ចាក់ថ្នាំ«ខុស​បច្ចេកទេស» បង្ក​ការ​រង​ទុក្ខ​ដល់​​កុមារី និង​គ្រួសារ ឲ្យ​ធ្លាក់​ខ្លួន​បែប​នេះ តើ​ត្រូវ​ទៅ​បន្ទោស​នរណា? បើ​ស្ថានភាព​នេះ ធ្លាក់​មក​លើ​រូប​អ្នក​ផ្ទាល់​វិញ តើ​​អ្នក​នឹង​ត្រូវ​ដោះ​ស្រាយ​របៀប​ម៉េច?

នេះ​ជា​ភាព​ចំបែង​ខ្លោច​ផ្សារ តាំង​ពី​ជាង​បី​ឆ្នាំ​មក​ហើយ ទៅ​លើ​គ្រួសារ​របស់​កុមារី​មួយ​រូប​ឈ្មោះ ស្រី​ល័ក្ខ បន្ទាប់​ពី​នាង​ធ្លាក់​ខ្លួន​ឈឺ ហើយ​មិន​អាច​ក្រោក​ដើរ​ហើរ​បាន ដូច​ជា​កុមារ​ដទៃ​ទៀត។ ចាប់​ប្រភព​ក្នុង​គ្រួសារ​មាន​ជីវភាព​​ក្រីក្រ ហើយ​មាន​​ប្អូន​តូច​ដល់​ទៅ​បួន​នាក់ ដែល​ត្រូវ​ចិញ្ចឹម​ថែ​រក្សា ប៉ុន្តែ​ម្តាយ​ឪពុក​របស់ ស្រី​ល័ក្ខ ត្រូវ​ចំណាយទាំងកម្លាំងកាយចិត្ត និង​សព្វ​គ្រប់​មធ្យោបាយ ដើម្បី​មើល​ថែ​រក្សា​ ស្រី​ល័ក្ខ ទាំង​យប់​ទំាង​ថ្ងៃ។ នោះ ដោយ​សារ​តែ​ពិការ​ភាព​របស់​នាង ដែល​កើត​ឡើង​ពី​ការ​ស្វិត​អស់​ដៃ​ជើង ធ្វើ​ចលនា​អ្វី​លែង​កើត​ទាំង​អស់។

រាល់​ពេល​ញុំា​បាយ ងួត​ទឹក ម្តាយ​ឪពុក​របស់​ស្រី​ល័ក្ខ ជា​អ្នក​បីបាច់បំរើនាងទាំងអស់ គ្មានចន្លោះក្នុង​កិច្ចការ​ណាមួយឡើយ ប្រៀបដូចជានាងជាទារកមួយ ដែលទើបតែកើតមកអញ្ចឹងដែរ។ ប៉ុន្តែ ស្រីល័ក្ខមិនមែន​ជា​ទារិកាតូចទៀតទេ ព្រោះនាងមានវ័យ ១៤ឆ្នាំ ហើយ។ ហេតុការណ៍ដ៏គួរឲ្យតក់ស្លុត​ គឺ​នៅពេលដែលគេបាន​ឃើញកាយសម្បទារបស់នាង ក្លាយជារូមតូចលែងមានសាច់ឈាម អស់ទាំងកំលាំងល្ហិតល្ហៃ បើសូម្បីតែ​កម្រើក ក៍នាងសឹងតែមិនអាចធ្វើបានផង។

នៅពេលដែលយកនាងមកមន្ទីរពេទ្យគន្ធបុប្ផា គ្រូពេទ្យនៅទីនោះ បានប្រាប់ឪពុកនាងថា នាងមានជំងឺប្រព័ន្ធ​សសៃរប្រសាទម្យ៉ាង ប៉ុន្តែមិនទាន់បានប្រាប់ថា ជំងឺនេះអាចព្យាបាលបាន ឬមិនបាននោះទេ។ មុននឹង​មក​ព្យាបាលនៅមន្ទីពេទ្យគន្ធបុប្ផា ស្រីល័ក្ខធ្លាប់បានទទួលការព្យាបាល ពីមន្ទីពេទ្យបង្អែកនៅខេត្រក្រចេះ ដែល​ជាស្រុកកំណើតរបស់នាងរួចហើយ ប៉ុន្តែអ្វីៗដូចជានៅតែបន្តទៅមុខ គ្មានការស្រាកស្រាន្ដណាឡើយ។

