គ្រោះថ្នាក់ផ្ទុះធុងហ្គាសរបៀបនេះ ពិបាកនឹងមើលឃើញ ឬដឹងជាមុនណាស់ ជាពិសេសករណី ដែលអាចបង្ក ឲ្យទៅជា​វិនាសកម្មមួយ មិនអាចស្មានដល់។ កាលពីថ្ងៃទី១១ ខែឧសភា ឆ្នាំ២០១៥កន្លងទៅនេះ នៅក្នុងទីក្រុង វ៉េលីគីយ៉េ លូគី (Velikié Louki) នៃប្រទេសរ៉ូស្សី ស្ត្រីម្ចាស់រថយន្ដមួយរូប បានរងគ្រោះនឹងអគ្គិភ័យ ក្នុងខណៈពេល ដែលនាងកំពុងបើក រថយន្ដ។

យុវតីវ័យក្មេង មានបំណងចង់ដុតបារីជក់ នៅក្នុងពេលកំពុងបើកបរ ប៉ុន្តែនាងមិនបានដឹងថា ធុងហ្គាសដែលនាងកំពុងដឹក ដាក់ក្នុងរថយន្ដជាមួយ បានបែកធ្លាយនោះឡើយ។ អណ្ដាតភ្លើង ដែលចេញពីដែកកេះរបស់នាង បានឆាបឆេះ​ឡើង​យ៉ាង​សន្ធោសន្ធៅ នៅក្នុងរថយន្ដ ហើយឆេះដោយទាំងខ្លួននាងផង។

តែសំណាងល្អ នាងបានបើកទ្វារថយន្ដ រត់ចេញមកក្រៅបាន និងបានរងរបួស តែ​បន្តិចបន្តួចប៉ុណ្ណោះ។ រីឯរថយន្ដ​របស់​នាងវិញ បានរងការខូចខាត សឹងតែទាំងអស់ ដោយត្រូវរង់ចាំអ្នកពន្លត់អគ្គិភ័យមកដល់ ដើម្បីធ្វើការពន្លត់ភ្លើង ជាមួយ​នឹង​ទឹកពពុះប្រឆាំងអគ្គិភ័យ។

ហេតុការណ៍នេះ ត្រូវបានថតជាប់ ដោយម៉ាស៊ីនថតវីដេអូសុវត្ថិភាព ដែលដាក់បំពាក់ជាប់នឹងរថយន្ដ ដែលបើកបរ ពី​ខាង​ក្រោយរថយន្ដយុវតីរងគ្រោះ។ សូមបញ្ជាក់ដែរថា ថ្ងៃខែឆ្នាំ​ ដែលឃើញនៅលើវីដេអូ មិនមែនជាថ្ងៃខែឆ្នាំមែនទែននោះទេ តែហេតុការណ៍ វាពិតជាបានកើតឡើង នៅមួយសប្ដាហ៍មុន ហើយម្ចាស់វីដេអូ ទើបនឹងយកមកបង្ហោះ ក្នុងថ្ងៃទី១៣ ខែ​ឧសភា​នេះ​ប៉ុណ្ណោះ៕