ការបាញ់«ឆៅ»​សម្លាប់លោក កែម ឡី អ្នកស្រាវជ្រាវផ្នែកសង្គម និងជាអ្នកធ្វើអត្ថាធិប្បាយនយោបាយដ៏ល្បី បាន​កើត​ឡើង នៅម៉ោងប្រមាណជា៩ព្រឹកថ្ងៃទី១០ ខែកក្កដា ឆ្នាំ២០១៦។ ប៉ុន្តែគេត្រូវរង់ចាំដល់ម៉ោង ៣​រសៀល​​ថ្ងៃ​ដដែល ដើម្បីទទួលបានប្រតិកម្មពីលោក ហ៊ុន សែន នាយករដ្ឋមន្ត្រីកម្ពុជា នៅតាម​បណ្ដាញ​សង្គម។ នេះ គេនៅមិនទាន់និយាយ ដល់កម្មវិធីច្រៀង​កំសាន្ដ​ផ្សេងទៀត ដែលទំព័រហ្វេសប៊ុក​របស់​នាយក​រដ្ឋ​មន្ត្រី​កម្ពុជា នៅ​តែ​បន្ត​ចាក់​ផ្សាយ ​យ៉ាង​គគ្រឹក​គគ្រេង​​នោះផងទេ។

ជាពិសេស ប្រតិកម្មរបស់លោក ហ៊ុន សែន តាមរយៈសំណេរដ៏ខ្លីនោះ ត្រូវបានមនុស្សជាច្រើនមើលឃើញ ថា​មានភាពយឺតយ៉ាវ បើប្រៀបធៀបទៅនឹងករណីចាប់ចង លើ​សមាជិកគណបក្សប្រឆាំង ឬក្រុមអ្នករិះគន់​ក្នុង​ពេល​កន្លង​មក។ រីឯសារចូលរួមមរណទុក្ខនោះទៀតសោត ក៏ត្រូវបាន​គេ​មើល​ឃើញដែរ ថាមានសភាព​សោះ​កក្រោះ មិន​​ប្រកប​ដោយ​សុទ្ធចិត្ត និងគ្មាន​ចំណាត់ការអ្វីច្បាស់លាស់។

ខាងក្រោមនេះ ជាសាររបស់លោក ហ៊ុន សែន ដែលបានសរសេរនៅលើទំព័រហ្វេសប៊ុក (មានទាំងកំហុស​អក្ខរាវិរុទ្ធ) នៅវេលាម៉ោង​ប្រមាណ​ជាង​៣រសៀល ម៉ោងក្នុងស្រុក៖

«ខ្ញុំសូមចូលរួមមរណៈទុក្ខ ចំពោះមរណៈភាពរបស់ លោក កែម ឡី ដែលត្រូវខ្មាន់កាំភ្លើង បាញ់ប្រហារ​យ៉ាង​ឃោឃៅ ដែលខ្ញុំសូមថ្កោលទោស អំពើរដ៏ព្រៃផ្សៃនេះ។

សូមឱ្យស្ថាបន័មានសមត្ថកិច្ច ចាត់វិធានការយ៉ាងហ្មឺងហ្មាត់ចំពោះករណីយនេះ និងខិតខំត្រួតពិនិត្យ​អាវុធ​ជាតិ​ផ្ទុះ និង(សរសេរពីរដង ក្នុងឃ្លាតែមួយ)ចាត់វិធានការពង្រឹងសន្តិសុខ ដើម្បីការពារសុវត្ថិភាពប្រជាជន នៅ​ទូទាំង​ប្រទេស៕»

លោក ព្រហ្ម​ គិត អតីតមន្ត្រីច្បាប់កម្ពុជា បានលើកឡើងប្រាប់ទស្សនាវដ្ដីមនោរម្យ.អាំងហ្វូថា សារចូលរួម​មរណ​ទុក្ខ​បែប​នេះ នរណាម្នាក់ក៏អាចសរសេរបានដែរ ឲ្យតែមនុស្សនោះរៀនចប់ ថ្នាក់បឋមសិក្សា។ លោក​បាន​ថ្លែង​បន្ត​ថា សារចូលរួមរំលែកទុក្ខរបស់លោក ហ៊ុន សែន អាចធ្វើឡើងនៅពេលបន្ទាប់ ឬយឺតពេលបន្តិច​​ ​ក៏​​បានដែរ។ តែ​រឿង​ដែលសំខាន់ គឺភាពយឺតយ៉ាវ​នៃប្រតិកម្មរបស់លោក ហ៊ុន សែន ក្នុងឋានៈលោក ជា​នាយក​រដ្ឋមន្ត្រី និង​​ក្នុង​ឋានៈ​ជា​មេ​ដឹកនាំ​​​នៃ​នីតិប្រតិបត្តិម្នាក់ នៅ​ចំពោះ​ការ​បាញ់​បោះ​ កណ្ដាលបេះដូង​ប្រទេស។ លោក ព្រហ្ម គិត បាន​ថ្លែង​ថា ភាពយឺតយ៉ាវនេះ ទំនងជា​លោក​ ហ៊ុន សែន ចង់រង់ចាំ​មើល ថា​តើ​ប្រតិកម្ម​ពី​បណ្ដាជន មាន​ដល់​កម្រិត​ណា។

មន្ត្រីចូលនិវត្តន៍រូបនេះ បានពន្យល់ទៅលើឃ្លាឃ្លោងទីពីរ នៃសំណេររបស់លោក ហ៊ុន សែន ថា៖ «អ្វីដែល​ពលរដ្ឋ​ចង់បាន គឺធ្វើក្រោល ដើម្បីការពារគោ មិនមែនគោបាត់ហើយ ទើបលោក ហ៊ុន សែន ចេញ​មុខ​មក​ធ្វើ​ក្រោលដូច្នេះទេ។ ចំណាត់ការពិនិត្យអាវុធជាតិផ្ទុះ ចាំបាច់ត្រូវតែជាវិធានការ​ចំពោះមុខ របស់រដ្ឋាភិបាល និង​អាជ្ញាធរ​កម្ពុជា ព្រោះអាការបាញ់បោះ អំពើប្លន់ប្រដាប់អាវុធ។ល។ នៅតែបន្តមាន​សឹងតែរាល់ថ្ងៃ។ ប៉ុន្តែ សំណេរ​របស់​នាយករដ្ឋមន្ត្រីម្នាក់ ដែលខ្ជីខ្ជារពោរពេញ​ដោយកំហុសអក្ខរាវិរុទ្ធ ហើយនិយាយពីរឿង​ដែល​គ្មាន​ន័យ​បែប​នេះ គ្រាន់តែជាសំណេរ ដើម្បីយកតែនាមប៉ុណ្ណោះ»៕