និយាយរំលឹកឡើងវិញ ពីរឿងដ៏អាណោចអាធមនេះ គេត្រូវនឹកគិតព្រឹត្តិការណ៍ដ៏​ធ្វេស​ប្រហែស របស់ក្រុម​គ្រូ​ពេទ្យ​មក​ពីខេត្តក្រចេះ ខណៈស្រីល័ក្ខនៅមានកាយសម្បទារល្អប្រសើរនៅឡើយ។ កាលពីជាង៣ឆ្នាំកន្លងទៅ ខណៈដែលស្រីល័ក្ខ បាន​រៀនដល់ថ្នាក់​ទី៧​ទៅហើយ ក្រុមគ្រូពេទ្យទាំងនោះ បានចុះមកចាក់ថ្នាំការពារជំងឺ​តេតាណូសនេះ ដល់សាលា​របស់នាង។ បន្ទាប់ពីពេលនោះមក ការបង្ការោគតេតាណូសទំនង​ជាបាន​សម្រេច តែជំងឺល្ហិតល្ហៃដៃជើង បានចូលមក​សណ្ឋិតក្នុងខ្លួននាងតូចម្ដងវិញ រហូតធ្វើឲ្យស្រីល័ក្ខ ដើរលែងរួច​សោះតែ​ម្ដង។ ដោយសារតែហេតុ​នេះដែរ ទើប​នាងតូចត្រូវបង្ខំចិត្ត បញ្ចប់ការសិក្សារបស់នាង ត្រឹមតែថ្នាក់ទី៧​ប៉ុណ្ណេះ។

និស្សិតពេទ្យម្នាក់ ដែលកំពុងបន្តការសិក្សានៅប្រទេសរុស្ស៊ី បានប្រាប់ទស្សនាវដ្តីមនោរម្យ.អាំងហ្វូថា កត្តា​ដែលនាំឲ្យស្រីល័្ខ ក្លាយជាមានសភាពដូច្នេះ មិនមែនបណ្តាលមកពី ថ្នាំតេតាណូសដែលគ្រូពេទ្រ​ចាក់​ឲ្យ​នោះ​ទេ ប៉ុន្តែវាអាចជាការចាក់ទៅប៉ះចំ ប្រព័ន្ធសរសៃប្រសាទ (Nerf Sciatique) ណាមួយ ដែលមានតួនាទីបញ្ជារ​លើចលនាសារពាង្គកាយ ទើបធ្វើឲ្យនាងតូចមានសភាពដូច្នេះ។

សព្វថ្ងៃ ម្តាយឪពុក និងគ្រួសាររបស់ស្រីល័ក្ខ កំពុងជួបនូវភាពលំបាកលំបិនជាខ្លាំង ណាមួយទាក់ទងនឹង​ជីវភាពដ៏ខ្វះខាត ស្រីល័ក្ខក៏ឈឺសម្រាកនៅមន្ទីរពេទ្យ និងណាមួយគ្មានអ្នកនៅមើលថែ កូនតូចៗរបស់​គាត់នៅ​ផ្ទះទៀត។ ឪពុករបស់ស្រីល័ក្ខដែលជាមេគ្រួសារ ត្រូវមានភារៈរកប្រាក់មកផ្គត់ផ្គង់ជីវភាពគ្រួសារផង ហើយ​គាត់ត្រូវមកមើលថែជំងឺស្រីល័ក្ខ នៅក្នុងមន្ទីរពេទ្យគន្ធបុប្ផាផង។ ប៉ុន្តែជំងឺរបស់ស្រីល័ក្ខ មិនអនុញ្ញាតឲ្យ​គាត់​អាច​ចេញ ទៅធ្វើការងាររកទទួលទានបាន ដោយពេញដៃពេញជើងឡើយ។ រីឯម្តាយរបស់ស្រីល័ក្ខវិញ បាន​ចេញ​ក្រៅ ដើរស៊ីឈ្នួលគេតាមអ្វីដែលគាត់អាចធ្វើបាន ដើម្បីបានកម្រៃមកដោះស្រាយជីវភាពគ្រួសារ ដែលជា​ហេតុ​ធ្វើឲ្យគាត់ត្រូវទុកកូនតូចៗនៅផ្ទះ ទាំងរហង់មិនមានអ្នកថែទាំដូចពីមុន។

ឪពុករបស់ស្រីល័ក្ខ បានអំពាវនាវដល់អ្នកដែលមានចិត្តសម្បុរសធម៌ ឲ្យជួយឧបត្ថម្ភដល់គ្រួសារគាត់ ដែល​កំពុងខ្វះខាត និងកូនស្រីរបស់គាត់ ដែលកំពុងសម្រាកព្យាបាល នៅក្នុងមន្ទីពេទ្យគន្ធបុប្ផា។ ភាពលំបាក​លំបិន​របស់គ្រួសារនេះ បានជំរុញឲ្យអង្គការមនុស្សធម៌មួយហៅថា HOPE ចូលរួមជួយឈឺឆ្អាល តែមិនមាន​លទ្ធភាព​គ្រប់គ្រាន់ ដើម្បីជួយស្រីល័ក្ខ និងគ្រួសារទាំងមូលឡើយ។ បុគ្គលិកមួយរូបពីអង្គការនេះ អ្នកស្រី កែប ច័ន្ទសមា បាន​និយាយ​ថា សប្បុរសជនអាចទាក់ទងទៅអង្គការ HOPE ក៏បានដេែរ ប្រសិនជា​ពិបាកក្នុងការទំនាក់ទំនង ទៅ​គ្រួសាររបស់ស្រីល័ក្ខ៕