នៅទ្វីបអ៊ឺរ៉ុប ការស្វែងរកអារម្មណ៍រំភើប តាមរយៈលេងល្បែងដ៏គ្រោះថ្នាក់ សឹងតែក្លាយជាជីវិតប្រចាំថ្ងៃ សម្រាប់​យុវវ័យនៅទីនោះទៅហើយ។ ប៉ុន្តែបើគ្នាចង់រកអារម្មណ៍ «ភើតពោះ» ខ្លាំងនោះ ក៏មិនដល់​ថ្នាក់​ដាច់​ខ្សែទោង យ៉ាងដូច្នេះដែរ។ ប៉ុន្តែជាសំណាងមួយ ក្នុង១០០០គ្រោះថ្នាក់ ដែលហេតុការណ៍នេះ បង្កឲ្យ​មនុស្ស​របួសតែម្នាក់។

ហេតុការណ៍បានកើតឡើង នៅយប់ថ្ងៃចន្ទ ឈានចូលមកថ្ងៃអង្គារ សប្ដាហ៍មុន នៅក្នុងតំបន់ «Cap d’Agde» ភាគខាងត្បូងនៃប្រទេសបារាំង ខណៈមនុស្សម្នា កំពុងចូលរួមកំសាន្ដសប្បាយ នៅក្នុងសួនល្បែងមួយ ដែល​សម្បូរទៅដោយល្បែង «ភើតពោះ» ជាច្រើនដូចយ៉ាង ល្បែងបាញ់ទោង ឡើងលើអាកាសនេះជាដើម។ ទោង​នេះ មានលក្ខណៈជាប្រអប់មូល ដែលចងភ្ជាប់ដោយខ្សែពួរយឺត ទៅនឹងដងដោយដ៏វែងចំនួនពីរ ខ្ពស់ឡើង​ទៅ​លើ។

ដូចក្នុងវីដេអូខាងលើបង្ហាញស្រាប់ ប្រអប់មូលត្រូវបានបាញ់ឡើងទៅលើ។ ប៉ុន្តែអកុសលនៅពេលធ្លាក់មកវិញ ខ្សែយឺតមួយចំហៀងបានដាច់ ធ្វើឲ្យប្រអប់មូល ត្រូវបានទាញយ៉ាងពេញទំហឹង ទៅបោកត្រឡប់ត្រឡិន នឹង​ដងដោយម្ខាង របស់ល្បែងនេះ មុននឹងវាឈប់ស្ងៀម។

យុវជនពីរនាក់ ដែលចូលរួមលេងល្បែងនេះ បានជាប់នៅក្នុងប្រអប់មូលនេះ អស់រយៈពេលជាច្រើននាទី មុន​នឹងក្រុមអ្នកជួយសង្គ្រោះ បានមកដល់ ដើម្បីដោះពួកគេឲ្យចុះមក។ យុវតីម្នាក់ ពីក្នុងចំណោមអ្នកទាំងពីរ អាយុ​២៤ឆ្នាំ បានរងរបួសបាក់ជើង ហើយត្រូវបញ្ជូនទៅព្យាបាលភ្លាម នៅមន្ទីរពេទ្យ។ ប៉ុន្តែអាជ្ញាធរបារាំង​នៅ​ទីនោះ បានបើកការស៊ើបអង្កេត ទៅលើករណីនេះភ្លាម។ បើតាមម្ចាស់ល្បែងបាញ់ទោងខាងលើ បានអះអាងប្រាប់​សារព័ត៌មាន​តំបន់ថា គ្រោះថ្នាក់នេះ ទំនងបណ្ដាលមកពីខ្សែយឺត ដែលត្រូវបានផលិត ដោយ​«ខុស​បច្ចេកទេស»៕