បង្គោលភ្លើងធំមួយដើម នៅជិតផ្លូវ ១៩៩ ត្រូវបានឡានកុងទ័នឺបុក បុកឲ្យទ្រេត កាលពីយប់ថ្ងៃទី២៣ រហូត​មក​ដល់ថ្ងៃទី២៦នេះ ស្ទើដួលដល់ដី តែគេនៅមិនទាន់ឃើញអាជ្ញាធរណា មកជួយអន្តរាគមន៍ទេ។ ស្រ្តីម្នាក់​ដែល​ជាម្ចាស់ផ្ទះ លេខ១៦ នៅជិតផ្លូវបង្កោលភ្លើង បានថ្លែងត្អូញត្អែរ ពីបញ្ហានេះ ដោយអ្នកស្រីបារម្ភពីសុវត្តិភាព​កូន​ចៅ នៅពេលចេញចូលផ្ទះ។ ម្យ៉ាងទៀត អ្នកស្រីបារម្ភខ្លាចមានបញ្ហា ដល់អ្នកធ្វើដំណើរនៅផ្លូវ តាមមុខផ្ទះ​អ្នក​ស្រី ព្រោះបង្កោលនេះ ទ្រេតមកបន្តិចម្តងៗ ស្ទើធ្លាក់ដល់ដីទៅហើយ។ អ្នកស្រីបន្ថែមទៀតថា មាន​សមត្ថកិច្ច​ជិះ​តាមផ្លូវនេះ ច្រើនដងណាស់ តែហាក់មិនយកចិត្តទុកដាក់ ពីបញ្ហារបស់ប្រជាពលរដ្ឋនោះទេ ឬចាំដល់​មាន​បញ្ហា បានចុះមកដោះស្រាយ។

តាមការបញ្ជាក់ របស់អ្នករត់ម៉ូតូឌុបម្នាក់ នៅផ្លូវ ១៩៩ កែងផ្លូវ៣១៨ ក្នុងសង្កាត់ទួលស្វាយព្រៃទី១ ខណ្ឌ​ចំកាមន រាជធានីភ្នំពេញ បានឲ្យដឹងថា ហេតុការណ៍ឡានកុងទ័រនឺ បុកបង្កោលភ្លើងនេះ បានកើត​ឡើងអស់​រយៈពេលបីថ្ងៃ មកហើយ ពេលគឺតាំងពីថ្ងៃទី២៣ ខែសីហាមកម្លេះ។ លោកបន្តទៀតថា រហូតមកដល់ថ្ងៃទី២៦ ខែសីហា នៅមិនទាន់មានសមត្ថកិច្ចមូលដ្ឋាន ឬអាជ្ញាធរអគ្គិសនី ណាមួយមកដោះស្រាយ បញ្ហាបង្កោល​ភ្លើង​ជិតបាក់នេះទេ។

ក្តីបារម្ភរបស់ប្រជាពលរដ្ឋទាំងនេះ មិនមែនគ្មានហេតុផលនោះឡើយ ដោយសារបច្ចុប្បន្ននេះ ស្ថានភាព​បង្កោលភ្លើង ដែលរុំព័ទ្ធទៅដោយខ្សែរភ្លើង ជាច្រើនខ្សែរ នៅមានសភាពទ្រេតនៅឡើយ នៅប្រមាណជាពីរ​ទៅបីម៉ែត្រប៉ុណ្ណោះ នឹងធ្លាក់ដល់ដីប៉ះពាល់ ដល់អ្នកធ្វើដំណើរមិនខាន។ ទស្សនាវដ្តីមនោរម្យ.អាំងហ្វូ មិន​អាច​ទាក់ទងសុំការបំភ្លឺ ពីអាជ្ញាធរមូលដ្ឋានខាងលើ ពីបញ្ហាក្តីបារម្ភរបស់ពលរដ្ឋនេះបានទេ ដោយទូរស័ព្ទសុំ​ទាក់​ទង មិនមានការឆ្លើយតប និងមិនអាចទាក់ទងបាន៕