សេចក្តីព្រាងច្បាប់ស្តីពីចរាចរណ៍ផ្លូវគោក តូ្រវបានរដ្ឋសភាអនុម័ត
- ដោយ: ក. វិច្ចនី អត្ថបទ៖ ក.វិច្ចនី ([email protected]) - រាយការណ៍៖ ស្រ៊ុន ទិត្យ - ភ្នំពេញ ថ្ងៃទី០៥ ធ្នូ ២០១៤
- កែប្រែចុងក្រោយ: December 05, 2014
- ប្រធានបទ: ចរាចរណ៍
- អត្ថបទ: មានបញ្ហា?
- មតិ-យោបល់
-
សម្លេងគាំទ្រ ១០៣ លើសម្លេង ១២៣ បានធ្វើឲ្យសេចក្តីព្រាងច្បាប់ចរាចរណ៍ផ្លូវគោក ទទួលបានការអនុម័ត ជាស្ថាពរនៅព្រឹកទី ០៥ ខែធ្នូនេះ។ បន្ទាប់ពីអនុម័តរួច ច្បាប់នេះ នឹងត្រូវបញ្ជូនទៅព្រឹទ្ធសភា ដើម្បីធ្វើការពិនិត្យ មុននឹងដាក់ថ្វាយព្រះមហាក្សត្រ សុំឡាយព្រះហស្ថលេខាសម្រេច ដើម្បីប្រកាសឲ្យប្រើប្រាស់ជាផ្លូវការនាពេលខាងមុខ។
ច្បាប់ចរាចរណ៍ផ្លូវគោកថ្មីនេះ នឹងត្រូវមកជំនួសច្បាប់ចរាចរណ៍ផ្លូវគោកចាស់ ដែលបានអនុម័តកាលពីឆ្នាំ ២០០៧ ហើយនឹងត្រូវចាត់ទុកជានិរាករណ៍ បន្ទាប់ពីព្រះមហាក្សត្រ ឡាយព្រះហស្ថលេខាពី លើច្បាប់ថ្មីរួច។
សេចក្តីព្រាងច្បាប់ ស្តីពី ចរាចរណ៍ផ្លូវគោក មានចំនួន ១២ជំពូក និងមាន ៩២ មាត្រា រួមមាន៖ ជំពូកទី១៖ ចែងអំពី បទបញ្ញត្តិទូទៅ មានចំនួន ៤មាត្រា(មាត្រា១ដល់ មាត្រា៤), ជំពូកទី២. សញ្ញាចរាចរណ៍ មាន២មាត្រា (មាត្រា៥និងមាត្រា៦) ចែងអំពីសញ្ញាចរាចរណ៍ ផ្លូវគោក និងលំដាប់សិទ្ធិ អាទិ៍ភាពសញ្ញាចរាចរណ៍។ ជំពូកទី៣៖ មាន២០មាត្រា (មាត្រា៧ដល់មាត្រា២៦) ចែងអំពីការប្រកាន់ស្តាំ។ ជំពូកទី៤៖ ការប្រើភ្លើង និងសូរស័ព្ទ យានជំនិះ មាន៤មាត្រា(មាត្រា២៧ដល់មាត្រា៣០) ចែងអំពីការប្រើប្រាស់ភ្លើង សញ្ញា និងសូរស័ព្ទយានជំនិះ។ ជំពូកទី៥៖ ថ្មើរជើងនិងអ្នកជិះ ឬអ្នកដឹកសត្វ មាន៣មាត្រា (មាត្រា៣១ដល់មាត្រា៣៣)។ ជំពូកទី៦ ករណី គ្រោះថ្នាក់ចរាចរណ៍ មាន៥មាត្រា (មាត្រា ៣៤ដល់មាត្រា ៣៨) ចែងអំពីសមត្ថកិច្ច របស់នគរបាលចរាចរណ៍ ផ្លូវគោក, អ្នកពាក់ព័ន្ធគ្រោះថ្នាក់ចរាចរណ៍។ ជំពូកទី៧៖ ការគ្រប់គ្រងយាន និងការដឹកជញ្ជូន មាន២០មាត្រា (មាត្រា៣៩ ដល់ មាត្រា៥៨) ចែងអំពីបណ្ណបើកបរជាតិ បណ្ណបើកបរអន្តរជាតិ ....។ ជំពូកទី៨៖ យន្តការអនុវត្តច្បាប់ស្តីពីចរាចរណ៍ ផ្លូវគោក មាន១មាត្រា(មាត្រា៥៩) ចែងអំពីគណៈកម្មាធិការជាតិសុវត្ថិភាពចរាចរណ៍ផ្លូវគោក។ ជំពូកទី៩៖ សមត្ថកិច្ច និងសិទ្ធិអំណាចរបស់មន្ត្រីអនុវត្តច្បាប់ ស្តីពីចរាចរណ៍ ផ្លូវគោកមាន ១១មាត្រា (មាត្រា៦០ដល់ មាត្រា៧០)។ ជំពូកទី១០៖ ទោសបញ្ញត្តិមាន ១៧ មាត្រា (មាត្រា៧១ដល់មាត្រា៨៧) ចែងអំពីទោសទណ្ឌកម្ម ដែលល្មើស នឹងច្បាប់នេះ ....។ ជំពូកទី១១៖ អន្តរបញ្ញត្តិ មាន៤មាត្រា (មាត្រា ៨៨ដល់មាត្រា៩១)....។ ជំពូកទី១២៖ អវសាន្តបញ្ញត្តិ មាន១មាត្រា (មាត្រា៩២) ចែងអំពី និរាករណ៍រាល់បទបញ្ញត្តិ។
គួរកត់សម្គាល់ដែរថា ក្នុងជំពូកទី១០ មាន ១៧ មាត្រា បានចែងពីការទោសទណ្ឌកម្ម ទៅលើអ្នកប្រើប្រាស់ទ្រូងផ្លូវទាំងឡាយណា ដែលប្រព្រឹត្តិល្មើសមិនគោរពច្បាប់ និងប្រើប្រាស់ផ្លូវថ្នល់តាមទំនើងចិត្ត ដែលមានលក្ខណៈធ្ងន់ធ្ងរជាច្បាប់ចរាចរាណ៍មុន ក្នុងនោះមានការពិន័យជាសាច់ប្រាក់ និងរហូតដល់ផ្តន្ទាទោសដាក់ពន្ធនាគារនោះផងទៀត៕