រូបភាពនៅក្នុងវីដេអូ ជាសក្ខីភាពដ៏សំខាន់មួយ បង្ហាញថា អ្នកប្រើប្រាស់ទ្រូងថ្នល់ ដ៏អន្ទ្រើសៗ នៅក្នុងប្រទេស​កម្ពុជា ជាពិសេសអ្នកដែលមានប្រាក់ ទិញរថយន្ដទំនើបជិះ បើកបរមិនគោរពច្បាប់ចរាចរណ៍ និងមិនគោរព អ្នក​ប្រើប្រាស់ទ្រូងថ្នល់ផ្សេងទៀតទេ។ នេះ គេនៅមិនទាន់និយាយដល់ ថាមានរថយន្ដទំនើបបើកហើយ ថែម​ទាំងមានបុណ្យស័ក្ដិ មានអំណាចនោះផង។

អ្នកបើករថយន្ដ ឡង់គ្រីសើរ ដ៏ទំនើប ដែលទំនងជាមន្ត្រីយោធាមួយរូបនេះ បានបង្កគ្រោះថ្នាក់ចរាចរណ៍ នៅ​ម្តុំរង្វង់មូលចោមចៅ តែមិនបានឈប់រថយន្ត​ ចុះដោះស្រាយបញ្ហានោះទេ បែរជាព្យាយាមបើកគេច និងបាន​បុករះម៉ូតូរថយន្ត របស់អ្នកដំណើរផ្សេងទៀត យ៉ាងធ្ងន់ធ្ងរ។ នេះបើតាមការថ្លែងឲ្យដឹង របស់មន្រ្តី​នគរបាល​ប៉ុស្តិ៍​ចោមចៅ។

ដូចនៅក្នុងរូបភាព បានបង្ហាញច្បាស់ទៀតថា ក្រុមពលរដ្ឋ ដែលបានឃើញហេតុការណ៍ បាននាំគ្នាជិះ​ម៉ូតូ​ដេញតាម ដើម្បីបង្ខំឲ្យរថយន្តឈប់ និងដោះស្រាយបញ្ហា។ ពលរដ្ឋខ្លះ បានយកដុំថ្មគប់ទៅលើ​រថយន្ត​ទំនើប​នេះ ថែមទៀតផង។

បន្ទាប់ពីបានគេចខ្លួន ជាច្រើននាទីមិនបានសម្រេច ម្ចាស់រថយន្ដបង្ក បានឈប់រថយន្ដស្លាកលេខ​«ខ.ម»​របស់​ខ្លួន និងត្រូវបានក្រុមពលរដ្ឋ ព្រលះម្នាក់មួយដៃ មុននឹងបញ្ជូនជនបើកបរយ៉ាងព្រហើនេះ ទៅឲ្យ​នគរបាល​ប៉ុស្តិ៍​ចោមចៅ ដើម្បីធ្វើការដោះស្រាយ៕