ស្រ្តីដែលបានទទួលរង នូវជម្ងឺចម្លែកនេះ ឈ្មោះ មករា អាយុ ២៣ ឆ្នាំ រស់នៅភូមិកំពង់ប្រាសាទ ឃុំសែប ស្រុក​កំពង់ត្រឡាច ខេត្តកំពង់ឆ្នាំង។ បច្ចុប្បន្ន ស្ថានភាពជំងឺរបស់នាង ត្រូវបានគ្រួសារនាងប្រាប់ឲ្យដឹងថា នាងនៅ​អាចទទួលទានអាហារបាន ប៉ុន្តែពេលដែលអាកាសធាតុប្រែប្រួល ខ្លូនប្រាណរបស់នាងចាប់ផ្តើមធ្វើទុក្ខ ដូចជា​ក្តៅ រមាស់ខ្លាំង នៅត្រង់របួស មានការឈឺចាប់ជាដើម។

មានជំងឺចម្លែកនេះ ចេញដំបៅពងបែក គ្រប់កន្លែងត្រង់ ក្បាល ត្រចៀក អណ្ដាត មាត់ ច្រមុះ គ្រប់កន្លែងនៅលើ​ស្បែកពេញខ្លួន។ បន្ទាប់ពីកើតមានជម្ងឺនេះ ក្រុមគ្រួសាររបស់យុវតីខាងលើ បានបញ្ជូននាងទៅមន្ទីពេទ្យ ដើម្បី​ព្យាបាល គ្រូពេទ្យបានបញ្ជាក់ថា នាងមានជម្ងឺ «លុយពីស» ដែលគ្រួសារនាងប្រាប់ថា មិនដែលមានអ្នកភូមិ​ណា​ម្នាក់ ធ្លាប់កើតជំងឺបែបនេះ ពីមុនមកទេ។

អ្នកស្រីជាម្តាយ បានថ្លែងប្រាប់ទស្សនាវដ្តីមនោរម្យ.អាំងហ្វូថា ជម្ងឺនេះបានកើត លើខ្លួនកូនស្រីរបស់គាត់ តាំងពី​នាងអាយុ ២០ឆ្នាំមកម្លេះ មកដល់ពេលនេះ កូនស្រីគាត់អយុ២៣ ឆ្នាំហើយ នៅតែមើលមិនជា។ អ្នកស្រីបាន​ព្យាយាម​អស់ពីលទ្ធភាព ដើម្បីកូនស្រីអាចជាសះ ពីជំងឺចម្លែកនេះ។ តែអ្នកស្រីបានអះអាងថា ដោយជីវភាព​ខ្វះ​ខាត គ្មានលុយព្យាបាលជំងឺ របស់កូនស្រីបន្តទៀត ទើបអ្នកស្រីបានសម្រេចលក់ផ្ទះ ដើម្បីព្យាបាលជំងឺរបស់​កូន​ស្រី ក៏ប៉ុន្តែអាការៈជំងឺ នៅតែមិនបានជាសះដដែល។

ស្ត្រីជាម្ដាយ បានថ្លែងទាំងក្រៀមក្រំថា សព្វថ្ងៃអ្នកស្រីរស់នៅ តែពីរនាក់ម្ដាយនិងកូន ដោយសុំក្រោមផ្ទះគេ បាំង​ស្នាក់នៅប៉ុណ្ណោះ។ អ្នកស្រីមានមុខរបរ លក់នំពុម្ភបន្តិចបន្តួច ហើយជាស្ត្រីម៉េមាយ ដែលពិបាកនិយាយ​ពី​ទី​ពំនឹង ដើម្បីរស់នៅក្នុងសង្គម ដូចគេឯងណាស់៕