នាង អាលីសុន ប៉ាគ័រ (Alison Parker) អាយុ២៤ឆ្នាំ និងលោក អាដាម វ័ដ (Adam Ward) អាយុ២៧ឆ្នាំ ត្រូវ​បានបាញ់សម្លាប់ នៅថ្ងៃទី២៦ ខែសីហានេះ ខណៈអ្នកទាំងពីរកំពុង ធ្វើការផ្សាយបន្តផ្ទាល់ ពីកិច្ចសម្ភាសមួយ សម្រាប់ទូរទស្សន៍ក្នុងតំបន់ «WDBJ7» (ជាផ្នែកមួយ នៃបណ្ដាញទូរទស្សន៍ CBS) ប្រចាំរដ្ឋវៀជីនី។ អ្នកទាំងពីរ​បានស្លាប់ភ្លាមៗ នៅពេលបាញ់ប្រហារនោះ។

ក្រុមបុគ្គលិកនៃទូរទស្សន៍ «WDBJ7» ដែលកំពុងធ្វើការផ្សាយផ្ទាល់ បានស្ថិតនៅក្នុងហេតុការណ៍នេះ តាំងពី​ដើម​រហូតដល់ចប់។ ពួកគេបានស្ដាប់ឮ នូវស្នូរផ្ទុះកាំភ្លើង និងសម្រែករបស់មិត្តរួមអាជីពរបស់ខ្លួន និងទីបំផុត​ទៅ ពួកគេបានដឹងថា នេះជាហេតុការណ៍ដ៏ក្ដុកក្ដួល ជាងពេលណាៗទាំងអស់។

នាយកទូរទស្សន៍ លោក Jeffrey Marks បានពន្យល់ថា៖ «ជនប្រដាប់អាវុធម្នាក់ ដែលគិតថា ជាបុរស បាន​ចូល​មកក្បែរ កន្លែងដែលពួកគេកំពុងធ្វើព័ត៌មាន ហើយបានបាញ់៦ទៅ៧គ្រាប់។ យើងបានស្ដាប់ឮសម្លេងស្រែក ប៉ុន្តែ​បន្ទាប់មកបានស្ងាត់ឈឹង ខណៈកាម៉េរ៉ាបានធ្លាក់ នៅនឹងដី។»

ជនខ្មាន់កាំភ្លើង ត្រូវបានស្គាល់អត្តសញ្ញាណភ្លាមៗ

បើរូបភាពនៃការបាញ់ប្រហារ ត្រូវបានស្ថានីយ៍ទូរទស្សន៍ កាត់មិនឲ្យឃើញតទៅទៀត តែជនខ្មាន់កាំភ្លើងវិញ បានថតឈុតឆាក ដែលខ្លួនបានធ្វើនេះដោយផ្ទាល់ ហើយបានយកមកបង្ហោះ នៅលើបណ្ដាញសង្គម។ ជន​នេះ ដែលគេស្គាល់ឈ្មោះ «Bryce Williams» ជាអតីតបុគ្គលិក របស់ស្ថានីយ៍ទូរទស្សន៍នេះដែរ។ Bryce Williams ត្រូវបានបណ្ដេញចេញពីការងារ តាំងពី២ឆ្នាំមុន។ បើតាមសេចក្ដីសន្និដ្ឋានភ្លាមៗ របស់ក្រុមអ្នក​ស៊ើប​អង្កេត បានឲ្យដឹងថា ជននេះទំនងជាបានធ្វើសកម្មភាពសងសឹក ដោយសារខ្លួនចេះតែគិតថា បានរងគ្រោះ នឹង​ការ​រើសអើងពូជសាសន៍ និងពណ៌សម្បុរ។

បន្ទាប់ពីត្រូវបាននគរបាល តាមប្រមាញ់តាមរថយន្ដ ជនខ្មាន់កាំភ្លើងទំនងជាបានបាញ់សម្លាប់ខ្លួន នៅក្នុង​រថយន្ដ​នោះ ប៉ុន្តែរបួសបានធ្លាក់កម្រិតធ្ងន់ធ្ងរ ដែលធ្វើឲ្យជនសង្ស័យបានស្លាប់ ក្នុងពេលបន្ទាប់មក។

ហេតុការណ៍ បានបង្កឲ្យមាន ការជជែកវែកញែក ជាថ្មីទៀត ទាក់ទងនឹងការប្រើប្រាស់កាំភ្លើងជាតិផ្ទុះ ដោយ​សេរីនៅប្រទេសមហាអំណាចមួយនេះ។ សេតវិមានបានប្រតិកម្មភ្លាមៗ ដោយធ្វើការរំលឹក ទៅសភា​អាមេរិក ឲ្យបោះឆ្នោតសម្រេច លើអត្ថបទច្បាប់ ដែលអនុញ្ញាត ឲ្យអាជ្ញាធរធ្វើការត្រួតពិនិត្យ អាវុធជាតិផ្ទុះ​ទាំង​ឡាយ នៅក្នុងប្រទេស៕