អាមេរិក៖ ភូមិខ្មោចមួយ លក់ដាច់ក្នុងតម្លៃ ជិត២លានដុល្លារ
- ដោយ: សុបិន្ដ ដោយ សុបិន្ត (ទាក់ទង៖ [email protected]) - ម៉ុងរ៉េអាល់ ថ្ងៃទី៣១ តុលា ២០១៤
- កែប្រែចុងក្រោយ: November 02, 2014
- ប្រធានបទ: អភិវឌ្ឍន៍
- អត្ថបទ: មានបញ្ហា?
- មតិ-យោបល់
-
ភូមិ ចនសុនវីល ដែលស្ថិតនៅក្នុងរដ្ឋ ខ័ណេទីខូដ ភាគខាងជើងនៃសហរដ្ឋអាមេរិក ទើបនឹងត្រូវបានលក់ដាច់ នៅក្នុងការដេញថ្លៃមួយ កាលពីថ្ងៃព្រហស្បត្តិ៍ ទី៣០ ខែតុលាកន្លងទៅ ក្នុងតម្លៃជិត២លានដុល្លារ។ អានាគតម្ចាស់ថ្មី ដែលបានទិញភូមិ«ខ្មោច»នេះ មិនត្រូវបានបង្ហាញអត្តសញ្ញាណជាសាធារណៈទេ។ ប៉ុន្តែសម្រាប់តម្លៃនេះ អ្នកឈ្នះក្នុងការដេញថ្លៃ នឹងទទួលបានផ្ទៃដីប្រមាណជា ២៥ហិចតា រួមជាមួយនឹងអាគារលំនៅដ្ឋាន និងអាគារសាធារណៈមួយចំនួនទៀត។
ហេតុអ្វី បានជាភូមិនេះ បានក្លាយជាភូមិរហោឋាន?
នៅក្នុងទសវត្សរ៍ឆ្នាំ៦០ មហាសេដ្ឋីមួយរូប បានទិញភូមិនេះ ក្នុងមួយផ្នែកដ៏ធំមួយ ដើម្បីដាក់ទុនអភិវឌ្ឍន៍ទីនោះ ឲ្យក្លាយជាទីកន្លែងដើម្បីទទួលទេសចរណ៍។ វិទ្យុក្នុងតំបន់មួយ បាននិយាយថា នៅពេលនោះ ចនសុនវីល បានក្លាយជា«មជ្ឈមណ្ឌលទទួលរៀបចំមង្គលការ»ដ៏អស្ចារ្យ។
ប៉ុន្តែដំណើរប្រព្រឹត្តិទៅ នៃ«មជ្ឈមណ្ឌល»នេះ បានបញ្ឈប់ទៅយ៉ាងតក់ក្រហល់ នៅឆ្នាំ១៩៩៤ ហើយតាំងពីនោះមក ចនសុនវីល បានក្លាយជាភូមិដែលគេបោះបង់ចោល។ នៅឆ្នាំ២០០១ ភូមិនេះ ត្រូវបានទិញដោយក្រុមហ៊ុនសណ្ឋាគារមួយ ក្នុងក្ដីសង្ឃឹមថា នឹងដាក់ទុនអភិវឌ្ឍន៍តំបន់ដែលគួរឲ្យខ្លាចនេះ សម្រាប់ទទួលអតិថិជនដែលមានវ័យចំណាស់ៗ។ ប៉ុន្តែវាគ្រាន់តែជាគម្រោងមួយប៉ុណ្ណោះ ព្រោះវិបត្តិសេដ្ឋកិច្ចបានរួមរឹត មិនឲ្យក្រុមហ៊ុននោះអាចធ្វើអ្វីបានទាំងអស់។
ការទិញដាច់កាលពីថ្ងៃទី៣០ ខែតុលានេះ នឹងត្រូវបញ្ជាក់សារជាថ្មី ក្នុងរយៈពេល៣០ថ្ងៃ។ តែបើការទូទាត់ បានប្រព្រឹត្តិទៅច្បាស់លាស់ហើយ អ្នកទិញនឹងក្លាយជាម្ចាស់ភូមិ ព្រមទាំងមានសិទ្ធិធ្វើការអភិវឌ្ឍន៍ភូមិនេះជាថ្មី។ ប៉ុន្តែបើមើលក្នុងវីដេអូ ដែលទូរទស្សន៍ Bloomberg News បានថតកាលពីពេលថ្មីៗនេះ បង្ហាញថា ភូមិរហោឋាននេះ មានលក្ខណៈជាភូមិ«ខ្មោច» ជៀសជាងភូមិសម្រាប់មនុស្សរស់នៅ៕