យុវជនរួមគ្នាបង្កើតជា «សភាត្រាប់» បង្រៀនសភាពិត? (vdo)
- ដោយ: អ៊ុម វ៉ារី អត្ថបទ៖ អ៊ុម វ៉ារី ([email protected]) - យកការណ៍៖ ស្រ៊ុន ទិត្យ - ភ្នំពេញ ថ្ងៃទី២៥ ធ្នូ ២០១៤
- កែប្រែចុងក្រោយ: December 28, 2014
- ប្រធានបទ: និតិបញ្ញត្តិ
- អត្ថបទ: មានបញ្ហា?
- មតិ-យោបល់
-
ជាយុវជនកម្ពុជាម្នាក់ យុវជនចង់បង្ហាញពីគំនិត និងយោបល់មួយចំនួន ដែលរួមមានទាំងគុណសម្បត្តិ និងគុណវិបត្តិ ក្នុងការចេញសេចក្តីព្រាងច្បាប់ផ្សេងៗ ពិសេសច្បាប់បោះឆ្នោត។ នេះជាការលើកឡើងរបស់ក្រុមយុវជន នៅក្នុងសម័យប្រជុំពេញអង្គលើកទី២ របស់សភាយុវជនត្រាប់ ដែលបានធ្វើកាលពីថ្ងៃទី២៦ ខែធ្នូនេះ រៀបចំដោយ ERA នៅសណ្ឋាគារអ៊ីភើរៀល។
កញ្ញា កុប ច័ន្ទណាំ មកពីសកលវិទ្យាល័យភូមិន្ទភ្នំពេញ ជានិស្សិតឆ្នាំទី៤ផ្នែកទស្សនៈវិទ្យា ដែលត្រូវបានជ្រើសតាំងជាតំណាងសភាយុវជនត្រាប់ បានថ្លែងទៅកាន់ក្រុមអ្នកយកព័ត៌មានថា៖ «ខ្ញុំចង់ផ្ញើសារទៅសភាពិត។ (…) គណបក្សទាំងពីរ ដែលមានសម្លេងក្នុងសភាហ្នឹង ចង់ឲ្យគាត់ទទួលយកសំណើ ដែលសភាយុវជនត្រាប់ របស់យើងអនុម័តច្បាប់។ (…) ហើយឲ្យគាត់ទទួលយកមតិយោបល់ ពីយុវជនឲ្យបានច្រើន។»
ការថ្លែងរបស់តំណាងសភាយុវជនត្រាប់រូបនេះ បន្ទាប់ពីសម័យប្រជុំពេញអង្គ បានដាក់ចេញនូវសេចក្តីព្រាងច្បាប់មួយ ដែលក្រុមយុវជននៃសភាត្រាប់បានបង្កើតឡើង ក្រោមបណ្ដុំគំនិតយោបល់ រួមនឹងបទពិសោធន៍ និងចំណេះដឹងនានារបស់ក្រុមយុវជនទាំងនោះ ក្រោយពីពួកគេ បានចូលរួមក្នុងសម្មភាពសង្គមជាច្រើនកន្លងមក។
យុវជន«គ្រប់»ជំនាញ ត្រូវបានប្រមូលមកជួបជុំគ្នាជាបន្តបន្ទាប់ នៅក្នុងសភាយុវជនត្រាប់នេះ ដើម្បីធ្វើការផ្ទេរចំណេះដឹង និងការយល់ឃើញជាវិជ្ជមាន ទៅដល់ស្ថាប័នសភាពិត ក្នុងការអនុម័តច្បាប់។ យុវជន យ៉ង ចាន់ដារ៉ា និស្សិតឆ្នាំទីបួន ផ្នែកគ្រប់គ្រងប្រព័ន្ធផ្សព្វផ្សាយ នៃសកលវិទ្យាល័យភ្នំពេញ បានបន្ថែមដែរថា នេះក៏ចាត់ទុកជាការរៀនសូត្ររបស់យុវជន ជាមួយសម្ព័ន្ធ ERA ពីសេចក្តីព្រាងច្បាប់ ដែលសម្ព័ន្ធមួយនេះ នឹងស្នើទៅរដ្ឋសភាផងដែរ។
លោក គល់ បញ្ញា នាយកប្រតិបត្តិអង្គការខុមហ្វ្រេល ដែលជាអ្នកផ្តួចផ្តើមឲ្យមានសភាត្រាប់ បានថ្លែងប្រាប់អ្នកសារព័ត៌មាន បន្ទាប់ពីសម័យប្រជុំលើកទី២នេះថា «ខ្ញុំគិតថា (វា)សំខាន់ណាស់ ដែលយើងចាប់ផ្តើមឲ្យយុវជនហ្នឹង ធ្វើជាម្ចាស់នៃការបោះឆ្នោត និងពួកគេចាប់យល់ដឹងពីច្បាប់បោះឆ្នោតផង»។
មេដឹកនាំអង្គការជំនាញខាងការបោះឆ្នោតដដែល បាននិយាយទៀតថា នៅដើមឆ្នាំ២០១៥ ក្នុងខែមករាខាងមុខនេះ រដ្ឋសភាជាតិនឹងមានធ្វើជា«សិក្ខាសាលាជាសាធារណៈ»មួយ បើកឱកាសឲ្យមានការផ្តល់មតិលើសេចក្តីព្រាងច្បាប់ គ.ជ.ប និងច្បាប់បោះឆ្នោត ពីបណ្តាសាធារណជនទូទៅផងដែរ។ ដូច្នេះ ក្រុមយុវជនទាំងនេះ អាចចូលរួមជាមួយនឹងសិក្ខាសាលានោះ ដើម្បីផ្ដល់យោបល់របស់ពួកគេ ទៅឲ្យសមាជិករដ្ឋសភាផ្ទាល់តែម្ដង៕
សូមទស្សនាវីដេអូនៃកិច្ចសម្ភាសដូចខាងក្រោម៖