រូបថតដែលបង្កការភ្ញាក់ផ្អើលនោះ ត្រូវបានសារព័ត៌មានធំៗ មួយចំនួនទៅអ៊ឺរ៉ុប សម្ដែងការចាប់អារម្មណ៍ យកមកផ្សាយ​នៅក្នុងអត្ថបទ របស់ពួកគេយ៉ាងព្រោងព្រាត។ រូបនេះត្រូវបានបង្ហោះ ដោយអ្នកប្រើប្រាស់ បណ្ដាញសង្គមនៅ​ក្នុង​ប្រទេស​អូស្ត្រាលី ដែលជាអ្នកសារព័ត៌មានមួយរូប នាង អាណាតាស្យា ប៉េរ៉េត៍ (Anastassia Perets) ប៉ុន្តែនាង បាន​ទទួល​​ស្គាល់​ថា រូបនេះ មិនមែនខ្លួននាង ជាអ្នកថតនោះទេ តែនាងបានរកឃើញ ដោយចៃដន្យ មុននឹងយកមកបង្ហោះ នៅ​​លើ​​ជញ្ជាំង​​ហ្វេសប៊ុក របស់នាង។

អ្នកដែលបានឃើញរូបថតនេះ បានចែករំលែកជាបន្តបន្ទាប់ ហើយមនុស្សជាភាគច្រើន សុទ្ធតែបានយល់ ទាំងព្រឺសម្បុរ​ថា រូបដែលឈរ ពីខាងក្រោយកុមារីនោះ គឺជាព្រលឹងខ្មោច របស់ក្មេងមួយរូបទៀត។ ប៉ុន្តែក៏មានមនុស្សមួួួយចំនួនទៀត យល់ថានេះជាបច្ចេកទេសកាត់ត នៃកម្មវិធីកំព្យូទ័រ ហៅថា Photoshop ដ៏ល្បី ខណៈមួយចំនួនទៀត រំលឹកពី​ភាពយន្ដ​ខ្មោច​មួយ ដែល​បាន​ចេញ​បញ្ចាំង តាំងពីឆ្នាំ១៩៨២។

នៅទីបំផុតទៅ យុវជនម្នាក់ ដែលរស់នៅក្នុងតំបន់រ៉ូន (Rhône) ភាគខាងត្បូង នៃប្រទេសបារាំង បានចេញមកបក​ស្រាយ​ថា រូបក្មេងស្រី ដែលឈរសម្លឹង ពីក្រោយនោះ ជាផ្ទាំងរូបភាពមួយ ដែលបិទនៅជាប់ជញ្ជាំង។ យុវជន Dõ ÃlaƛɌac បាន​សរសេរ​ឆ្លើយតប នឹងនាង ប៉េរ៉េត៍ ថា៖ «ក្មេងស្រីនៅខាងក្រោយ មិនមែនជាព្រលឹងខ្មោចទេ តែជារូបភាពសមញ្ញមួយ។ ជីដូន​របស់​ខ្ញុំ មានរូបក្មេងស្រីនេះ នៅក្នុងបន្ទប់របស់គាត់។ ខ្ញុំនឹងផ្ញើរជាភស្តុតាង មកឲ្យ។»

ដូច្នេះ រូបកុមារីខាងលើ អាចជារូបថត ដែលថតជាប់ ជាមួយនឹងរូបភាព​ ដែលមានក្មេងស្រីអោបតុក្កតា បិទនៅលើជញ្ជាំង​បន្ទាប់ ដូចរូបខាងក្រោមនេះអញ្ចឹង។

ប៉ុន្តែយ៉ាងណាក៏ដោយ រូបភាពដែលមានលក្ខណៈ ប្រហាក់ប្រហែលគ្នានេះ មានមិនខ្វះទេ ក្នុងពេលកន្លងមក ជាពិសេស​រូបភាព ដែលច្រើនមានប្រភពចេញពីប្រទេសជប៉ុន។ ដូចរូបខាងក្រោមនេះ ក៏មានលក្ខណៈគួរឲ្យតក់ស្លុតដែរ។ សម្រាប់​ការ​បក​ស្រាយ​វិញ ពេលខ្លះដូចជាស្ថិតនៅ យ៉ាងឆ្ងាយ ឬសឹងថា មិនដែលមានសោះតែម្ដង៕

ថតរូបជាលក្ខណៈគ្រួសារ ជាមួយកុមារកូនចៅរបស់ខ្លួន ស្រាប់តែឃើញមានរូបក្មេងម្នាក់ទៀត លាក់មុខ នៅខាង​ក្រោម។

ថតរូបនៅក្នុងបន្ទប់ទឹក ពេលយកទារកទៅងូតទឹក មានគ្នាតែកូននិងម្ដាយ ស្រាប់តែឃើញ មានដៃដ៏ចម្លែកមួយ ទម្លាក់​ពី​លើ នៅខាងក្រោយទារក។