នាង ម៉ារីលីន ម៉ុនរ៉ូ ត្រូវបានគេស្គាល់ថា និមិត្តរូបនៃសម្ផស្ស និងភាពស៊ិចស៊ី របស់ស្ត្រីនៅក្នុងពិភពលោក។ នៅ​ពេលដែលរំលឹក ពីតារាភាពយន្ដ ក្នុងទសវត្សន៍ឆ្នាំ៥០ រូបនេះ គេត្រូវតែនឹកទៅដល់ រូបរាងរាប់ទាំងដើមទ្រូង ដ៏​ទ្រលុកទ្រលន់ និងភាពក្លាហានដំបូងគេ របស់ស្ត្រី ដែលហ៊ានថតបញ្ចេញសាច់ នៅពីមុខម៉ាស៊ីនថត។

ប៉ុន្តែបើនិយាយមកវិញ ពីប្រវត្តិនៃការចូលប្រឡូកដំបូង ក្នុងវិស័យភាពយន្ដនៅហូលីវូដ កាលពីឆ្នាំ១៩៤៩នោះ នាងគ្រាន់តែជាយុវតីមួយរូប ដូចគេដូចឯង ដែលបានព្យាយាម ស្វែងរកការបញ្ចូលខ្លួន ទៅក្នុងពិភពនៃផ្ទាំង​សំពត់ស។

នៅសម័យកាលនោះ ពាក្យចចាមអារាមបាននិយាយថា នាងបានសុខចិត្តថតស្រាត ប្ដូរយកប្រាក់ ៥០ដុល្លា ដើម្បីបង់ថ្លៃឈ្នួលផ្ទះ។ រហូតមកដល់បច្ចុប្បន្ន គេបានដឹងកាន់តែច្បាស់ថា ពាក្យចចាមអារាមនេះ ជារឿងពិត ដោយហេតុថា រាល់រូបថតរបស់នាង ថតបញ្ចេញសាច់ ទើបនឹងត្រូវបានយកមកបង្ហាញជាសាធារណៈ កាល​ពី​ដើមខែនេះ ក្នុងក្រុង ឡូស អេនជឺឡេស (Los Angeles)។

រូបថតបញ្ចេញសាច់ដំបូងគេ របស់នាង ម៉ារីលីន ម៉ុនរ៉ូ ត្រូវបានថតដោយជាងថតអាជីព លោក ថម ឃីឡី (Tom Kelley) ដែលល្បីល្បាញខាងថតរូបតារាល្បីៗជាច្រើន នៅក្នុងទសវត្សន៍ឆ្នាំ៤០ និង៥០។ រូបថតដើម ត្រូវបាន​ចេញផ្សាយដំបូង នៅក្នុងប្រតិទិន «Golden Dreams» នាឆ្នាំ១៩៥២ ហើយបន្ទាប់មក ត្រូវបានទស្សនាវដ្ដី​ស៊ិច​ស៊ី​ដ៏ល្បី ឈ្មោះ «Playboy» យកមកផ្តិតដាក់នៅទំព័រមុខ នាឆ្នាំ១៩៥៣។ ការចុះផ្សាយទាំងនេះ បាន​ធ្វើ​ឲ្យ​នាង ម៉ារីលីន ម៉ុនរ៉ូ ក្លាយជាតារាមួយរូប ដែលគេស្គាល់កាន់តែច្រើនឡើង។

ប៉ុន្តែអ្វីដែលចម្លែកនោះ គឺរូបថតជាច្រើន ត្រូវបានប្រើប្រាស់ ដើម្បីបង្កើតទៅរូបថតបញ្ចេញសាច់ របស់​តារា​ភាពយន្ដ ហើយទើបនឹងត្រូវបានគេហទំព័រមួយ ឈ្មោះ «Limited Runs» យកមកផ្សព្វផ្សាយ នៅក្នុងអាជីវកម្ម​រូបថត​ចាស់ៗ របស់ខ្លួន។ រូបថតទាំងនេះ ថែមទាំងត្រូវបាន យកមកដាក់តាំង នៅក្នុងពិពណ៌ «Marilyn Monroe: Red Velvet Collection» នាក្រុង ឡូសអេនជឺឡេស កាលពីថ្ងៃទី១ ខែសីហានេះ ហើយធ្វើឲ្យគេ​យល់​ថា រូបថតបញ្ចេញសាច់ ដែលត្រូវបានអះអាង ថាជា«រូបដើម»របស់នាង ម៉ុនរ៉ូ នោះ ជាសម្មិទ្ធផល នៃ​ការកាត់​ត និងបន្ថែមបន្ថយ ពីរូបថតជាច្រើន ពោលគឺតាំងពីកម្មវិធីកំព្យូទ័រ នៅមិន​ទាន់​ឃើញ​ស្រមោល​របស់​ខ្លួន​ម្លេះ៕