ប៉មយាមផែមួយ ត្រូវបានបុកកម្ទេច នៅយប់ថ្ងៃអង្គារទី៧ខែឧសភា បណ្ដាលអោយមនុស្ស៧នាក់ស្លាប់ បួននាក់រងរបួស និងពីរនាក់ផ្សេងទៀត នៅបាត់ខ្លួននៅឡើយ។ តុលាការអ៊ីតាលី បានបើកការស៊ើបអង្កេតនៅថ្ងៃពុធស្អែកឡើង ពីបទ«បង្ក​អោយមានមនុស្សស្លាប់»ដោយខ្វះការប្រុងប្រយ័ត្ន ទៅលើមេបញ្ជាការរបស់នាវានោះ។

ទាំងប៉មយាម និងអាគារនៅសងខាង ត្រូវបានបុកកម្ទេច។

មួយឆ្នាំក្រោយពីការគឿង ធ្វើអោយលិចនាវាយក្សទេសចរណ៍ កុងកូឌីយ៉ា (Concordia) នោះមក ហេតុការណ៍រន្ធត់ថ្មី បាន​កើតឡើងជាថ្មីទៀត នៅអ៊ីតាលី។ យ៉ាងហោចណាស់មនុស្សបួននាក់បានស្លាប់បាត់បង់ជីវិត បួននាក់រងរបួស និងពីរនាក់​ផ្សេងទៀតបានបាត់ខ្លួន នៅលើផែសមុទ្រ«ជេនេស (Gênes)» បណ្ដាលមកពីនាវាផ្ទុកកុងទើន័រមួយគ្រឿងធំ បានថយមក​បុកយ៉ាងពេញទំហឹង នៅក្នុងយប់ថ្ងៃអង្គារ។ នៅព្រឹកថ្ងៃពុធ មនុស្សម្នាក់ត្រូវបានរកឃើញនៅមានជីវិត នៅក្រោមគំនរ​បាក់​បែកនៃប៉ម។ តាមកាសែតក្នុងស្រុកមួយ បាននិយាយថា មនុស្សនោះ ជាបុរសម្នាក់ដែលមានអាយុ៥០ឆ្នាំ មានសភាពរបួស​ធ្ងន់ធ្ងរ ហើយត្រូវដឹកទៅមន្ទីរពេទ្យជាបន្ទាន់។

នៅថ្ងៃពុធទី៨ខែឧសភាដដែល មេបញ្ជាការនាវា ចូលី ណារ៉ូ (Jolly Nero) នៃក្រុមហ៊ុន មេស៊ីណា (Messina) ត្រូវបាន​ដាក់​ទៅក្នុងការស៊ើបអង្កេត ពីបទ«បង្កអោយមានមនុស្សស្លាប់»ដោយខ្វះការប្រុងប្រយ័ត្ន។ នៅពេលដែលនាវាចាកចេញ ពីផែ​ដែលធំជាងគេនៅប្រទេសអ៊ីតាលីនេះ កាប៉ាលរបស់លោកបានធ្វើចលនាខុសទំនង ហើយបានងាកមកបុកប៉មយាម ដែល​ត្រូវបានបង្កើតឡើង សម្រាប់ត្រួតពិនិត្យចលនាចេញចូលរបស់រាល់នាវា។ ជាមួយនឹងនាវាដែលមានបណ្ដោយ​ប្រមាណ​ជា​ជាង២០០ម៉ែត្រ និងទម្ងន់សរុបជាង ៤០ពាន់តោន ប៉មយាមតូចមួយនេះ មិនអាចធន់ទ្រាំនោះបានឡើយ។ វាបានដួលរលំ ហើយមួយផ្នែកធំបានធ្លាក់ចូលទៅក្នុងទឹក។

មនុស្សដែលស្ថិតនៅលើប៉ម បានធ្លាក់ទៅជាមួយនឹងប៉ម ចូលទៅក្នុងទឹកដូចគ្នា។ ក្រុមអ្នកជួយសង្គ្រោះ បានមកដល់​ទី​កន្លែងភ្លាមៗ និងបានស្វះស្វែងដើររកទាំងយប់ ជនរងគ្រោះទាំងនោះ ហើយរហូតមកដល់ថ្ងៃពុធនេះ ការរុករកនៅបន្ត​នៅ​ឡើយ៕

អាគារប៉ម ពេលនៅមានរូបរាងល្អនៅឡើយ។

នាវា ចូលី ណារ៉ូ ដែលកំពុងផ្ទុកកុងតឺន័រ យ៉ាងសន្ធឹកសន្ធាប់។

សូមទស្សនាវីដេអូខាងក្រោម ដូចតទៅ៖

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី៨ ខែឧសភា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