អនុប្រធានគណបក្សសង្រ្គោះជាតិ លោក កឹម សុខា បានចោទប្រកាន់ គណបក្សប្រជាជនកម្ពុជា ថាកំពុងបង្វែរ​ស្ថានការណ៍​​នយោបាយ ទៅជាស្ថានការណ៍ផ្សេង ដើម្បីពង្វៀងការចាប់អារម្មណ៍របស់មតិមហាជន ព្រោះគណបក្ស​ប្រជាជនកម្ពុជា គ្មាន​ឆន្ទៈ​ពិតប្រាកដ ក្នុងការដោះស្រាយភាពជាប់គាំងផ្នែកនយោបាយ ជាមួយគណបក្ស​សង្រ្គោះ​ជាតិ ដូចការអះអាងនោះទេ។

លោក សម រង្ស៊ី (ខាងស្ដាំ) និងលោក កឹម សុខា នៅក្នុងសន្និសីទការសែត ថ្ងៃទី៩ ខែមិថុនា ឆ្នាំ២០១៤។ (រូបថត MONOROOM.info/ U. Bory)

នយោបាយ - លោក កឹម សុខា អនុប្រធានគណបក្សសង្រ្គោះជាតិ ក្នុងសន្និសីទការសែទ នៅថ្ងៃទី០៩ ខែមិថុនា ឆ្នាំ២០១៤ នេះ​បានពន្យល់ពី ហេតុការណ៍កើតឡើងនៅខេត្តឧត្តរមានជ័យ ថាជាចេតនាគិតទុកជាមុនយ៉ាងព្រៃផ្សៃ និងឈានទៅផ្តាច់ផ្តិល​អាយុ​ជីវិតថ្នាក់ដឹកនាំរបស់គណបក្សសង្រ្គោះជាតិ ក្រោមការបញ្ជារដ្ឋាភិបាល គ្រប់គ្រង​ដោយ​គណបក្សប្រជាជនកម្ពុជា។

អនុប្រធាគណបក្សប្រឆាំង ដែលពូកែវោហាស័ព្ទស្រាប់ បានបញ្ជាក់ថា៖ «រឿងនេះមិនមែននយោបាយធម្មតាទេ តែវាជារឿងធ្ងន់ធ្ងរ គេប៉ុនប៉ងរហូតដល់អាយុជីវិត។ យើងកំពុងចរចារ ដាក់នៅស្ពានក្បាលថ្នល់ និងផ្លូវវេងស្រេង។ (...) ពីរបីថ្ងៃមុន យើងផ្តើមប្តូរ​ឯកសារដើម្បីបន្តចរចា។​ (...) គណបក្សប្រជាជនមានឆន្ទៈចរចាពិតប្រាកដ ឬអត់? ចង់​ដោះស្រាយ​បញ្ហា ឬអត់? អញ្ចឹងសូមមតិ​ជាតិ និងអន្តរជាតិ ពិចារណាទៅថា ស្ថានភាពស្រុកខ្មែរធ្លាក់មកដល់​ភាព​ធ្ងន់ធ្ងរ គ្រោះថ្នាក់ណាស់ គឺបក្សប្រជាជនអស់ក្បួន ហើយ​យកក្បួនខ្មែរក្រហមមកលេង។»

គណបក្សសង្គ្រោះជាតិនៅថ្ងៃទី០៨ ខែមិថុនា ឆ្នាំ២០១៤ បានសម្រេចលុបចោល កម្មវិធីវេទិកាសាធារណៈរបស់ខ្លួន ដែលគ្រោង​ធ្វើនៅទីរួមស្រុកអន្លង់វែង ខេត្តឧត្តរមានជ័យ។ ការសម្រេចលុបចោលកម្មវិធីវេទិកាសាធារណៈ ត្រូវបាន​គណបក្សសង្រ្គោះជាតិ អះអាងថា ដោយសារមានការរំខាន និងការបំភិតបំភ័យពីក្រុមយោធាស្លៀកពាក់ស៊ីវិល ក្រោម​ការគ្រោងទុក​ពីគណបក្ស​ប្រជាជន​កម្ពុជា។

លោក ប៉ុល ហំ មន្រ្តីជាន់ខ្ពស់គណបក្សសង្រ្គោះជាតិ ដែលស្ថិតនៅក្នុងហេតុការណ៍ បានអត្ថាធិប្បាយនៅក្នុងសន្និសីទ​ការសែត​​ថ្ងៃទី៩ ខែមិថុនាដដែលថា ក្រុមអ្នករំខានដល់ក្រុមអ្នកតំណាងរាស្រ្តរបស់គណបក្សសង្រ្គោះជាតិ មិនមែនជា​ប្រជាពលរដ្ឋ​ធម្មតាទេ ព្រោះពួកគេមានអាវុធ វិទ្យុទាក់ទង ជាភេទប្រុសទាំងអស់ មានរថយន្តជាច្រើនគ្រឿង និង​បង្ហាញ​ឥរិយាបថកាចសាហាវ។

តែសម្រាប់មន្រ្តីជាន់ខ្ពស់របស់រដ្ឋាភិបាល និងគណបក្សប្រជាជនកម្ពុជា រហូតមកដល់ពេលនេះ បានអះអាង​ជាបន្ត​បន្ទាប់ថា កម្លាំង​ដែលបានដាក់ពង្រាយក្បែរវេទិការសាធារណៈរបស់គណបក្សង្រ្គោះជាតិ ជាកម្លាំងរក្សាសុវត្ថិភាព និងសណ្តាប់ធ្នាប់សាធារណៈ ហើយគណបក្សប្រជាជនកម្ពុជា នៅតែប្រកាន់គោលជំហរចរចា ជាមួយគណបក្ស​សង្រ្គោះ​ជាតិ៕