊ុយអែត ហើយការដកទូតស៊ុយអែត ចេញពីកម្ពុជា មិនមែនជាជម្រើសល្អមួយឡើយ។ ប៉ុន្តែរដ្ឋាភិបាលស៊ុយអ៊ែត នឹង​ព្យាយាម​ធ្វើ​អ្វី​បន្ថែម​ទៀត ជាមួយ​រដ្ឋាភិបាល​កម្ពុជា។

When minister @annikabendavid speaks out against repression of opposition party which has large popular support among Cambodians 2/2

— Kevin Doyle (@doyle_kevin) 19 octobre 2017

លោក អេនឌ្រីស ចូហានសុន (Andreas Johansson) អនុប្រធាន​ផ្នែក​សហ​ប្រតិបត្តិ​ការអភិវឌ្ឍ​ នៃស្ថានទូត​ស៊ុយអ៊ែត ហៅ​កាត់​ថា SIDA បានពន្យល់ដែរថា ជំនួយ​របស់​រដ្ឋាភិបាល​ស៊ុយអ៊ែត​នៅ​កម្ពុជា មានទៅ​លើ​វិស័យ​៣​សំខាន់ គឺ​លទ្ធិប្រជាធិបតេយ្យ និង​សិទ្ធិមនុស្ស - ការងារ និង​សិក្សាអប់រំ - និងបរិស្ថាន និង​បម្រែបម្រួលអាកាសធាតុ។ លោក​អះអាង​ថា SIDA មាន​គម្រោង​ច្រើន​ លើ​វិស័យ​ទាំង​៣​នេះ ប៉ុន្តែ​ដោយសារ​មាន​ព្រឹត្តិការណ៍​ថ្មីៗ​នេះកើតឡើង ប្រទេសស៊ុយ​អ៊ែត កំពុង​ពិចារណា​លើ​ជំនួយ​ទាំងនេះ។

លោក ផៃ ស៊ីផាន អ្នកនាំពាក្យរដ្ឋាភិបាល និងជារដ្ឋលេខាធិការ ទីស្ដីការគណៈរដ្ឋមន្ត្រី បានច្រានចោលការលើកឡើងខាងលើ និងបានចាត់ទុកទង្វើនេះ ជាការប្រមាថ និងជ្រៀតជ្រែកចូលកិច្ចការ ផ្ទៃក្នុង នៃរដ្ឋអធិបតេយ្យមួយ។ លោកបានថ្លែងឡើងថា៖ «សកម្មភាពនេះ មិនអាចឲ្យរាជរដ្ឋាភិបាល ទទួលយកបានឡើយ»។

យីហោសម្លៀកបំពាក់ «H&M» របស់ប្រទេសស៊ុយអែត ដែលមានដាក់លក់ នៅតាមហាងធំៗ និងនៅតាមបណ្ដាទីផ្សារនានា ក្នុងពិភពលោក ជាពិសេសក្នុងសហភាពអ៊ឺរ៉ុប បានទទួលទិញយ៉ាងច្រើន នូវសម្លៀកបំពាក់ ពីរោងចក្រកាត់ដេរទាំងឡាយ នៅកម្ពុជា។ ការទទួលទិញសម្លៀកបំពាក់ ពីប្រទេសកម្ពុជា ដោយទីផ្សារនៅសហភាពអ៊ឺរ៉ុប និងនៅសហរដ្ឋអាមេរិកនេះ បានផ្ដល់ទៅឲ្យកម្មករកម្មការិនីខ្មែរ រាប់សិបពាន់នាក់ នូវការងារ និងប្រាក់ចំណូល ជាពិសេសជួយដល់សេដ្ឋកិច្ចកម្ពុជា ឲ្យមានសន្ទុះទៅមុខ៕