តាមលិខិតផ្លូវការដែលចុះហហត្ថលេខាដោយលោក អ៊ឹម សួស្តី ប្រធាន គ.ជ.ប ក្នុងព្រឹកថ្ងៃទី១៧ ខែកុម្ភៈ ឆ្នាំ​២០១៥ ដែលទស្សនាវដ្តីមនោរម្យ.អាំងហ្វូ ទើបទទួលបាននេះ បានសរសេរថា គ.ជ.ប ទទួលស្គាល់លោក លោក ដាង ចំរើន កើតថ្ងៃទី២ ខែមករា ឆ្នាំ១៩៧៥ ត្រូវបានជាប់ជាតំណាងរាស្រ្តមណ្ឌលកំពត។

លោក អេង ឆៃអៀង អគ្គលេខាធិការគណបក្សសង្គ្រោះជាតិ ក្នុងកិច្ចសម្ភាសជាមួយអ្នកសារព័ត៌មាន កាល​ពី​ថ្ងៃទី១៦ ខែកុម្ភៈបានបញ្ជាក់ថា គណបក្សសង្គ្រោះជាតិ បានជ្រើសរើសលោក ដាង ចំរើន បេក្ខភាពឈរជា​តំណាងរាស្រ្តលេខបួន មណ្ឌលកំពត ជំនួសលោក វ៉ាន សំអឿន ដែលបានលាលែងចេញពីសមាជិក​រដ្ឋសភា។ លោកក៏បានបង្ហាញផងដែរថា ការលាលែងចេញពីតំណាងរាស្រ្តរបស់លោក វ៉ាន សំអឿន នេះ មិន​ត្រូវ​បានខាងគណបក្សដឹងជាមុនឡើយ។

លោក ឆៃអៀង បានបន្តទៀតថា សម្រាប់គណបក្សដែលមាននិន្នាការប្រជាធិបតេយ្យសេរី មិនមានការហាម​ឃាត់ សិទ្ធិសេរីភាពនៃអ្នកនយោបាយណាម្នាក់ របស់គណបក្សខ្លួននោះឡើយ។ ឯកាលាលែងរបស់លោក វ៉ាន សំអឿន នេះជាសិទ្ធិសេរីភាពផ្ទាល់ខ្លួនរបស់គាត់ ដែលគណបក្សមិនអាចជ្រៀតជ្រែកបាន។ លោក​និយាយ​ទៀតថា៖ «ឈ្មោះ ដាង ចំរើន ជាតំណាងរាស្រ្តថ្មី ជំនួសលោក វ៉ាន សំអឿន ត្រូវបានក្រុមប្រឹក្សា​អ្នក​ច្បាប់ នៃគណបក្សសង្គ្រោះជាតិ បានដាក់ទៅ គ.ជ.ប តាំងពីព្រឹកម៉ិញម្លេះ។»

សូមរំលឹកថា លោក វ៉ាន សំអឿន អនិជជនខ្មែររស់នៅអាមេរិក ជាអតីតសមាជិករដ្ឋសភាមណ្ឌលកំពត មកពី​គណបក្សសង្គ្រោះជាតិ និងជាសមាជិកគណៈកម្មការទី៣ នៃរដ្ឋសភា។ កាលពីថ្ងៃទី១៣ ខែកុម្ភះ ឆ្នាំ២០១៥ ក្នុងលិខិត ផ្លូវការមួយ ដែលបានដាក់ទៅរដ្ឋសភា សុំលាលែងតំណែង ជាសមាជិកតំណាងរាស្រ្តមណ្ឌលកំពត តែប៉ុណ្ណោះ តែលោកនៅមិនទាន់បញ្ជាក់ថា លាលែងពីសមាជិកគណបក្សសង្គ្រោះជាតិនោះទេ។ លិខិតនោះ បានសរសេរយ៉ាងខ្លីថា៖ «ខ្ញុំបាទគ្មានឱកាស នឹងបម្រើប្រទេសជាតិនៃយើង តាមឆន្ទៈ និងបទពិសោធន៍​របស់​ខ្ញុំបាទ»។

ចំណែកឯលោក ដាង ចំរើន វិញ គឺជាយុវជនមួយរូប ដែលបានចូលរួមក្នុងឆាកនយោបាយ ក្នុងឆ្នាំ២០០៧​នេះ។ បន្ទាប់ពីបានលាលែង ពីតំណែងជាចៅសង្កាត់រងជ្រោយចង្វា មកពីគណបក្ស សម រង្ស៊ី យុវជន ចំរើន បានចូលរួមធ្វើនយោបាយ ក្នុងថ្នាក់ជាតិវិញ ជាមួយគណបក្ស សម រង្ស៊ី ដដែល តែនៅក្នុងខេត្តព្រៃវែង។ បន្ទាប់មក លោកក៏បានឡើងទៅខេត្តកំពតវិញ ដោយឈរឈ្មោះ ជាតំណាងរាស្រ្តក្នុងលំដាប់លេខរៀងទី៤៕