មន្រ្តីរបស់អង្គការ​ការពារសិទ្ធិមនុស្ស នៅតែចាត់ទុកថា ការចោទប្រកាន់ ការចាប់ខ្លួន និងការឃុំខ្លួនលើលោក ហុង សុខហួរ សមាជិកព្រឹទ្ធិសភា មកពីគណបក្ស សម រង្ស៊ី ជារឿង«នយោបាយ»។ លោក ណៃ វ៉ង់ដា អនុ​ប្រធានក្រុមអង្កេតការសិទ្ធមនុស្ស របស់សមាគមការពារសិទ្ធិមនុស្ស អាដហុក បានបដិសេធការចោទ​ប្រកាន់ របស់អាជ្ញាធរគ្រប់គ្រងដោយរដ្ឋាភិបាល ដែលលើកឡើងថា ការចាប់ខ្លួននោះ ព្រោះជាបទល្មើស​ជាក់​ស្តែង។

លោក ហុង សុខហួរ មន្ត្រីជាន់ខ្ពស់ របស់គណបក្សសង្គ្រោះជាតិ និងជាសមាជិកព្រឹទ្ធសភា មកពី​គណបក្ស សម រង្ស៊ី ដែលសកម្ម ក្នុងការទាមទាឲ្យពិនិត្យឡើងវិញ នូវផែនទីសម្រាប់ ការបោះបង្គោលព្រំដែន កម្ពុជា​-វៀតណាម​នោះ ត្រូវបានសាលាដំបូងរាជធានីភ្នំពេញ ចោទប្រកាន់ នូវបទល្មើសចំនួនបី ដោយឡែកៗ​ពី​​គ្នា។ បទល្មើសទាំងបី រួមមាន បទក្លែងឯកសារសាធារណៈ, ប្រាស់ឯកសារសាធារណៈក្លែង និងញុះញង់ ឲ្យ​​ប្រព្រឹត្ត​បទឧក្រិដ្ឋ ជាអាទិ៍ទាក់ទងនឹងផែនទី និងសន្ធិសញ្ញាបំពេញបន្ថែម ឆ្នាំ២០០៥ រវាងព្រំដែនកម្ពុជា​-វៀតណាម។ ករណីនេះ ត្រូវបានរដ្ឋាភិបាលកម្ពុជា រកឃើញតាមរយៈការបង្ហោះ នៅក្នុងវីដេអូមួយរបស់លោក លើទំព័រ​ហ្វេសប៊ុក របស់លោក សម រង្ស៊ី និងបានចាត់ទុកថា ជាបទល្មើសជាក់ស្តែង។

លោក វ៉ង់ដា បានអះអាងថា នោះមិនមែនជាបទល្មើស ជាក់ស្តែងទេ ហើយបើគេចង់បញ្ចប់រឿងនេះ គេត្រូវ​ដោះស្រាយ តាមបែប«នយោបាយ»។ លោកបានអះអាងថា ករណីនេះ មិនអាចបញ្ចប់ទៅ ដោយសមត្ថកិច្ច​របស់តុលាការនោះឡើយ។ លោក បានថ្លែងឲ្យដឹងថា៖ «មិនមែនជាបទល្មើសជាក់ស្តែង ដូច្នេះរឿងដែលថា ជាបទល្មើសព្រហ្មទណ្ឌ ដែលត្រូវដោះស្រាយដោយច្បាប់ (នោះ) មិនមានទេ។ រឿងនេះ ជារឿងនយោបាយ ត្រូវការដោះស្រាយ ដោយបញ្ហានយោបាយ។ បើថ្នាក់ដឹកនាំធំៗទាំងពីរ ងាកមករកវប្បធម៌សន្ទនាវិញ រឿង​នោះ​ត្រូវបានដោះស្រាយ។»

មន្ត្រីឃ្លាំមើលសិទ្ធិមនុស្សដដែល របស់សមាគមអាដហុក បានថ្លែងឲ្យដឹងទៀតថា៖ «វាមិនមែនជារឿងថ្មី​នោះ​ឡើយ វាជារឿងដែលកើតឡើង ដដែលជាដដែល។ (...) លោក ហុង សុខហួរ ជាអ្នកដែលចេះមើល និង​បក​ស្រាយ​លើបញ្ហាព្រំដេន និងផែនទី ដូច្នេះហើយការចាប់ខ្លួននេះ វាទាក់ទងនឹងការបកស្រាយ ទៅនឹងសន្ធិ​សញ្ញា​ព្រំដែននោះ។»

