តើនរណាអាចដឹងបាន ថាអព្ភូតហេតុដ៏ចម្លែក នឹងកើតឡើងនៅលើពិភពលោក ក្នុងថ្ងៃណាមួយ? មនុស្ស​ពិភព​​ដទៃ​បញ្ចេញមហិទ្ធិរិទ្ធិ ឬកម្លាំងអសុរកាយ ចង់បង្ហាញឲ្យមនុស្សនៅលើផែនដី ឲ្យដឹងពី៌ឥទ្ធិពល​ដ៏​អស្ចារ្យ​របស់ពួកគេ​។ល។ ទាំងនេះ សុទ្ធសឹងជាការលើកឡើង របស់បណ្ដាជនចិន ដើម្បីពន្យល់​ពី​ហេតុការណ៍​នៅក្នុងវីដេអូ (ខាងលើ) ដែលត្រូវបានថតជាប់ដោយកាម៉េរ៉ាសុវត្ថិភាព ក្បែរនឹងផ្លូវ​ខ្វែងជា​បួន​មួយ កណ្ដាលក្រុង វីងតៃ។

យ៉ាងហោចណាស់ រថយន្ដចំនួនបីគ្រឿង បានហោះបង្ហើបខ្លួនឡើងពីដី ខណៈមិនមាននរណាម្នាក់ទៅក្បែរ និងមិនមានការប៉ះពារគ្នាសូម្បីបន្តិច។ នេះជាអ្វី ដែលគេមើលឃើញ ពីក្នុងវីដេអូមួយនេះ។ រថយន្ដចំនួនពីរ (នៅ​ខាងស្ដាំ) គ្រាន់តែបានហើបជើងពីដី ហើយបានទម្លាក់ខ្លួនមកវិញ ដូចធម្មតា ខណៈរថយន្ដ​ទេសចរណ៍ (នៅ​ខាងឆ្វេង) បានទម្លាក់ខ្លួនក្រឡាប់ភីង ទៅលើថ្នល់ និងថែមទាំងរបូតកង់ ចេញពីតួទៀតផង ខណៈ​មនុស្ស​ម្នា​ដែលនៅក្នុងហេតុការណ៍ នាំគ្នារត់គេចចេញឲ្យឆ្ងាយ។

វីដេអូគ្រាន់តែដាក់បង្ហោះ កាលពីសប្ដាហ៍មុន នៅក្នុងបណ្ដាញសង្គម នៃប្រទេសចិន បានបង្កឲ្យមាន​ការ​ទស្សនា និងការចែករំលែក យ៉ាងសន្ធឹកសន្ធាប់ ហើយមនុស្សជាច្រើន ក៏បានឆ្ងល់ដែរថា ហេតុភេទពិត​ប្រាកដ នៃរឿងរ៉ាវនេះ ជាអ្វីទៅ។

សារព័ត៌មានក្នុងតំបន់ (មានវីដេអូនៅខាងក្រោម សន្ទនាជាភាសាចិន) បានបញ្ជាក់ពីហេតុការណ៍នេះ និង​ត្រូវបានសារព័ត៌មាន នៅបស្ចឹមលោក យកមកផ្សាយបន្តដែរថា មូលហេតុបណ្ដាលពីខ្សែភ្លើងមួយខ្សែ ដែល​ដាក់ចោលនៅលើថ្នល់។ ខ្សែភ្លើងនេះ ត្រូវបានរបោសវិល របស់រថយន្ដបោសថ្នល់មួួយគ្រឿង (នៅខាងស្ដាំ​បំផុត) គួចព័ន្ធយកទៅ ដែលធ្វើឲ្យខ្សែភ្លើង បានបន្តឹង និងសន្ធឹងខ្លួនឡើងភ្លាមៗ ទាក់យករថយន្ដទាំង​បី​គ្រឿង ដែលបើកមកចំពេលជាមួយគ្នា ឲ្យហើបខ្លួនឡើង។

នៅក្នុងវីដេអូ ដែលថតដោយកាម៉េរ៉ាសុវត្ថិភាព គេមិនអាចមើល​ខ្សែភ្លើងនោះឃើញឡើយ ដោយសារថត​ពីចំងាយ និងគុណភាពនៃវីដេអូនោះ មិនមានសភាពច្បាស់ល្អ។ តែវីដេអូយកការណ៍ របស់សារព័ត៌មានចិន​ខាងក្រោមនេះ នឹងពន្យល់ថាតើហេតុការណ៍ កើតឡើងយ៉ាងដូចម្ដេច៕