នគរបាលសហរដ្ឋអាមេរិក ដូចជាមិនសូវខ្វះរឿងប៉ុន្មានទេ ក្នុងរយៈពេលចុងក្រោយនេះ។ បន្ទាប់ពីបានបាញ់បោះ ទៅ​លើ​ជន​ស៊ីវិលគ្មានអាវុធ ឬច្រឡំបាញ់កាំភ្លើងគ្រាប់ពិត... តែនៅពេលនេះ ជាការបើករថយន្ដនគរបាល តម្រង់ទៅបុក​ជន​សង្ស័យម្នាក់ យ៉ាងពេញទំហឹងតែម្ដង។ ប៉ុន្តែលើកនេះ នគរបាលបានអះអាងថា វាជាទង្វើខុសទម្លាប់មួយ ដោយសារ​តែ​ក្រុម​​ខ្លួន​គ្មាន​​ជម្រើស។

ហេតុការណ៍បានកើតឡើង នៅខែកុម្ភៈកន្លងទៅ តែវីដេអូទើបនឹងទម្លាយមកឲ្យដឹង នៅថ្ងៃពុធនេះប៉ុណ្ណោះ។ ជា​រូបភាព​ដ៏តក់ស្លុត ដែលថតជាប់ ដោយម៉ាស៊ីនថត ជាប់នឹងរថយន្ដនគរបាល ផ្ទាល់តែម្ដង ហើយទើបនឹងត្រូវបាន អាជ្ញាធរ​រដ្ឋ​អារីហ្សូណា (ភាគខាងលិច នៃសហរដ្ឋអាមេរិក) យកមកផ្សាយជាសាធារណៈ ដោយបញ្ចេញដំបូងគេ នៅលើ​កញ្ចក់​ទូរទស្សន៍ អាប៊ីស៊ីញ៉ូ (ABC News)។

នគរបាលបានពន្យល់ថា ជនសង្ស័យ ត្រូវបានតាមប្រមាញ់ឲ្យក្រុមនគរបាល បន្ទាប់ពីបានចូលក្នុងព្រះវិហារមួយ ហើយ​បានធ្វើការបាញ់បោះ នៅទីនោះ។ មុននឹងមកដល់ក្នុងព្រះវិហារ ជនសង្ស័យត្រូវបានសង្ស័យដែរថា បានលួចរថយន្ដ​មួយ​គ្រឿង។ នៅ​ពេល​ដែលកងនគរបាល បានឃើញជននេះ នៅតាមដងផ្លូវ ជនសង្ស័យបានបើកការបាញ់រះ ដោយប្រើ​កាំភ្លើង ពាក់​កណ្ដាល​ស្វ័យប្រវត្តិមួយដើម ជាមួយនឹងបង់គ្រាប់ជាច្រើន នៅជាប់នឹងខ្លួន។

រថយន្ដនគរបាល ដែលថតរូបភាពដំបូង ជាអ្នកទទួលបន្ទុកតាមជនសង្ស័យ ពីចំងាយ ដែលទំនងជាពីមិនចង់ ប្រឈម​នឹង​​ជនសង្ស័យ ដែលប្រដាប់ដោយអាវុធម្នាក់នេះ។ គេឮសូរភ្នាក់ងារនគរបាលម្នាក់ បាននិយាយថា៖ «នៅឲ្យឆ្ងាយ​បន្តិច... កាំភ្លើងវាមានគ្រាប់»។ បន្ទាប់មក គេឃើញរថយន្ដទីពីរ បានបើកពីចំងាយយ៉ាងលឿន សំដៅជនសង្ស័យត្រង់​តែម្ដង។

ទោះជាត្រូវបានបុក បំប៉ើងដូចសំឡីក៏ដោយ តែជនសង្ស័យមិនបានស្លាប់ទេ។ បុរសនេះត្រូវបានដឹក ទៅកាន់មន្ទីរពេទ្យ ហើយត្រូវបានសាកសួរ និងរងការស៊ើបអង្កេត នៅពេលក្រោយមក។

ប៉ុន្តែនគរបាលវិញ បានព្យាយាមពន្យល់ ពីទង្វើរបស់ខ្លួនថា ដោយសារជនសង្ស័យ មានលក្ខណៈ«គ្រោះថ្នាក់» សម្រាប់​ហាង​ទំនិញមួយ នៅជិតនោះ។ ជាពិសេស ដោយសារបុរសនោះ ស្ថិតនៅឆ្ងាយ ពិបាកបង្ក្រាបពេក នគរបាលមានតែ​ប្រើ​វិធីនេះ ដើម្បីបង្ខំឲ្យជននេះទម្លាក់អាវុធ។ ភ្នាក់ងារនគរបាល ដែលជាអ្នកបើករថយន្ដបំបុកនេះ ត្រូវបានគេរាយការណ៍​មក​ថា មិនមានការខ្វាយខ្វល់អ្វីឡើយ ហើយភ្នាក់ងាររូបនោះ បានចូលមកធ្វើការ ដូចធម្មតា។ ចំពោះនាយនគរបាលវិញ បាន​​ទទួល​​ស្គាល់​​ថា វិធីសាស្ត្ររបស់ភ្នាក់ងាខាងលើ ដូចជាខុសពីទម្លាប់កន្លងមក... បន្តិចហើយ៕