សកម្មភាពនៃតំណាងរាស្រ្ត ទាំងពីរគណបក្ស ដែលមានអសនៈក្នុងរដ្ឋសភា មានការកើនក្នុងរយៈពេលដូចគ្នា នា​ដើមអាណត្តិ ប៉ុន្តែមានតំណាងរាស្រ្តត្រឹមតែ៧០រូប ប៉ុណ្ណោះ ពីក្នុងចំណោម១២៣រូប ដែលបានចុះដល់​មូលដ្ឋាន។ នេះបើតាមការលើកឡើង របស់លោក ស៊ិន ទិត្យសីហា មន្រ្តីអង្កេតនៃអង្គការខុមហ្វ្រែល កាលពី​ព្រឹក​ថ្ងៃ​ទី២៧ ខែ​សីហា ឆ្នាំ២០១៥ ក្នុងសន្និសីទសារព័ត៌មានស្តីពី «របាយការណ៍សង្ខេប ឆរមាសលើកទី២ នៃការឃ្លាំ​មើល​រដ្ឋសភា និងតំណាងរាស្ត្រ នៃនីតិកាលទី៥ និងការដាក់បង្ហាញ ឲ្យប្រើប្រាស់កម្មវិធីឃ្លាំមើល សភា​តំណាង​រាស្ត្រ» រៀប​ចំ​ដោយ​អង្គការខុមហ្រ្វែល។

មន្ត្រីរបស់អង្គការឃ្លាំមើលការបោះឆ្នោតរូបនេះ បានលើកឡើងថា  ចំនួននេះថ្មីត្បិតតែកើនឡើង បើធៀប​ទៅ​នឹង​រយៈពេលដូចគ្នា ក្នុងឆ្នាំទីមួយ នីតិកាលទីប្រាំ។ លោក ស៊ិន ទិត្យសីហា បានថ្លែងឡើងថា៖  «ព្រោះតែ​តំណាង​រាស្រ្ត មកពីគណបក្សសង្គ្រោះជាតិ បានចូលរួមក្នុងរដ្ឋសភា ដែលជាហេតុធ្វើឲ្យតំណាងរាស្រ្តទាំងនោះ ងាយ​ស្រួលក្នុងការធ្វើសកម្មភាព ក្នុងនាមតំណាងរាស្រ្តសភា»។

ដោយឡែក សម្រាប់សកម្មភាព របស់គណកម្មការជំនាញ ទាំង១០ របស់រដ្ឋសភា បើទោះបីជាប្រាំគណៈកម្មការ ដឹកនាំដោយមន្រ្តី មកពីគណបក្សប្រជាជនកម្ពុជា និងប្រាំ ដឹកនាំដោយមន្រ្តី មកពីគណបក្សសង្គ្រោះជាតិ​ក៏​ដោយ ក៏ការងារនៃគណៈកម្មការទាំងនោះ បានបង្ហាញនូវភាពប្រសើរឡើង។

មន្រ្តីមួយរូបទៀត របស់អង្គការដដែល ទទួលបន្ទុកផ្នែកអង្កេត លោក កន សាវាង្ស  បានពន្យល់បន្ថែមថា ក្នុង​ចំណោម​គណៈកម្មការជំនាញទាំង១០នោះ យ៉ាងហោចណាស់ បានធ្វើសកម្មភាពចំនួន ៤៥លើក។ ក្នុង​ចំណោម​នោះ មាន«រដ្ឋមន្រ្តី» មកពីក្រសួង ស្ថាប័ននានា ត្រូវបានកោះហៅ មកសាកសួរផ្ទាល់មាត់ ចំនួន៨នាក់ ទាំង​នៅក្នុងវិមានរដ្ឋសភា និងនៅក្នុងក្រសួងសាមីនីមួយៗ។ លោកនិយាយថា ចំពោះសម័យប្រជុំ នៃរដ្ឋសភា ឆមាសទីមួយ ឆ្នាំទី២ នីតិកាលទីប្រាំនេះ មានចំនួន១០លើក។ ក្នុងនោះ មានប្រជុំពេញអង្គ សាមញ្ញមួយលើក និង​វិសមញ្ញមួយលើក។ កិច្ចប្រជុំនោះ មានចំនួ១៥ របៀបវារៈ ដែលត្រូវបានដាក់ឲ្យពិភាក្សា និងអនុម័ត។ លោក​បន្តថា សម្រាប់តំណាងរាស្រ្ត ដែលបានឡើងដេញដោល (បញ្ចេញមតិ) មានចំនួនត្រឹមតែ២៧រូប និងចំណាយ​ពេល ត្រឹមតែ៥៥០នាទីប៉ុណ្ណោះ។

ឆ្លងតាមរយៈពេល និងចំនួនតំណាងរាស្រ្ត ដែលឡើងបញ្ចេញមតិនេះ ត្រូវបានរបាយការណ៍ របស់អង្គការ​ខុមហ្រ្វេល បញ្ជាក់ទៀតថា បានធ្វើឲ្យបាត់បង់ នូវគុណភាពនៃ«ការពិភាក្សា» ព្រោះតែភាពប្រញាប់​ប្រញាល​នោះ។ ខុមហ្វ្រែល បានបង្ហាញនូវឧទាហរណ៍មួយចំនួន មកបញ្ជាក់ថា៖ «ការពិភាក្សា និងអនុម័ត សេចក្តី​ស្នើ​ច្បាប់ ស្តីពីការរៀបចំ និងការប្រព្រឹត្តិទៅនៃគណកម្មាធិការជាតិ រៀបចំការបោះឆ្នោត, សេចក្តីស្នើច្បាប់ស្តីពី ការ​បោះឆ្នោតជ្រើសតាំងតំណាងរាស្រ្ត ដែលមានតំណាងរាស្រ្ត លោក សម រង្ស៊ី ម្នាក់គត់ឡើងបញ្ចេញមតិ ហើយ​ក៏​មិនបានសំដៅ លើការកែប្រែនៃមាត្រាណាមួយដែរ ក្រៅពីការសសើរ នូវកិច្ចប្រឹងប្រែងរបស់គណបក្សទាំងពីរ និង​ការហាមឃាត់តំណាងរាស្រ្តផ្សេងទៀត ឡើងបញ្ចេញមតិនោះ។»

លោក កន សាវាង្ស តំណាងឲ្យអង្គការខុមហ្រ្វែល បានចាត់ទុកសកម្មភាព នៃការហាមឃាត់តំណាង​រាស្រ្ត​ផ្សេង​ទៀត មិនឲ្យបញ្ចេញមតិ ក្នុងកិច្ចប្រជុំសភានោះ ជាទង្វើមួយមិនល្អ ដែលផ្ទុយនឹងគោលបំណង នៃកិច្ចប្រជុំសភា ក្នុងនាមជាប្រធានក្រុមមតិភាគតិច។ លោកបានថ្លែងឡើងថា៖ «កិច្ចប្រជុំសភា អ្នកតំណាងរាស្រ្ត គួរធ្វើការ​ពិភាក្សា សួរដេញដោល ដើម្បីឈានទៅការស្នើឲ្យមានការកែសម្រួល ឬធ្វើការបកស្រាយនូវខ្លឹមសារ មួយចំនួន​ដែល​មិនច្បាស់លាស់ជាដើម។»៕