ពលរដ្ឋដែលរស់នៅ ក្នុងភូមិគោកចំបក់ សង្កាត់ចោមចៅ ខណ្ឌពោធ៍សែនជ័យ រាជធានីភ្នំពេញ បានភ្ញាក់​ផ្អើល​ឡើង កាលពីវេលាម៉ោង ៨ និង១៥ នាទីព្រឹក ថ្ងៃអាទិត្យទី ២៦ ខែកក្កដា ឆ្នាំ ២០១៥ នៅចំណុចដីឡូដ៍​មួយ​កន្លែង នៅខាងជើងឈាងខាងលិច នៃវត្តអង្គតាម៉ិញ។ ពលរដ្ឋម្នាក់​បានចូល ទៅរកកន្លែងបត់ជើងតូច នៅទី​នោះ ក៏ស្រាប់តែប្រទះឃើញ ក្រណាត់ជាកញ្ចប់រំសាកសពនេះ ហើយបានផ្អើលឆោឡោ និងបានរាយការណ៍ ដល់អាជ្ញាធរឲ្យចុះអង្កេតភ្លាម។

ប្រភពពីកន្លែងកើតហេតុ បានបញ្ជាក់ ក្រោយពេល មន្ត្រីជំនាញធ្វើកោសល្យវិច័យ លើសាកសពខាងលើថា សាក​សពជាស្រ្តីរងគ្រោះ ដែលមានអាយុប្រមាណ២៨ឆ្នាំ និងគ្មានសម្លៀកបំពាក់ជាប់ខ្លួននេះ ត្រូវបានចងរំ ក្នុង​អង្រឹង​នីឡុងពណ៍ខ្មៅមួយ ជាបួនកង់ត្រង់៖ ក ចង្កេះ ជង្គង់ ជើង។

ប្រជាពលរដ្ឋ បានបញ្ជាក់បន្ថែមថា សាក​សព​មិនស្គាល់អត្តសញ្ញាណ ទំនងជាអ្នកធ្វើការ នៅក្នុង​ហាង​ខារ៉ាអូខេ ឬមួយអ្នកកោសជប់។​ នៅលើក្រចកដៃ របស់​សាកសព មានលាបថ្នាំក្រចក ពណ៍ក្រហមលាយឆ្នូតស រួមទាំង​សក់​ពណ៍ក្រហម ត្រឹមស្មារ។

ពេលស្រាយសាកសព ដោយមន្ត្រីជំនាញសង្កាត់ចោមចៅ និងការធ្វើកោសល្យវិច័យនោះ ក្រុមសមត្ថកិច្ច​បាន​បញ្ជាក់ថា សាកសពមានរបួស នៅត្រង់ក្បាលធ្ងន់ធ្ងរ មានហូរឈាម។

មន្ត្រីដដែល បានសន្និដ្ឋានជាបឋមថា សាកសពត្រូវបានគេរំលោភ រួចសម្លាប់ ហើយត្រូវបានយកមកផ្លុងចោល នៅដីឡូដ៍ ដែលមានស្មៅក្រាស់ ក្នុង​ទីតាំងខាងលើ។ បច្ចុប្បន្នមន្រ្តីមូលដ្ឋាន បាននឹងកំពុងផ្តិតរូបសាកសព ដើម្បី​ធ្វើការសាកសួរព័ត៌មាន រកសាច់​ញាតិ និងយកសាកសព ទៅតម្កល់ជាបណ្តោះអាសន្ន នៅក្នុងវត្ត​អង្គតាម៉ិញ ជិតទីតាំងសាកសព​ ដែលពលរដ្ឋ​ប្រទះឃើញ៕