ឃុំ​ខ្លួន ថោង សារ៉ាត់ នៅ​ពន្ធនាគារ​ព្រៃ​សរ

បន្ទាប់ពីត្រូវបានបញ្ជូនខ្លួន ពីប្រទេសវៀតណាម មកកម្ពុជា កាលពីយប់ថ្ងៃទី១៦ ខែមេសានោះ លោក ថោង សារ៉ាត់ ជន​សង្ស័យ​លេខ​មួយ ក្នុងសំនុំរឿងបាញ់ប្រហារ លោកឧកញ៉ា អ៊ឹង ម៉េងជឺ កាលពីចុងឆ្នាំ២០១៤ ត្រូវបានតុលាការសម្រេច ឲ្យឃុំខ្លួន ទៅ​កាន់​ពន្ធនាគារ​ព្រៃ​សហើយ នៅម៉ោង ៥ និង ២០នាទី ល្ងាចមួយថ្ងៃក្រោយមក។
Loading...
  • ដោយ: ដារា រិទ្ធ អត្ថបទ និងយកការណ៍៖ ដារា រិទ្ធ ([email protected]) - ភ្នំពេញថ្ងៃទី១៧ មេសា ២០១៥
  • កែប្រែចុងក្រោយ: April 18, 2015
  • ប្រធានបទ: ឧក្រិដ្ឋកម្ម
  • អត្ថបទ: មានបញ្ហា?
  • មតិ-យោបល់

លោក ថោង សារ៉ាត់ ជនសង្ស័យទីមួយ ក្នុងសំនុំរឿងឃាតកម្ម បាញ់សម្លាប់ឧកញ៉ា អ៊ឹង ម៉េងជឺ យ៉ាងកក្រើកភ្នំពេញ កាល​ពីចុងឆ្នាំ២០១៤ ត្រូវបានតុលាការសាលាដំបូង រាជធានីភ្នំពេញ សម្រេចឲ្យឃុំខ្លួន ទៅពន្ធនាគារព្រៃសរ ក្រោម​បទ​ចោទប្រកាន់ ថាបានផ្តួចផ្តើមគំនិត ក្នុងអំពើឃាតកម្មគិតទុក ជាមុន និងប្រើប្រាស់អាវុធ ដោយគ្មានការអនុញ្ញាត។

ការសម្រេចរបស់តុលាការ ត្រូវបានធ្វើភ្លាមៗ នៅវេលាម៉ោង៥ និង២០នាទី ល្ងាចថ្ងៃសុក្រ ទី១៧ ខែមេសា មួយថ្ងៃក្រោយ បន្ទាប់ពីអាជ្ញាធរនៃប្រទេសវៀតណាម បានចាប់ខ្លួនជនសង្ស័យរូបនេះ កាលពីថ្ងៃព្រហស្បត្តិ៍ និងបញ្ជូនមកឲ្យ​អាជ្ញាធរ​កម្ពុជា នៅយប់ថ្ងៃដដែល។

ការចាប់ឃាត់ខ្លួន លោក ថោង សារ៉ាត់ ដែលមានថានៈ ជាឧត្តមសេនីយ៍ទោ ក្នុងក្រសួងការពារជាតិរូបនេះ ដោយ​យោង​ទៅលើដីការឃាត់ខ្លួន របស់នគរបាលអន្តរជាតិ (Interpol) ដែលបានធ្វើ ទៅតាមការស្នើសុំ របស់អាជ្ញាធរកម្ពុជា ក្នុង​សំនុំ​រឿងឧក្រិដ្ឋកម្មធ្ងន់ធ្ងរ ទាក់ទងនឹងការបាញ់សម្លាប់ ប្រធានក្រុមហ៊ុនមួយរូប នៅកណ្ដាលរាជធានីភ្នំពេញ។ លោក​ឧកញ៉ា អ៊ឹង ម៉េងជឺ ជនរងគ្រោះ បានស្លាប់ភ្លាមៗ បន្ទាប់ពីរងការបាញ់ប្រហារ ជាច្រើនគ្រាប់ ពីសំណាក់ខ្មាន់កាំភ្លើង នៅ​ខាង​មុខហាង លក់ផ្លែឈើ​មួយ​កន្លែង ជិតរបងស្ដាតអូរឡាំពិក សង្កាត់ទួលស្វាយព្រៃទី២ ខណ្ឌចំការមន កាលពីយប់​ថ្ងៃទី ២២ ខែវិច្ឆិកា ឆ្នាំ២០១៤ កន្លង​មក។

