ការរកឃើញ ដ៏គួរឲ្យតក់ស្លុត និងរន្ធត់ បានជំរុញឲ្យអាជ្ញាធរ ឈានទៅបិទភោជនីយដ្ឋានមួយ នៅតំបន់ភាគអាគ្នេយ៍ នៃ​ប្រទេសនីហ្សេរីយ៉ា។ ស្បោងជាច្រើន ដែលមានផ្ទុកសុទ្ធតែក្បាលមនុស្ស ត្រូវបានរកឃើញ នៅក្នុងផ្ទះបាយ របស់​ហាង​នោះ។ នេះបើតាមរបាយការណ៍ របស់សារព័ត៌មានអង់គ្លេស «Telegraph»។

បណ្ដាញវិទ្យុ និងទូរទស្សន៍អង់គ្លេស BBC ដែលមានអ្នកឆ្លើយឆ្លងព័ត៌មាន ប្រចាំតំបន់ ក៏បានអះអាងដែរថា បណ្ដាជន​នៅ​ក្នុងខេត្ត អានាមប្រា (Anambra) បានសង្ស័យថា ដូចជាមានអ្វីមួយយ៉ាងអាក្រក់ បានកើតឡើង នៅក្នុងភោជនីយដ្ឋាន​មួយ​នេះ។

ការចូលទៅឆែកឆេររបស់នគរបាល បានរកឃើញនូវវត្ថុតាងជាច្រើន។ ក្រៅពីក្បាលមនុស្ស ដែលប្រឡាក់ទៅដោយឈាម ដាក់នៅក្នុងស្បោងផ្លាស្ទីក ភ្នាក់ងារនគរបាល បានរកឃើញអាវុធ និងគ្រប់បែកជាច្រើនទៀត។ ជាសរុប មនុស្ស​ចំនួន​១០នាក់ ត្រូវបានឃាត់ខ្លួន និងយកទៅឃុំខ្លួន ជាបណ្ដោះអាសន្ន។

អ្នករស់នៅក្បែរខាងម្នាក់ បានថ្លែងរៀបរាប់ថា៖ «ខ្ញុំមិនភ្ញាក់ផ្អើលអ្វីប៉ុន្មានទេ នឹងការរកឃើញ ដ៏តក់ស្លុតនេះ។ ជារៀង​រាល់​ពេល ដែលខ្ញុំបានទៅផ្សារ គេតែងឃើញមានហេតុភេទ មិនធម្មតា នៅក្បែរនឹងសណ្ឋាគារនោះ។» បុរសម្នាក់នោះ ដែល​និយាយក្នុងលក្ខខណ្ឌ មិនបញ្ចេញឈ្មោះ ថាថ្លែងឲ្យដឹងទៀតថា មនុស្សដែលធ្វើការនៅទីនោះ មិនដែលត្រូវបានឃើញ​ថា ចេះស្លៀកពាក់ឲ្យស្អាតបាតឡើយ ហើយការចេញទៅ និងត្រឡប់មកវិញ របស់ពួកគេ មានភាពចម្លែកណាស់។

សមាជិកមួយរូប នៃព្រះវិហារនៅក្នុងទីក្រុងនោះ ដែលបានចូលទៅទទួលទាន នៅក្នុងភោជនីយដ្ឋាន បានសម្ដែង​ការ​ភ្ញាក់​ផ្អើល នៅពេលលោក បានឃើញតម្លៃម្ហូប ដែលមានកម្រិតខ្ពស់ជាង ប្រាក់ខែកម្មករ នៅក្នុងប្រទេស ដល់ទៅ៤ដង។ អ្នក​ធ្វើការ នៅក្នុងភោជនីយដ្ឋាន បានឆ្លើយប្រាប់ មកសមាជិកព្រះវិហារនោះវិញថា តម្លៃនេះមានកម្រិតខ្ពស់ បណ្ដាល​មក​ពី​សាច់ប៉ុន្មានដុំ ដែលគេធ្វើរៀចំចម្អិន ឲ្យលោកទទួលទាន។ លោក បានថ្លែងឡើងថា៖ «ខ្ញុំអត់ដឹងទាល់តែសោះ ថាគេធ្វើ​ម្ហូប​សាច់មនុស្ស ឲ្យខ្ញុំបរិភោគ»៕