នៅពេលកុមារបានសម្រេចចិត្ត ទិញរថយន្ដមួយគ្រឿង ឲ្យម្ដាយរបស់ខ្លួននោះ កុមារ កូរី នៀវេស (Cory Nieves) ទើបតែមានអាយុ៥ឆ្នាំប៉ុណ្ណោះ។ ដោយសារតែធុញទ្រាន់ ក្នុងការជិះរថយន្ដសាលាទាំងត្រជាក់នោះពេក កុមារ កូរី បានដាក់តូបមួយ នៅខាងមុខផ្ទះដែលស្ថិតក្នុងក្រុង ញ៉ូចេស៊ី (New Jersey - ផ្នែកឦសាននៃសហរដ្ឋអាមេរិក) ដើម្បីលក់ភេសជ្ជៈ សូកូឡាក្ដៅ។ ប្រាំឆ្នាំក្រោយមក កុមារតូចរូបនេះ បានក្លាយជាម្ចាស់ហាងមួយឈ្មោះ «Mr. Cory's cookies» ដែលបន្ថែមពីអ្វីដែលកុមារធ្លាប់លក់នោះ បច្ចុប្បន្នកុមារបានបន្ថែម លក់នំប៊ីស្គីប្រចាំហាង រាប់​សិប​ពាន់​ទៀត។

ឆ្លងកាត់រយៈពេលប៉ុន្មានឆ្នាំមកនេះ កុមារតូចល្អិត ត្រូវបានប្រព័ន្ធផ្សព្វផ្សាយនៅសហរដ្ឋអាមេរិក ចាប់​អារម្មណ៍​យ៉ាងខ្លាំង។ កុមារយើង ថែមទាំងត្រូវបានអញ្ជើញឲ្យចូលរួម ក្នុងកម្មវិធីដ៏ល្បីមួយរបស់លោកស្រី អេឡេន ឌឺហ្សេណែរ (Ellen DeGeneres) នោះផងទៀត។

កុមារ កូរី បានពន្យល់នៅក្នុងកម្មវិធីនោះថា៖ «យើងប្រើប្រាស់សូកូឡាគ្រាប់ ស្រូវសាលី ទំពាំងបាយជូរ និង​ប៊័រ។ គ្រឿងផ្សំរបស់យើង សុទ្ធសឹងមានលក្ខណៈជីវសាស្ត្រទាំងអស់ ហើយមានប្រភពយីហោ​ច្បាស់​លាស់។»

នៅសហរដ្ឋអាមេរិក កុមារមិនត្រូវបានអនុញ្ញាតឲ្យធ្វើការទេ។ តែកុមារ កូរី អាចជួយម្ដាយខ្លួន ជារៀងរាល់​ថ្ងៃសៅរ៍ ហើយជាអ្នកទទួលខុសត្រូវ ខាងយុទ្ធសាស្ត្រទីផ្សារ របស់ក្រុមហ៊ុនតូចរបស់ខ្លួន។ ជាមួយនឹងប្រាក់​ដែលខ្លួនរកបាន កុមារបានកំណត់ក្ដីសង្ឃឹមរួចជាស្រេច នោះគឺការសិក្សា ក្នុងសកលវិទ្យាល័យដ៏ល្បីមួយ នាពេលអានាគត។ កុមារ កូរី បានបង្ហាញពីបំណងរបស់ខ្លួន ក្នុងការចាប់យកជំនាញថ្មីមួយទៀត៖ ធ្វើជា​អ្នក​រចនាម៉ូដ៕