ក្រុមអ្នកស៊ើបអង្កេត របស់កម្ពុជា បានដាក់ការសង្ស័យ ជុំវិញឃាតកម្មនេះថា គឺជារឿងគំនុំ ក្នុងមុខជំនួញ ហើយបាន​ចាប់​ឃាត់ខ្លួន ក្រុមអង្គរក្ស របស់លោក ថោង សារ៉ាត់ ចំនួន ៤នាក់ ដែលក្រុមអ្នកស៊ើបអង្កេត បានគិតថា ជាអ្នកអនុវត្តន៍​ជាក់​ស្ដែង នៅក្នុងអំពើឃាតកម្មនេះ។ ក្រុមអង្គរក្សទាំង៤រូប ក៏ត្រូវបានតុលាការសម្រេច ចោទប្រកាន់ និងឲ្យឃុំខ្លួន នៅ​ពន្ធនាគារ​ព្រៃសរ ពីបទឃាតកម្មគិតទុកជាមុន។ ប៉ុន្តែតុលាការ នៅមិនទាន់ប្រកាសសាលដីកា ផ្តន្ទាទោសយ៉ាង​ណា​នៅ​ឡើយ។

ប៉ុន្តែសម្រាប់ក្រុមអង្គរក្សទាំងបួនវិញ ពួកគេបានឆ្លើយបដិសេធ នៅចំពោះចៅក្រមស៊ើបអង្កេត នូវរាល់ចម្លើយសារភាព ដែលពួកគេបានធ្វើជាមួយនគរបាល ដោយបញ្ជាក់ថា ចម្លើយសារភាពទាំងនោះ ត្រូវបានធ្វើឡើង ដើម្បីឲ្យពួកគេបាន​រួច​ផុត ពីការធ្វើទារុណកម្ម របស់ក្រុមនគរបាល អ្នកសួរចម្លើយ។ ស្រង់សម្ដីដោយវិទ្យុអាស៊ីសេរី ផ្សាយជាភាសា​វៀតណាម អង្គរក្សមួយរូប ដែលនិយាយភាសាវៀតណាម បានបញ្ជាក់ថា ខ្លួនគេគ្មានការជាប់ពាក់ព័ន្ធ ក្នុងឃាតកម្មនេះទេ ហើយ​បាន​អះអាងទៀតថា ថ្ងៃកើតហេតុ ខ្លួនគេមិនមានវត្តមាន នៅរាជធានីភ្នំពេញឡើយ។

ក្រៅពីអង្គរក្សទាំងបួននាក់ របស់លោក ថោង សារ៉ាត់ តុលាការសាលាដំបូងដដែល ក៏បានធ្វើការឃុំខ្លួនលោក ថោង ចំរើន និង អ្នកស្រី កែវ សារី ដែលឪពុកម្តាយរបស់លោក ថោង សារ៉ាត់ នៅពន្ធនាគារព្រៃសរ ដូចគ្នាដែរ ដោយជាប់ចោទ ពីការប្រើប្រាស់ និងលាក់ទុក អាវុធខុសច្បាប់។ ប៉ុន្តែ ឪពុកម្តាលលោក ថោង សារ៉ាត់ ត្រូវបានដោះលែងកាល ពីថ្ងៃ​សៅរិ៍​ទី៧ ខែកុម្ភៈកន្លងមក ដោយអំណាចដីការមួយ របស់ចៅក្រមស៊ើបអង្កេត មុននឹងចាប់ខ្លួនមកវិញ នៅព្រឹកថ្ងៃទី ១៥ ខែ​កុម្ភៈ ក្រោមបញ្ជារបស់លោក ហ៊ុន សែន នាយករដ្ឋមន្ត្រីកម្ពុជា។ អ្នកទាំងពីរបានរងការចោទប្រកាន់ថា បានព្យាយាម​រត់​ចេញ ទៅប្រទេសវៀតណាម តាម​ខេត្ត​ស្វាយរៀង៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ conta[email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...