មិនខុសពីរដ្ឋាភិបាលជប៉ុននោះទេ គណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ក៏បាន​លើកឡើងដែរថា ការជួយកែទម្រង់ការបោះឆ្នោតនៅកម្ពុជា អាចប្រព្រឹត្តទៅបានដោយរលូន និងមានប្រសិទ្ធភាព ចាំបាច់ត្រូវមានការសហការពីគណបក្សប្រជាជនកម្ពុជា និងគណបក្សសង្រ្គោះជាតិ ។

នៅពេលចាំផ្ដើមរាប់សន្លឹកឆ្នោត ដែលបោះឆ្នោតហើយនៅម៉ោង៣រសៀល ថ្ងៃទី២៨ខែកក្កដា ឆ្នាំ២០១៣ នៅមណ្ឌលវត្តវង្គត្តបូរី។ (រូបថត MONOROOM.info/ U.Bory)

ការបោះឆ្នោត - លោកគល់ បញ្ញា នាយកប្រតិបត្តិ គណៈកម្មាធិការដើម្បីការបោះឆ្នោតដោយសេរី និងយុត្តិធម៌​នៅ​កម្ពុជា បានពន្យល់ថា សហគមន៍អន្តរជាតិ មានការយកចិត្តទុកដាក់ពីបញ្ហាបោះឆ្នោតនៅកម្ពុជា ហើយការណ៍​ដែល​ជប៉ុនមកជួយកែទម្រង់ការបោះឆ្នោតនៅកម្ពុជា វាមិនត្រឹមតែអាចធានាថា មានការជ្រើសរើសរដ្ឋាភិបាលត្រឹមត្រូវ ឡើងមកដឹកនាំប្រទេសនោះទេ តែវាក៏អាចជួយបង្ការ ឬជាការដោះស្រាយវិបត្តិនយោបាយ ដែលកើតចេញពីការ​បោះឆ្នោតផងដែរ។

តបតាមការស្នើសុំរបស់ភាគីកម្ពុជា រដ្ឋាភិបាលជប៉ុន បានសម្រេចបញ្ជូនអ្នកជំនាញ​ការបោះឆ្នោតរបស់ខ្លួន មកកាន់​ប្រទេសកម្ពុជា ដើម្បីសិក្សាស្វែងយល់អំពីតម្រូវការផ្សេងៗ ជុំវិញការកែទម្រង់ការបោះឆ្នោតនៅកម្ពុជា ។ ការបញ្ជូន​ប្រតិភូជប៉ុន ស្របពេលដែលវិបត្តិនយោបាយ ដែលបណ្តាលមកពីការមិនឯកភាពគ្នា រវាងគណបក្សប្រជាជនកម្ពុជា និងគណបក្សសង្រ្គោះជាតិ បន្តអូសបន្លាយតាំងពីក្រោយការបោះឆ្នោតជ្រើសតាំងតំណាងរាស្រ្តឆ្នាំ២០១៣ ។

យោង​សេចក្តីប្រកាសព័ត៌មានរបស់ស្ថានទូតជប៉ុនប្រចាំកម្ពុជា ចុះថ្ងៃទី១៩ ខែឧសភា ឆ្នាំ២០១៤ បានឲ្យដឹងថា ប្រតិភូ​មន្ត្រីជំនាញរបស់ជប៉ុន១០រូបនឹង ជួបជាមួយមន្រ្តីសង្គមស៊ីវិលមានឯកទេសបោះឆ្នោត មន្រ្តីគណបក្ស​ប្រជាជន​កម្ពុជា និងមន្រ្តីគណបក្សសង្រ្គោះជាតិ រយៈ៥ថ្ងៃ ដោយផ្តើមពីថ្ងៃទី១៩ ដល់ថ្ងៃទី២៣ ខែឧសភា ដើម្បី​ពិភាក្សា​លើក​ការកែ​ទម្រង់ការបោះឆ្នោត។

ការកែទម្រង់ការបោះឆ្នោត ដែលគណបក្សប្រជាជនកម្ពុជា និងគណបក្សសង្រ្គោះជាតិ បើទោះជារហូតមកដល់​ពេល​នេះ មិនទាន់ឯកភាពគ្នាផ្នែកនយោបាយក៏ពិតមែន តែគណបក្សទាំងពីរ កន្លងមក បានបង្ហាចេនា ចង់ឲ្យ​សហគមន៍​អន្តរជាតិ ជាពិសេសប្រទេសជប៉ុន ជួយកែទម្រង់ការបោះឆ្នោតនៅកម្ពុជា ទាំងផ្នែកបច្ចេកទេស និងហិរញ្ញវត្ថុ។

ជុំវិញបញ្ហានេះ នាយកប្រតិបត្តិ គណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា លោកគល់ បញ្ញា បានបញ្ជាក់ប្រាប់ទស្សនាវដ្តីមនោរម្យ.អាំងហ្វូ នៅថ្ងៃទី២០ ខែឧសភា នេះថា៖ «គណបក្សទាំងអាច​ជជែកគ្នា​បន្ត ព្រោះការកែទម្រង់ការបោះឆ្នោត ក៏ជាបញ្ហាស្នូលនៃកិច្ចព្រមព្រៀង របស់គណបក្សទាំងពីរ ហើយគេអាចរក​ដំណោះស្រាយផ្សេងទៀត ទាំងការកែទម្រង់ និងបញ្ហានយោបាយ៕»