តម្លើងថ្លៃ វាតទីយកកន្លែងផ្ញើរម៉ូតូតាមចិត្ត ព្រោះបានបង់លុយឲ្យសង្កាត់?
- ដោយ: ក. វិច្ចនី ដោយ ក.វិច្ចនី (ទាក់ទង៖ [email protected]) - ភ្នំពេញ ថ្ងៃទី ០៦ វិច្ឆការ ២០១៤
- កែប្រែចុងក្រោយ: November 07, 2014
- ប្រធានបទ: បុណ្យអុំទូក
- អត្ថបទ: មានបញ្ហា?
- មតិ-យោបល់
-
ក្នុងរយៈពេលបីថ្ងៃ នៃព្រះរាជពិធីបុណ្យអុំទូក បណ្ដែតប្រទីប អកអំបុក សំពះព្រះខែនេះ បានបង្កើតភាពកាក់កប ឲ្យអ្នកបើកអាជីវកម្ម ទទួលផ្ញើររថយន្ដ និងម៉ូតូយ៉ាងសម្បើមដៃ។ ក្រុមអាជីវករទាំងនោះ បានធ្វើសកម្មភាពមានបានរបស់ខ្លួន តាមរយៈការតម្លើងថ្លៃផ្ញើរម៉ូតូ ខ្ពស់ហួសនិស្ស័យ ចាប់ពី២០០០រៀល រហូតទៅដល់៥០០០រៀល ដោយកន្លែង បង្កឲ្យមានការរអ៊ូរទាំពីពលរដ្ឋ ដែលបានទៅចូលរួមកំសាន្ដ ក្នុងពិធីបុណ្យនោះ។
ដើម្បីដឹងថា តើការយកតម្លៃផ្ញើរម៉ូតូនេះ មានការតម្លើងថ្លៃហួសប្រមាណនោះ ទស្សនាវដ្ដីមនោរម្យ.អាំងហ្វូបានបញ្ជូនភ្នាក់ងារយកព័ត៌មាន ទៅកាន់ទីកន្លែងផ្ញើរម៉ូតូច្រើនកន្លែង ដែលស្ថិតនៅត្រង់ចំនុចជាប់របងវត្ត ឧណ្ណាឡោម ក្នុងសង្កាត់ជ័យជំនៈ ខណ្ឌដូនពេញ រាជធានីភ្នំពេញ។ រឿងដែលគិតមិនដល់នោះ គឺវត្តមានរបស់អ្នកយកព័ត៌មានរបស់យើង បានធ្វើឲ្យអ្នកទទួលផ្ញើរម៉ូតូ ផ្លាស់ប្ដូរជំហរមិនតម្លើងថ្លៃហួសហេតុ ដូចពេលមុនទៀត។ ដំបូងឡើយ ទស្សនាវដ្ដីបានជួបលោក ពន្លក រស់នៅសង្កាត់បឹងទំពន់ ដែលទើបនឹងយកម៉ូតូចេញពីកន្លែងផ្ញើរ ជាមួយនឹងការអះអាងថា លោកបានផ្ញើរម៉ូតូនៅទីនេះ ក្នុងតម្លៃម៉ូតូមួយ ៣០០០ពាន់រៀល សម្រាប់តែរយៈពេល១ម៉ោងប៉ុណ្ណោះ។
ប៉ុន្តែបន្ទាប់ពីងាកទៅស្វែងរកការបកស្រាយ ពីអ្នកទទួលផ្ញើរម៉ូតូវិញនោះ ពួកគាត់សុទ្ធតែនិយាយថា ខ្លួនយកតម្លៃតែ១០០០រៀលទេ ប៉ុន្តែគឺម្ចាស់ម៉ូតូទេ ដែលបានបង់ថ្លៃ«លើស»។ ខ្លះទៀតបាននិយាយថា ខ្លួនឃើញគេយក២០០០រៀល ឬ៣០០០រៀល ក៏យកតាមគេដែរ ហើយគ្មានអាជ្ញាធរមានសមត្ថកិច្ចណាមួយ មកកំណត់ ហាមឃាត់ ឬខ្វាយខ្វល់ អំពីការយកថ្លៃផ្ញើរម៉ូតូទាំងនេះទេ។ ផ្ទុយទៅវិញ អាជ្ញាធរនៅតំបន់នោះ ត្រូវបានអាជីវករទាំងនោះ និយាយប្រាប់ថា បានទទួលការបង់ប្រាក់ពីខ្លួន។
ស្រ្តីម្នាក់ ដែលមានអាយុប្រមាណជាង៣០ឆ្នាំ និងជាអ្នកចាំទទួលផ្ញើរម៉តូ បាននិយាយថា ការបោះបង្គោលយកកន្លែងដាក់ម៉ូតូនេះ គឺពួកគាត់បានបង់ថ្លៃ ទៅឲ្យសាលាសង្កាត់ ទើបពួកគាត់អាចយកទីធ្លានេះ មកទទួលផ្ញើរម៉ូតូបាន។ ប៉ុន្តែស្រ្តីរូបនេះ បានព្យាយាមលាក់ពីតម្លៃ ដែលត្រូវបង់ឲ្យទៅសាលាសង្កាត់ ដោយនិយាយត្រឹមតែពាក្យមិនដឹងៗប៉ុណ្ណោះ។
