ករណីគ្រោះថ្នាក់ចេរាចរណ៍មួយ បានកើតឡើងនៅលើផ្លូវមុន្នីរ៉េត ខាងលិចស្ពានស្ទឹងមានជ័យ ទល់មុខក្លោងទ្វារសង្កាត់ ស្ទឹងមានជ័យ ខណ្ឌមានជ័យរាជាធានីភ្នំពេញ កាលពីវេលាម៉ោង ១០និង៣០នាទី យប់ថ្ងៃទី១៦ ខែកុម្ភៈ ឆ្នាំ២០១៥។ ហេតុការណ៍នេះ បង្ករឡើងដោយ ម៉ូតូកង់បីមួយគ្រឿង ដែលបើកបរបញ្ច្រាស់ ហើយបុកជាមួយម៉ូតូក្មេងប្រុស ម្នាក់ដែលជិះគ្នាបីនាក់ ក្នុងទិសដៅបញ្ច្រាស់គ្នា។

សាក្សីនៅកន្លែងកើតហេតុបានរៀបរាប់ថា នៅមុនពេលកើតហេតុ គេឃើញម៉ូតូកង់បី ពាក់ស្លាកលេខភ្នំពេញ 1AT04-01 មួយគ្រឿង បើកបរបញ្ច្រាស់ ពីលិចទៅកើត បម្រុងនឹងឆ្លងផ្លូវ ស្រាប់តែមិនបានប្រុងប្រយ័ត្ន ក៏បានបុកជាមួយម៉ូតូមួយគ្រឿង ដែលបើកបរក្នុងទិសដៅស្រប ពីកើតទៅលិច។ ការប៉ះពារគ្នានេះ បានបណ្ដាលឲ្យជនរងគ្រោះ ជាម្ចាស់ម៉ូតូវ័យក្មេង រងរបួសស្រាលនៅត្រង់ជើង និងម៉ូតូខូតខាតផ្នែកខាងមុខ ឯជនបង្ករមានរបួសស្រាល នៅត្រង់ដៃ។ សាក្សីបានបន្តទៀតថា ភ្លាមៗនោះ ជនបង្ករបានប្រើសម្តីធ្ងន់ៗ ទៅកាន់យុវជនរងគ្រោះថា ខ្លួនជាអ្នកត្រូវ ហើយប្រកែកមិនឲ្យយុវជននោះ ប្រាប់ទៅអាណាព្យាបាលទៀតផង។

លោក សេង តូម៉ា ជាឪពុកជនរងគ្រោះ បានប្រាប់ទស្សនាវដ្តីមនោរម្យ.អាំងហ្វូថា កូនប្រុសរបស់លោកឈ្មោះ សេង ប្រុសពេជ អាយុ១៧ឆ្នាំ រៀននៅសាលាឯកជនមួយ នៅក្នុងសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។ លោកថា លោកខ្ញុំមិនសុខចិត្តទេ ដែលបើកកង់បីបុកកូនខ្ញុំហើយ បានប្រើសម្តីធ្ងន់ៗដាក់ទៀត ដោយគម្រាមថា មិនឲ្យប្រាប់ឪពុកម្តាយ។ លោកបានទាមទារសំណង ពីជនបង្ករចំនួន៥០ដុល្លា ដើម្បីបញ្ចប់ជម្លោះ។

ស្រដៀងគ្នានេះដែរ ជនបង្ករ លោក ប៊ឹន សុផាន ជានាយទាហ៊ាននៅភូមិភាគពីរ ដែលជាម្ចាស់កង់បីនោះ បានសារភាពថា លោកពិតជាបើកបរបញ្ចា្រស់ទិមែន។ បន្ទាប់ពីមានសង្គ្រាមពាក្យសម្តីបន្តិចបន្តួច ជាមួយជនរងកគ្រោះរួច ម្ចាស់កង់បី លោក សុផាន បានព្រមព្រៀងផ្តល់សំណង៣០ដុល្លា ទៅឲ្យជនរងគ្រោះ តែនៅពេលកើតហេតុ ជនបង្កគ្មានលុយ ក៏ឲ្យសម្ថកិច្ចយកម៉ូតូរបស់ខ្លួន ទៅប៉ុស្ត៏ស្ទឹងមានជ័យនាយប់នោះសិន ដើម្បីរង់ចាំលោកយកថវិកា ទៅដោះស្រាយបញ្ចប់រឿងតាមក្រោយ៕