«Ice bucket Challenge» ឬល្បែងចាក់ទឹកកកដាក់គ្នា ជាល្បែងដ៏ពេញនិយមក្នុងពេលថ្មីៗនេះ ដែល​ប្រជា​ពលរដ្ឋ​ខ្មែរលេងវា ដើម្បីបរិចាគដល់មន្ទីពេទ្យគន្ធបុប្ផា។ ដោយឡែកកញ្ញា មាស សុខសោភា ដែលជា​តារា​ចម្រៀងដ៏ល្បី របស់ផលិតកម្មថោន បែរបដិសេធមិនចូលលេងល្បែងសម្បុរសនេះទៅវិញ។

មូលហេតុចំពោះការមិនចូលលេងល្បែងដែលកំពុងមានប្រជាប្រិយភាពនេះ ត្រូវបានកញ្ញា មាសសុខសោភា បានសរសេរបញ្ជាក់នៅលើទំព័រហ្វេសប៊ុករបស់នាងថា ដោយសារតែនាងមិនចង់ខ្ជះខ្ជាយទឹក ខណៈពេល​ដែលកូនឈើ១០០០០ដើមរបស់នាងនៅកំពុងស្ពឺ កំពុងត្រូវការទឹកសង្គ្រោះជាបន្ទាន់។ បើទោះបីជានាង​មិន​ចូលរួមលេងល្បែងដ៏កំពុងពេញនិយមនេះក៏ដោយ ប៉ុន្តែនាងនៅតែបរិចាគថវិកា​ដល់មន្ទីរពេទ្យគន្ធបុប្ផា​ដដែល។

តារាចម្រៀងប្រជាប្រិយភាពរូបនេះ បានសរសេរបន្តថា៖ «សូមអរគុណដល់អ្នកគ្រប់គ្នាបានចូលរួមធ្វើ “Ice bucket Challenge” ព្រមទាំងបានស្នើឱ្យនាងខ្ញុំអនុវត្តបន្ត នាងខ្ញុំសូមថ្លែងអំណរគុណយ៉ាងជ្រាលជ្រៅ បង​ប្អូនដែលបានចូលរួមក្នុងសកម្មភាពដ៏មានអត្ថន័យនេះ។ ដោយឡែកក្នុងពេលជាមួយគ្នានេះ នាងខ្ញុំបាន​ទទួល​ដំណឹងពីព្រះតេជព្រះគុណ ដែលទទួលមើលថែកូនឈើ ទាំង ១០,០០០ដើមរបស់ មាស សុខសោភា ថា អណ្តូងមានសភាពរីងស្ងួតដោយកត្តាអាកាសធាតុ។ អាស្រ័យហេតុនេះហើយ នាងខ្ញុំនឹងមាន​អារម្មណ៍​ខុសឆ្គង​ក្នុងខ្ជះខ្ជាយទឹក ដូច្នេះ នាងខ្ញុំសង្ឃឹមថា អ្នករាល់គ្នានឹងមានការអធ្យាស្រ័យ។ នាងខ្ញុំនឹងបរិចា្ចគទៅ​ជូន​ដល់មន្ទីពេទ្យគន្ធបុប្ផាតែម្តង។»៕