ការអនុវត្តច្បាប តាមបែប«ទាញកៅស៊ូ» នៃបុគ្គលអនុវត្តច្បាប់ ទាំងសាលាជម្រះក្តី ទាំងមន្រ្តីរដ្ឋាភិបាល​កម្ពុជា​ទាំងអស់ ត្រូវបានលោកមេធាវី ជួង ជូងី មេធាវីការពារក្ដីឲ្យលោក ហុង សុខហួរ ធ្វើការពន្យល់ និងឲ្យ​និយម​ន័យ លើបទល្មើសជាក់ស្តែងយ៉ាងខ្លីថា៖ «ដើម្បីកំណត់បទល្មើសជាក់ស្តែងបាន បទល្មើសនោះ ត្រូវដឹងពី​កន្លែង​ប្រព្រឹត្តិ។ ក្នុងអង្គហេតុនេះ សមត្ងកិច្ចចោទប្រកាន់ថា ប្រព្រឹត្តិនៅរាជធានីភ្នំពេញ។ (...) តែមិនបានដឹង​ថា នៅកន្លែងណាមួយពិតប្រាកដឡើយ។ មានត្រាច្បាប់ បានចង្អុលច្បាស់លាស់ណាស់ថា ប្រព្រិត្តិនៅ​កន្លែង​ណា​មួយ .... រកកន្លែងប្រព្រិត្តិ មិនបានច្បាស់លាស់។ អញ្ចឹងចំណាត់ការ តាំងពីដើមដល់ចប់ ខុស​ទាំង​អស់។»

ថ្លែងទៅកាន់អ្នកសារព័ត៌មានច្រើននាក់ នៅមុខសាលាឧទ្ទរណ៍ កាលពីថ្ងៃទី២ ខែកញ្ញា ឆ្នាំ២០១៥នេះ លោក ជួង ជូងី មេធាវីការពារក្ដីឲ្យលោក  ហុង សុខហួរ នៅតែអះអាងថា កូនក្តីរបស់លោក ពុំមានទោសនោះឡើយ ដោយលោកអះអាងថា សកម្មភាព និងទង្វើកូនក្តីរបស់ខ្លួន ពុំមានច្បាប់ចែង។

លោកមេធាវី ជូង ជូងី បានធ្វើការបកស្រាយថា៖ «អត់មានមូលដ្ឋានច្បាប់ណាចែងថា អំពើនេះ (ស្រាវជ្រាវអ្វី ពី​អ៊ីនធើណេត និងមកបង្ហោះ ក្នុងហ្វេសប៊ូក) ខុសច្បាប់ឡើយ។ (...) ច្បាប់មានមូលដ្ឋានរឹងមាំណាស់ ដរាប​អំពើ​ណា មិនមានជាន់លើច្បាប់ចែងទេ មិនអាចផ្តន្ទាទោស លើអ្នកប្រព្រឹត្តិនោះបានទេ។ (...) លុះណា​តែ​មាន​ច្បាប់ ពាក់ព័ន្ធនឹងការកំណត់ទោស នៃការបង្ហោះ តាមរយៈហ្វេសប៊ូកនេះ ចែងថាអំពើអញ្ចឹងខុស នោះ​ទើប​យើង​អាច​ផ្អែក តាមច្បាប់ហ្នឹងមកដាក់ទោសគាត់។»

ជាមួយនឹងការចោទប្រកាន់ ដោយគ្មានច្បាប់ដាក់ទោស ការចាប់ខ្លួន និងការឃុំខ្លួន តាំងពីដំណាក់កាល នៃ​កង​កម្លាំងចំរុះរបស់ជាតិ ឈានដល់ការសម្រេច របស់បុគ្គលចៅក្រម នៃសាលាដំបូងរាជធានីភ្នំពេញ ក្នុងនាម​លោក​ជាមេធាវី បានមើលឃើញថា ទាំងនោះមិនមែនជាល្មើសជាក់ស្តែងឡើយ ហើយក៏មិនមានច្បាប់ណា​មួយ ក្នុងការកំណត់ទោសនោះដែរ។ លោកស្នើឲ្យសាលាឧទ្ធណ៍ ធ្វើការសម្រេចដោះលែង និងលើកលែងការ​ចោទ​ប្រកាន់៕