រូបចម្លាក់ ឡេនីន ធំជាងគេដែលនៅដល់សព្វថ្ងៃ ទើបនឹងត្រូវគាស់ចេញ
- ដោយ: ឈូករ័ត្ន អត្ថបទ និងយកការណ៍៖ ឈូករ័ត្ន ([email protected]) - បារីស ថ្ងៃទី១៨ មីនា ២០១៦
- កែប្រែចុងក្រោយ: March 20, 2016
- ប្រធានបទ: ចម្លាក់
- អត្ថបទ: មានបញ្ហា?
- មតិ-យោបល់
-
«លាហើយ... សមមិត្ត ឡេនីន ដ៏មហិមា! លានៅពេលនេះ មិនដឹងថាពេលណា នឹងជួបសមមិត្តវិញឡើយ។» ប៉ុន្តែយ៉ាងហោចណាស់ ក៏រូបចម្លាក់ដ៏ធំមួយ របស់សមមិត្តអគ្គមគុទេសន៍រូបនេះ បានឈរនៅជាប់រហូត មកទល់នឹងសព្វថ្ងៃ មុននឹងរូបចម្លាក់ ត្រូវបានគាស់រំលើងចេញ កាលពីថ្ងៃព្រហស្បត្តិ៍។
រូបចម្លាក់ដ៏សម្បើម ត្រូវបានសាងសង់ឡើង ពីដែកសំរិទ្ធ និងពីថ្មក្រានីត នៅកណ្ដាលក្រុង ហ្សាប៉ូរីចា (Zaporijia) ស្ថិតក្នុងភាគអាគ្នេយ៍ នៃប្រទេសអ៊ុយក្រែន តាំងពីឆ្នាំ១៩៦៤។ រូបចម្លាក់មានកំពស់ ២០ម៉ែត្រ (រាប់ទាំងខឿនទ្ររូបចម្លាក់) និងមានទំងន់ដល់ទៅ ៤០តោន។
ដោយសារមានបញ្ហាបច្ចេកទេស ការគាស់រំលើងរូបចម្លាក់ របស់«សមមិត្ត»មេដឹកនាំកុម្មុយនីសមួយនេះ មិនបានប្រព្រឹត្តិទៅ ដោយរលូននោះទេ ហើយគេត្រូវការរយៈពេល ជាច្រើនថ្ងៃ ដើម្បីធ្វើការគាស់ចេញបន្តិចម្ដងៗ។ មកដល់ថ្ងៃនេះ អាជ្ញាធរតំបន់របស់ប្រទេសអ៊ុយក្រែន នៅមិនទាន់ប្រកាសថា នឹងត្រូវដាក់អ្វីមកជំនួស រូបចម្លាក់នេះនៅឡើយ។
បើតាមវិទ្យាស្ថាន ដើម្បីព្រលឹងជាតិ របស់ប្រទេសអ៊ុយក្រែន បានឲ្យដឹងថា នៅមុនការងើបបះបោរ របស់ប្រជាជនអ៊ុយក្រែន ដែលនិយមលោកខាងលិច នាឆ្នាំ២០១៣នោះ រូបចម្លាក់របស់ ឡេនីន មានចំនួនដល់ទៅ២៥០០រូប ស្ថិតនៅពាសពេញប្រទេស ដែលជាអតីតទឹកដីមួយ នៃសហភាពសង្គមនិយមសូវៀត។ នៅក្នុងអំឡុងពេល នៃការងើបបះបោរនោះ រូបចម្លាក់ប្រមាណជា ៦០០រូប ជាពិសេសរូបចម្លាក់ ក្នុងរដ្ឋធានី គៀវ (Kiev) ត្រូវបានគាស់រំលើងចោល ។
គេត្រូវរង់ចាំ រហូតដល់ខែឧសភា ឆ្នាំ២០១៥ ទើបច្បាប់ស្ដីពីការបំបាត់ចោល នូវលិទ្ធិសូវៀតនិយម ត្រូវបានអនុម័ត្រ ដែលអនុញ្ញាត ឲ្យមានការគាស់រំលើងចោល នូវរូបចម្លាក់ ចំនួនជាង១០០០ ជាបន្តបន្ទាប់ទៀត។ ច្បាប់នេះ មិនមែនបង្កើតឡើង ដើម្បីគាស់តែរូបចម្លាក់ ឡេនីន គ្រវាត់ចោលប៉ុណ្ណោះទេ តែច្បាប់ដដែល បានធ្វើការហាមឃាត់ នូវសកម្មភាពណាក៏ដោយ ដូចជាការឃោសនា តាមបែបកុម្មុយនីសជាដើម ថាមិនឲ្យកើតមាន នៅលើផ្ទៃប្រទេស អ៊ុយក្រែន នោះឡើយ។
សម្រាប់ប្រទេសរ៉ូស្ស៊ីវិញ បានបរិហារច្បាប់ខាងលើនេះ ថាជាយុទ្ធវិធីតាមបែប«ផ្ដាច់ការ» ដើម្បីបំបាត់ចោល នូវលិទ្ធិសូវៀតនិយម ក្រោមផ្លាក«ជាតិនិយម» របស់ប្រទេសអ៊ុយក្រែន៕