សូមបញ្ជាក់ដែរថា អ្នកទទួលផ្ញើរម៉ូតូទាំងនោះមួយចំនួន បានពុះយកទ្រូងផ្លូវអស់មួយចំហៀង ហើយមួយចំនួនទៀត បានព័ទ្ធយកទីកន្លែងសាធារណៈទាំងនេះ ដោយសារខ្លួនគិតថា ជាមុខផ្ទះ ឬជាផ្នែកមួយនៃសណ្ឋាគាររបស់ខ្លួន។ បុរសម្នាក់ ជាភ្នាក់ងារសន្តិសុខរបស់សណ្ឋាគារមួយ នៅក្បែរវត្តឧណ្ណាឡោម បានអះអាងថា ខ្លួនបានឆ្លៀតយកចំណីផ្លូវ ដែលសណ្ឋាគាររបស់ខ្លួន ធ្លាប់យកមកធ្វើជាចំណតរថយន្ដនោះ យកមកធ្វើអាជីវកម្មផ្ញើរម៉ូតូនេះដែរ។
ការយកចិញ្ចើម និងចំណីផ្លូវ មកវាតធ្វើកន្លែងផ្ញើរម៉ូតូនេះ បង្កឲ្យផ្លូវសម្រាប់អ្នកមកដើរកំសាន្ដបុណ្យអុំទូក ប្រែជារួមចង្អៀត ហើយឈានទៅដល់ការកកស្ទះ ប្រសិនបើមហាជនចេញមកយកម៉ូតូតំណាលគ្នា។ នេះគេនៅមិនទាន់និយាយដល់ច្រក«បណ្ដោះមនុស្ស» ដែលចាំបាច់ត្រូវតែមានឲ្យធំទូលាយ ដើម្បីបង្កាគ្រោះឧប្បទេវហេតុណាមួយ ដែលធ្វើឲ្យមនុស្សផ្អើលរត់ ចេញពីមាត់ទន្លេមកវិញនោះផង (ឧទាហរណ៍៖ ព្រឹត្តិការណ៍រត់ជាន់គ្នា នៅកោះពេជ្រ កាលពីឆ្នាំ២០១០ ដោយសារមានស្ពានតែមួយ ជាច្រកបណ្ដោះមនុស្ស)។
សាកសួរសុំការបកស្រាយ ដោយទស្សនាវដ្ដីមនោរម្យ.អាំងហ្វូ លោកអភិបាលរងខ័ណ្ឌដូនពេញ ដែលមានវត្តមានដើម្បីរៀបចំសណ្ដាប់ធ្នាប់នៅទីនោះ បាននិយាយថា គ្មានអាជ្ញាធរថ្នាក់ណា ហ៊ានប្រគល់ចិញ្ចើម ចំណីផ្លូវ ឬទីកន្លែងសាធារណៈណាផ្សេង ទៅឲ្យអ្នកទទួលផ្ញើរម៉ូតូទាំងនោះទេ ហើយសន្យាថានឹងចាត់វិធានការ ទៅលើអ្នកទាំងនេះ ដោយមិនរើសមុខ។ ប៉ុន្តែទាក់ទងនឹងការបង់ប្រាក់របស់ក្រុមអ្នកទទួលផ្ញើរម៉ូតូ ទៅឲ្យសាលាសង្កាត់នោះវិញ ត្រូវបានលោកអភិបាលរងដដែល ដេញអ្នកសារព័ត៌មានយើង ឲ្យទៅសួរខាងសាលាសង្កាត់ដោយខ្លួនឯងទៅ។ លោកបាននិយាយថា៖ «អត់ដឹង! អត់ដឹង យើងកុំឆ្លើយ។»
មិនអាចទាក់ទងសាលាសង្កាត់ជ័យជំនះ ដើម្បីសុំការបកស្រាយបំភ្លឺបាននៅឡើយ រហូតមកដល់ម៉ោងនេះ ដោយសារជាថ្ងៃឈប់សម្រាក។ ប៉ុន្តែយ៉ាងណាក៏ដោយ ក៏ករណីខាងលើនៅតែជាចន្លោះប្រហោង នៃការគ្រប់គ្រងពិធីបុណ្យជាតិ របស់អាជ្ញាធរដដែលដែរ។ ការខាតបង់ដែលកើតចេញ ពីភាពចន្លោះប្រហោងនេះ មានដូចជា៖ រដ្ឋមិនមានចំណូលពីការទទួលផ្ញើរម៉ូតូ - បង្កគ្រោះថ្នាក់ក្នុងករណីមានឧប្បទេវហេតុ ព្រោះច្រកបណ្ដោះមនុស្សរួមតូច - បង្កការក្ដៅក្រហាយឲ្យមហាជន ដែលមកលេងបុណ្យអុំទូកជាដើម៕