មិនអាចទាក់ទងមន្ត្រីរដ្ឋាភិបាល និងមន្ត្រីតុលាការ ដើម្បីប្រតិកម្មនឹងការលើកឡើង ខាងលើបានឡើយ។ ​ទង្វើ​របស់លោក ហុង​ សុខហួរ ដែលជាមន្ត្រីទទួលបន្ទុកខាងព្រំដែន របស់គណបក្ស​សង្គ្រោះ​ជាតិ ដែលបាន​បង្ហោះ​វីដេអូមួយ នៅលើទំព័រហ្វេសប៊ុកលោក សម រង្ស៊ីនោះ ត្រូវបានលោក ហ៊ុន សែន ចោទថាបានក្លែង​សន្ធិសញ្ញា ស្តីពីព្រំដែនកម្ពុជា-វៀតណាម ឆ្នាំ១៩៧៩ ដែលបានចុះហត្ថលេខា នៅពេលនោះ ដោយលោក ហេង សំរិន អគ្គលេខាធិការមជ្ឈឹមបក្ស នៃសាធារណៈរដ្ឋប្រជាមានិតកម្ពុជា និង​លោក ផាម វ៉ាន់ដុង នាយករដ្ឋមន្ត្រី នៃ​សាធារណរដ្ឋសង្គមនិយមវៀតណាម។ នាយករដ្ឋមន្ត្រីកម្ពុជា បានហៅ​ការ​បង្ហាញ​អក្សរ​មួយ​ឃ្លា ដែល​មាន​ក្នុងវីដេអូ ធ្វើអត្ថាធិប្បាយដោយលោក​ សុខហួរ ផ្ទាល់នោះ ថាជា​ទង្វើ​ដ៏​ទុរចរឹត និងជា«បទល្មើសជាក់ស្ដែង» ក្នុង​ការ​ក្លែង​សន្ធិសញ្ញា ឬ​ក្លែង​ឯកសារសាធារណៈ ដែលមានន័យស្មើរ​ នឹងទង្វើ«ក្បត់ជាតិ»។

សម្រាប់លោកមេធាវី សំ សុគង់ ដែលការពារក្ដីឲ្យលោក ហុង សុខហួរ បានបង្ហាញថា ការចោទប្រកាន់ ការ​ចាប់ខ្លួន និងការឃុំខ្លួនកូនក្តីលោក បន្តរហូតមកដល់ពេលនេះ បានស្តែងឲ្យឃើញថា ទាំងនោះជារឿង​នយោបាយ ព្រោះតែលោក ហុង សុខហួរ ជាអ្នកនយោបាយ។ លោកមេធាវី  ក្នុងកិច្ចសម្ភាសជាមួយ​អ្នក​សារព័ត៌មាន បានលើកឡើងថា បើមើលទៅលើទិដ្ឋភាពខាងក្រៅ នោះវាជារឿងដោយឡែក និងគិតថាជា​ការ​អនុវត្ត តាមនិតិវិធីច្បាប់។ តែលោកបានស្នើ ឲ្យសាធារណៈជន និងអ្នកច្បាប់ទាំងអស់ ធ្វើការពិចារណា មើល​ថា តើនេះជារឿងនយោបាយ ឬជារឿងនីតិវិធីច្បាប់ ដែលកំពុងតែអនុវត្តរាល់ថ្ងៃនេះ?

ឯសហមេធាវីការពារក្ដី លោកមេធាវី ជួង ជូងី វិញ បានចាត់ទុកថា ទាំងការសម្រេច​របស់សាលាដំបូងរាជធានី ទាំងការសម្រេច​របស់សភាស៊ើបសួរ​នៃសាលាឧទ្ធរណ៍ ដែលធ្វើការចោទប្រកាន់ និងបន្តការចោទប្រកាន់ លើ​កូនក្តីរបស់លោកនោះ មានលក្ខណៈខុស នឹងនីតិវិធីច្បាប់ដូចគ្នា។ លោកបញ្ជាក់ថា៖ «ការសម្រេចរបស់​សាលា​ឧទ្ធរណ៍ វាអយុត្តិធម៌ សម្រាប់កូនក្តីខ្ញុំ ដែលជាសមាជិកព្រឹទ្ធិសភាមួយរូប។ (...) ចំណាត់ការ របស់​សមត្ថកិច្ច​តាំងពីដើម រហូតដល់ចេញ សេចក្តីសម្រេចឃុំខ្លួននោះ គឺ ខុសនីតិវិធី ព្រោះមិនមែនជាបទល្មើស​ជាក់​ស្តែង។»៕