ប្រធានស្តីទីរបស់គណបក្សសង្រ្គោះជាតិ លោក កឹម សុខា បានលើកឡើងថា ប្រទេសកម្ពុជាគម្បីបង្កើត​មជ្ឈមណ្ឌល​កត់ត្រា ព្រឹត្តិការណ៍ឧក្រឹដ្ឋកម្មទាំងឡាយ ដែលបានកើតឡើងនៅកម្ពុជា ចាប់ពីឆ្នាំ១៩៩៣។

លោក កឹម សុខា ថ្លែងក្នុងពិធីរំលឹកខួបលើកទី១៧ នៃការវាយប្រហារថ្ងៃទី៥-៦ កក្កដា ឆ្នាំ១៩៩៧។ (រូបថត MONOROOM.info/ S. Tith)

៥-៦ កក្កដា ១៩៩៧- បើតាមលោក កឹម សុខា អនុប្រធាន និងជាងប្រធានស្តីទីគណបក្សសង្គ្រោះជាតិ បាន​ពន្យល់​ថា ដើម្បីបញ្ចៀស​ករណីសម្លាប់មនុស្ស ក្រៅប្រព័ន្ធច្បាប់ របស់អ្នកមានអំណាច ដើម្បីការពារអំណាចរបស់ពួកគេ ប្រទេសកម្ពុជា ចាំ​បាច់ត្រូវបង្កើតឲ្យមាន​មជ្ឈមណ្ឌលកត់ត្រាប្រវត្តិសាស្រ្ត ឧក្រិដ្ឋកម្មដែលបានកើតឡើង។ លោក​បានបន្ថែមថា ការ​កត់ត្រា​ប្រវត្តិ​សាស្រ្តឧក្រិដ្ឋកម្ម ក៏ជាការបង្ការកុំឲ្យមានឧក្រិដ្ឋកម្មជាថ្មី ហើយក៏អាចជាភស្តុតាង ដើម្បីនាំខ្លួនអ្នក​មាន​កំហុសក្នុងពេលកាន់អំណច យកទៅកាត់ទោសនៅពេលខាងមុខ។

ថ្លែងទៅកាន់អ្នកគាំទ្រ និងអ្នកសារព័ត៌មាន នៅទីស្នាក់ការកណ្តាលគណបក្ស ក្នុងពិធីរម្លឹកខួប ថ្ងៃធ្វើរដ្ឋប្រហារទី ៥-៦ ខែកក្កដា ឆ្នាំ១៩៩៧ ដ៏បង្ហូរឈាមគ្នា រវាងគណបក្សប្រជាជនកម្ពុជា និងគណបក្សហ៊្វុនស៊ីនប៉ិច លោកកឹម សុខា បានថ្លែងទៀតថា៖ «ខ្ញុំនឹងស្នើឲ្យបង្កើតមជ្ឈមណ្ឌលកត់ត្រា ព្រឹត្តិការណ៍ឧក្រឹដ្ឋកម្មទាំងឡាយ នៅកម្ពុជា​គិត​ចាប់ពីឆ្នាំ១៩៩៣ ក្នុងគោលបំណងបញ្ចប់វប្បធម៌និទណ្ឌភាព (វប្បធម៌រួចទោស) ក្នុងប្រទេសកម្ពុជា។»

គិតមកដល់ពេលនេះមានរយៈពេល១៧ ឆ្នាំហើយដែលព្រឹត្តិការណ៍វាយប្រហារប្រដាប់អាវុធ កាលពីឆ្នាំ១៩៩៧ កណ្តាលរាជធានីភ្នំពេញ រវាងកងកម្លាំងគាំទ្រគណបក្សប្រជាជនកម្ពុជា ទល់នឹងកងកម្លាំងគាំទ្រ​គណបក្ស​ហ៊្វុនស៊ិនប៉ិច ដែលកាលនោះស្ថិតក្រោមបញ្ជារបស់ លោក ហ៊ុន សែន នាយករដ្ឋមន្ត្រីទី២ និងសម្តេចក្រុមព្រះ​ នរោត្តម រណឫទ្ធិ នាយករដ្ឋមន្ត្រីទី១។ ព្រឹត្តិការណ៍ឆ្នាំ១៩៩៧ ត្រូវបានគណបក្សប្រជាជនកម្ពុជា និងគណបក្ស ហ្វុនស៊ីនប៉ិច ចោទប្រកាន់ដាក់គ្នា និងឆ្លើយយកត្រូវតែរៀងៗខ្លួន។

តែសម្រាប់លោក ញឹក ប៊ុនឆៃ បច្ចុប្បន្នជាអគ្គលេខាធិការគណបក្សហ៊្វុនស៊ិនប៉ិច បានពន្យល់ប្រាប់ប្រព័ន្ធព័ត៌មាន ក្នុងស្រុកកាលពីពេលថ្មីៗនេះថា ព្រឹត្តិការណ៍ថ្ងៃទី៥.៦ ខែកក្កដា ឆ្នាំ១៩៩៧ គឺមិនមែនជាការដណ្តើម​អំណាចគ្នា​នោះទេ តែជាសកម្មភាពមួយចំនួន ដែលធ្វើឲ្យមានការមិនទុកចិត្តគ្នា នៅក្នុងរដ្ឋាភិបាល ហើយធំបំផុតការ​មិនជឿ​ទុកចិត្តគ្នា នៅក្នុងរដ្ឋាភិបាលចម្រុះបានឈានដល់ការផ្ទុះអាវុធ។

ចំពោះគណបក្សសង្គ្រោះជាតិ ដែលបានរៀបចំពិធីបង្សុកូល គោរពវិញ្ញាណក្ខន្ធដល់អ្នកដែលបាត់បង់ជីវិត ក្នុង​ព្រឹត្តិការណ៍ប៉ះទង្គិចគ្នា កាលពីថ្ងៃទី៥-៦ ខែកក្កដា ឆ្នាំ១៩៩៧ នៅថ្ងៃទី៥ ខែកក្កដា ឆ្នាំ២០១៤ នេះ ត្រូវបានលោក ញឹក ប៊ុនឆៃ អគ្គលេខាធិការគណបក្សហ៊្វុនស៊ិនប៉ិច ជាគណបក្សសម្ព័ន្ធមិត្តរបស់គណបក្សប្រជាជនកម្ពុជា ក្នុង​ពេលបច្ចុប្បន្ន បានអះអាងថា ជាការកេងចំណេញនយោបាយប៉ុណ្ណោះ៕