ដំណើរកំសាន្ដ នៅក្នុងប្រទេសបារាំង របស់បុគ្គលិក ជាង៦៤០០ (ប្រាំមួយពាន់បួនរយ) នាក់ របស់សហគ្រាសមួយ នៅ​ខេត្ត​ធៀនជិន (Tianjin) ប្រទេសចិន ដែលត្រូវបានចំណាយ ដោយមហាសេដ្ឋី ម្ចាស់សហគ្រាសនោះ បានធ្វើឲ្យមនុស្ស​ពេញ​មួយផែនដី ភ្ញាក់ផ្អើលយ៉ាងខ្លាំង ដោយហេតុថា នេះជាលើកទីមួយហើយ ដែលប្រធានក្រុមហ៊ុនមួយ បានចេញលុយ «រាប់សិបលានយ័ន» ឲ្យបុគ្គលិករបស់ខ្លួន ចេញទៅលំហែកាយដូច្នេះ។

ប៉ុន្តែករណី បុគ្គលិកជាង ៦៤០០ នាក់ ខាងលើ លែងជាករណីតែមួយ ក្នុងលោកយើងនេះទៀតហើយ ព្រោះមហាសេដ្ឋី​ម្នាក់ទៀត នៅក្នុងក្រុង ហុងកុង ប្រទេសចិនដដែល បានបន្ថែមមួយករណីទៀត កាន់តែខ្លាំងជាងមុន ដោយចំណាយប្រាក់  «រាប់រយលានយ័ន» ដើម្បីឲ្យបុគ្គលិករបស់ខ្លួន ជាង១៣ ០០០ (មួយម៉ឺនបីពាន់) នាក់ ចេញទៅដើរទេសចរណ៍ នៅក្នុង​ប្រទេស​ថៃ។ នេះបើតាមសេចក្ដីរាយការណ៍ របស់សារព័ត៌មានចិន China.org.cn។

លោក លី ហ៊ុនលីន (Li Huilin) អគ្គនាយក្រុមហ៊ុន Infinitus បានអញ្ជើញបុគ្គលិក ដែលមានចំនួនដ៏ច្រើន របស់លោក និងដែលធ្វើការ សឹងនៅមួយចំហៀងប្រទេសចិន ឲ្យធ្វើដំណើរកំសាន្ដ នៅក្នុងប្រទេសថៃ។ យន្ដហោះជាង១០០គ្រឿង និងរថយន្ដក្រុង ជាង៤០០គ្រឿង ត្រូវបានជួលផ្ដាច់ ដើម្បីដឹកជញ្ជូន ក្រុមអ្នកទេសចរណ៍ទាំងនេះ ដោយរាប់ទាំងកាណូត​ធំៗ ៣៦គ្រឿង ដែលយកមកធ្វើ ជាសាឡាង ដឹកចម្លងឆ្លងទន្លេមេគង្គនោះផង។

តាមពិតទៅ នេះមិនមែនជាលើកទីមួយ​ទេ ដែលក្រុមហ៊ុន Infinitus  បានរៀបចំដំណើរកំសាន្ដ សម្រាប់បុគ្គលិករបស់ខ្លួន ទៅកាន់ប្រទេសថៃ តែលើកនេះ ជាលើកទី៦ហើយ ដោយគ្រាន់តែលើកនេះ ដំណើរកំសាន្ដ ត្រូវបានកត់សំគាល់ ដោយ​ចំនួនដ៏ច្រើនលើសលប់ នៃបុគ្គលិករបស់ក្រុមហ៊ុន។ ប៉ុន្តែនៅឆ្នាំក្រោយ ការភ្ញាក់ផ្អើល នឹងមានកាន់តែខ្លាំង ដោយ​សារ​សហគ្រាស មួយនេះ គ្រោងរៀបចំដំណើរកំសាន្ដមួយទៀត សម្រាប់បុគ្គលិក ដែលមានចំនួនរហូតដល់ទៅ ២២ ០០០ (ពីរ​ម៉ឺនពីពាន់) នាក់៕