តាំងពីពេលកើតមក ទារកដ៏តូចមួយនេះ មានសភាពក្ដៅខ្លួន មិនស្រាកសោះ។ ក្ដីបារម្ភបានកើតឡើង ចំពោះឪពុកម្ដាយ​របស់ទារក រហូតយកកូន ដែលទើបនឹងកើតរបស់ខ្លួន ទៅឲ្យគ្រូសិល្ប៍ក្នុងភូមិម្នាក់ ដើម្បីពិនិត្យព្យាបាល។ បន្ទាប់ពីធ្វើ​ពិធី​បញ្ជាន់អារក្សរួច ស្ត្រីជាគ្រូសិល្ប៍បាននិយាយប្រាប់ទៅម្ដាយទារក ឲ្យចាប់ក និងក្បាល កូនរបស់ខ្លួន ហើយបង្ខំឲ្យវាដើរ។ គ្រូអូមអាមនោះ បានអះអាងថា ធ្វើដូច្នេះ កម្ដៅក្នុងខ្លួន នឹងថយចុះ ហើយជំងឺគ្រុនរបស់ទារក នឹងបានជាសះស្បើយ។

នៅក្នុងឈុតឆាក នៃការចាប់បង្ខំទារកអាយុ២ថ្ងៃ ឲ្យដើរនោះ មានការចូលរួម ពីអ្នកភូមិប្រមាណជា ១០នាក់។ ម្នាក់​ពីក្នុង​ចំណោមនោះ បានថតហេតុការណ៍នេះ រួចយកទៅរាយការណ៍ ប្រាប់នគរបាល។ ក្រុមអាជ្ញាធរបានចូល ធ្វើអន្តរាគមន៍ ឲ្យបញ្ឈប់ការបញ្ជាន់អារក្ស និងបានបញ្ជូនទារក ទៅកាន់មន្ទីរពេទ្យ។ នាយនគរបាលមួយរូប បានថ្លែងប្រាប់សារព័ត៌មាន ក្នុងតំបន់ថា៖ «ទារកមានជំងឺគ្រុន។ តែឥឡូវនេះ ទារកបានរួចផុតពីគ្រោះថ្នាក់ ហើយមានសុខភាពល្អណាស់។»

បើតាមទូរទស្សន៍ NDTV របស់ឥណ្ឌា បានឲ្យដឹងថា ស្ត្រីពីរនាក់ និងគ្រូធ្មប់ចេះធ្វើសិល្ប៍ម្នាក់ ត្រូវបានចាប់ខ្លួន ពីបទ​បោក​បន្លំ និងបញ្ជាឲ្យធ្វើទារុណកម្ម លើទារក។ រីឯអាជ្ញាធរឥណ្ឌាវិញ ដែលត្រូវបានរាយការណ៍ ពីភាពល្ងិតល្ងង់របស់ពលរដ្ឋ នៅ​ក្នុងតំបន់មួយចំនួននោះ កំពុងពន្លឿនការកែទម្រង់ ផ្នែកគាំពារសុខភាព ទៅឲ្យដល់តំបន់ដាច់ស្រយ៉ាល ទាំងនោះ។ តំណាងម្នាក់ ពីខាងរដ្ឋការឥណ្ឌា បានថ្លែងក្នុងទូរទស្សន៍ថា៖ «យើងក៏កំពុងធ្វើការ នៅក្នុងយុទ្ធនាការមួយ ដើម្បីបង្រៀន​ជូន​ដំណឹង ទៅដល់ពលរដ្ឋ ឲ្យដឹងពីអ្វីដែលត្រូវធ្វើ និងពីអ្វី ដែលត្រូវជ្រៀសវាង»៕

» វីដេអូ នៅក្នុងហេតុការណ៍ដដែលនេះ៖