«ការលេងសើច បានក្លាយជាទុក្ខទោស សម្រាប់អ្នកដទៃ» តើនេះ ជាទង្វើដ៏សប្បាយរីករាយ របស់មនុស្សរាល់​រូបឬ? មនុស្សមួយក្រុមនេះ បានដុតផាវ លាក់ក្នុងកញ្ចប់នំ ហើយបានបោះកញ្ចប់នោះ ទៅឲ្យសត្វស្វា​មួយ​ក្បាល​ស៊ី។ ផាវដែលបានផ្ទុះឡើង មិនត្រឹមតែបង្កការភ័យខ្លាច ដល់សត្វស្វាទេ តែថែមទាំងបានធ្វើសត្វដ៏កំសត់ ដាច់​ម្រាមដៃមួយ។ រឿងដែលអាណោចអាធមជាងនេះ សត្វស្វាបានស្លាប់​នៅពេលក្រោយមក បើទោះក្រុមគ្រូពេទ្យ របស់អង្គការការពារសត្វមួយ បានខិតខំយកសត្វដ៏កំសត់នេះ ទៅព្យាបាលក៏ដោយ។

តាមការអះអាង កាលពីថ្ងៃទី២២ ខែសីហា របស់ម្ចាស់ទំព័រទ្វីសធើមួយ ដែលដាក់ឈ្មោះ «ZoologiMY» បាន​ឲ្យ​ដឹងថា ហេតុការណ៍បានកើតឡើង តាំងពីមួយខែមុន នៅក្នុងតំបន់ឧទ្យាន «Taman TAR» នៃសង្កាត់ «Ampang»​ របស់រដ្ឋធានីកូឡាឡំពួរ ប្រទេសម៉ាឡេស៊ី។ បន្ទាប់ពីបានរងគ្រោះ នឹងផាវដែលមានកម្លាំងផ្ទុះ ដ៏ខ្លាំងនោះរួច សត្វស្វាដែលក្រុមអ្នកថែរក្សាសត្វ បានដាក់ឈ្មោះ «Michai» បានរងរបួសដាច់ម្រាមដៃមួយ និងរបួសគ្រាំខាងក្នុងនោះទៀត។ ក្រុមគ្រូពេទ្យសត្វ របស់អង្គការក្រៅរដ្ឋាភិបាល «Ape» បានខិតខំព្យាបាល «Michai» តែមិនអាចជួយសង្គ្រោះជីវិតបាន។

ហេតុការណ៍នេះ ត្រូវបានថតជាប់ ក្នុងវីដេអូមួយ ដែលយកមកបង្ហោះ នៅលើគេហទំព័រចែករំលែកវីដេអូ «LiveLeak.com» មុននឹងត្រូវបាន យកមកបង្ហោះ នៅលើហ្វេសប៊ុក ដែលបង្កឲ្យក្រុមអ្នកប្រើប្រាស់​បណ្ដា​សង្កម ផ្ទុះកំហឹងឡើង ដោយហៅក្រុមមនុស្សអ្នកលេងសើចនោះ ថាជាក្រុម«នរក»។

រីឯក្រុមអ្នកស្នេហាសត្វ របស់អង្គការ «Ape» វិញ មិនបាននៅស្ងៀមឡើយ។ ពួកគេ បានស្នើសុំឲ្យ​អាជ្ញាធរ​ម៉ាឡេស៊ី បង្កើនការរឹតបន្តិច នៅក្នុងសួនឧទ្យានជាតិ ដើម្បីកុំឲ្យសកម្មភាពអមនុស្សធម៌ ដូចខាងលើនេះ អាច​កើតឡើងជាថ្មីទៀតបាន។ ក្រុមសកម្មជនរបស់អង្គការ បាននិយាយថា៖ «នៅករណីជាច្រើន ដូចជាការធ្វើ​ទារុណកម្ម និងការកាប់សម្លាប់ ទៅលើសត្វជាដើម បានកើតឡើង។ ហើយយើងសង្ឃឹមថា អាជ្ញាធរនឹង​បង្កើន​ការត្រួតពិនិត្យ ទៅលើសកម្មភាពដ៏អាក្រក់ របស់មនុស្សទាំងនេះ។»