ករណីអគ្គីភ័យនេះ បានកើតឡើង នៅថ្ងៃទី ២៧ ខែ សីហា ឆ្នាំ២០១៥ វេលាម៉ោង ២០និង៣០ នាទីយប់ បាន​បង្ក​ការភ្ងាក់ផ្អើល ដល់ប្រជាពលរដ្ឋ និងកម្មករនៅម្តុំនោះទាំងយប់។ មូលហេតុ ដែលបណ្តាលឲ្យមានអគ្គីភ័យ ឆេះ​រោងចក្រ ដោយសារតែការផ្ទុះចរន្តអគ្គិសនី នៅក្នុងរោងចក្រ ដែលមាន ទីតាំងនៅ តាមផ្លូវលំ ក្នុងភូមិ​ដំណាក់​ធំ​៣ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។

នៅពេលអគ្គីភ័យកំពុងឆាបឆេះ រថយន្តពន្លត់ចំនួន៣គ្រឿង បានទៅជួយពន្លត់ ប៉ុន្តែភាគីខាងរោងចក្រ មិន​អនុញ្ញាត​ឲ្យចូលទៅពន្លត់ភ្លើងទេ លុះពេលចរចាជាមួយគ្នារួច ទើបខាងរោងចក្រ ឲ្យរថយន្តពន្លត់អគ្គីភ័យ ចូល​ទៅពន្លត់ភ្លើង។ ដោយសារតែអគ្គីភ័យនោះឆាបឆេះ មានលក្ខណះតិចតួច ទើបប្រើរថយន្តបាញ់ទឹក អស់តែមួយ​គ្រឿងប៉ុណ្ណោះ។ នៅក្នុងហេតុការណ៍ បណ្តាលឲ្យខូចខាតម៉ាស៊ីនចំនួន ៤គ្រឿង និង​ក្រណាត់​មួយ​ចំនួន ចំណែកឯមនុស្សវិញ មិនមានរងរបួសទេ។

លោក សេង ស៊ាញ ចៅសង្កាត់ស្ទឹងមានជ័យ ដែលមានវត្តមាន នៅកន្លែងកើតហេតុដែរ មិនបានឆ្លើយនឹងសំនួរ របស់ទស្សនាវដ្ដីមនោរម្យ.អាំងហ្វូនោះឡើយ។ លោកគ្រាន់តែនិយាយថា៖ «មិនមានអ្វី ត្រូវឆ្លើយជាមួយ អ្នក​សារព័ត៌មាន​ឡើយ» មុននឹងលោក បានដើរចេញបាត់តែម្ដង។

បើតាមអ្នកមីង ណារី មានអាយុ៤៣ឆ្នាំ ស្នាក់នៅភូមិដំណាក់ធំ៣ សង្កាត់ស្ទឹងមានជ័យ ខណ្ឌមានជ័យ បាន​ឲ្យ​ដឹងថា គាត់មានការភ័យខ្លាច នៅពេលដែលឃើញ​អណ្តាតភ្លើងឆាបឆេះ ហើយភាគីខាងរោងចក្រ មិនឲ្យ​រថយន្ត​ពន្លត់អគ្គីភ័យ​ ចូលពន្លត់ទៀត។ នៅពេលកើតហេតុ គាត់យកតែការបូបមួយ ជាប់ខ្លួនតែប៉ុណ្ណោះ ចំណែករបស់​របរផ្សេងទៀត គាត់ទុកចោលក្នុងបន្ទប់ជួល គាត់គិតឲ្យតែរួចជីវិតទេ។

ចំណែកឯលោក សឿន វិទូ មានអាយុ ២២ ឆ្នាំ ជាកម្មករផ្នែកដេរ នៅក្នុងរោងចក្រកើតហេតុ និងមានកន្លែង​ស្នាក់​នៅ ជាប់រោងចក្រនេះ បាននិយាយថា ដំបូងឡើយ លោកមានការភិតភ័យដែរ តែក្រោយ លោកបានប្រមូល​អីវ៉ាន់​ចេញ ពីបន្ទប់ជួលអស់ ទើបលែងភ័យព្រួយ ពីការឆេះរាលដាល ពីរោងចក្រនោះ។

អគ្គិភ័យឆេះរោងចក្រនេះ ត្រូវបានភាគីរោងចក្រ និងចៅសង្កាត់ព្យាយាមលាក់បាំង ដោយមិនផ្តល់ការសំភាស និងមិនអនុញ្ញាត ឲ្យថតរូបភាព ក្នុងរោងចក្រនោះឡើយ គឺឲ្យតែថតរូបពីខាងក្រៅរោងចក្រ តែប៉ុណ្ណោះ៕