ស្ត្រីអាយុ៤១ឆ្នាំ ត្រូវបានអាជ្ញាធរសង្ស័យថា បានទុកកូនប្រុស ដែលពិការ ស្វិតដៃជើងដ៏ធ្ងន់ធ្ងរ ចោលនៅក្នុងព្រៃ ដើម្បី​ទៅរស់នៅជាមួយ បុរសជាគូកំណាន់របស់ខ្លួន។ ហេតុការណ៍ដ៏គួរឲ្យតក់ស្លុត ចំពោះយុវជនពិការ ត្រូវបានស្ថានីយ៍​ទូរទស្សន៍ CBS News យកមករាយការណ៍ កាលពីចុងសប្ដាហ៍នេះ បង្កឲ្យមានកំហឹងផ្ទុះឡើង នៅសហរដ្ឋអាមេរិក។ ស្ត្រី​រូបនោះ ត្រូវបានអាជ្ញាធរឃាត់ខ្លួន បន្ទាប់ពីយុវជនពិការ ជាកូន ត្រូវបានរកឃើញ នៅក្នុងព្រៃ កូបក្រិក (Cobbs Creek) នៃ​រដ្ឋ​ហ្វីឡាដែលហ្វី កាលពីថ្ងៃសុក្រសប្ដាហ៍មុន។

រកឃើញ នៅក្នុងភួយ ជាមួយនឹងគុម្ពីព្រះគ្រីស្ទ៍

នៅពេលដែល ត្រូវបានរកឃើញដំបូង យុវជនដែលស្វិតដៃជើង បានដេកស្ងៀម នៅក្នុងភួយ ហើយមានសៀវភៅ គុម្ពី​ព្រះ​គ្រីស្ទ៍មួយក្បាល នៅពីលើខ្លួន។ រទេះរុញ សម្រាប់ជនពិការ ក៏ស្ថិតនៅជិតនេះដែរ។ យុវជនកំសត់ បាននៅដេក​ស្ងៀម​របៀប​នេះ អស់រយៈពេលជាច្រើនថ្ងៃមកហើយ អត់ទឹក គ្មានអាហារ រហូតលុះត្រាយុវជន ត្រូវបានអ្នកដើរកំសាន្ដម្នាក់ ប្រទះ​ឃើញ ហើយជួយយកអាសារ។

យុវជនត្រូវបានបញ្ជូន ឲ្យទៅពិនិត្យព្យាបាលខ្លួន នៅមន្ទីរពេទ្យ ហ្វីឡាដែលហ្វី ព្រោះអាការៈ ខ្សោះជាតិទឹក និងខ្វះចំណី ព្រមទាំងមានបញ្ហា ដល់ភ្នែកទាំងគូ។ ស្ថានភាពរបស់យុវជន នៅថ្ងៃនេះ មានសភាពធម្មតា មិនប្រែប្រួលអ្វីឡើយ។

បើតាមប្រព័ន្ធផ្សព្វផ្សាយអាមេរិកាំង បានឲ្យដឹងថា ម្ដាយរបស់យុវជនពិការ បានទុកកូនខ្លួនចោល ក្នុងព្រៃ ហើយបាន​ធ្វើ​ដំណើរ តាមរថយន្ដក្រុង ដើម្បីរស់នៅ ជាមួយប្រុសស្នេហ៍របស់ខ្លួន ដែលកំពុងរស់នៅ ក្នុងរដ្ឋម៉ារីឡេន។ អាជ្ញាធរ​បាន​រក​ឃើញ បទ​ចោទ​ជាច្រើន សម្រាប់ដាក់បន្ទុក ប្រឆាំងនឹងស្ត្រីជាម្ដាយរូបនេះ ក្នុងនោះ មាន«បង្ករបួសស្នាម» «ការខ្ជីខ្ជារ» «ការ​បង្ខាំងខ្លួន​ខុស​ច្បាប់» និង​«មិន​យក​អាសារ​ជន ដែលត្រូវការជំនួយ» ជាដើម៕