ចម្រៀងត្រៀមអបអរចូលឆ្នាំថ្មី របស់ផលិតកម្មថោន អាសអាភាស?
«និពន្ធយូរៗទៅ កាន់តែទ្បប់ហើយ» នេះជាការលើកឡើងរបស់ប្រិយមិត្តមួយចំនួន ដែលភាគច្រើនជាអ្នកប្រើប្រាស់បណ្តាញសង្គមហ្វេសប៊ុក រិះគន់ទៅលើផលិតកម្មថោន បន្ទាប់ពីផលិតកម្មនេះ បានផលិតបទថ្មីៗមួយចំនួន ត្រៀមចេញលក់នៅពេលចូលឆ្នាំប្រពៃណីជាតិខាងមុខនេះ។
តារាចម្រៀងរបស់ផលិតកម្មថោន ដែលដាក់នៅលើគម្របថាសចម្រៀង។ (រូបថតក្រុមហ៊ុន)
ចម្រៀង - ផលិតកម្មទីក្រុងភាពយន្ត(Town Production) ដែលជាផលិតកម្មល្បីមួយក្នុងប្រទេសកម្ពុជា បានធ្វើថាសចម្រៀងអបអរសារទរចូលឆ្នាំប្រពៃណីជាតិចំនួន ៤ អាល់ប៊ុម គិតជាបទចម្រៀងមានជាង ៤០បទ។ បទចម្រៀងថ្មីៗដែលផលិតកម្មមួយនេះ ផលិតសំរាប់អបអរពិធីបុណ្យចូលឆ្នាំប្រពៃណីជាតិខ្មែរ និងដែលគ្រោងចេញលក់នៅពេលខាងមុខនេះ មានបទចម្រៀងមួយចំនួន ត្រូវរងនូវការរិះគន់យ៉ាងចាស់ដៃ ថាមានន័យអាសអាភាស ពីអ្នកតាមដានស្រឡាញ់ពិភពសិល្បៈ ជាពិសេសនោះគឺប្រិយមិត្តនៅលើបណ្តាញសង្គមហ្វេសប៊ុកតែម្ដង ។
បទចម្រៀងដែលរងការវាយប្រហារថា ជាបទអាសអាភាសនិងចំអេះចំអាសជាងគេនោះ មានដូចជាបទ «ដួលគងចំប៉ាន់» របស់កញ្ញា សុគន្ធ នីសា និងតារាកំប្លែងនាងខ្ញុង បទ«បបរក្តៅ»របស់លោក សុគន្ធ ថេរ៉ាយុ និងកញ្ញាអែននី ស្សាម និងបទមួយចំនួនទៀត។
ម្ចាស់ទំព័រហ្វេសប៊ុកមួយឈ្មោះ Pisey KH ទំនងជាអ្នកចូលចិត្តអភិរក្សវប្បធម៌ខ្មែរ ដែលបានស្តាប់បទចម្រៀងរបស់ផលិតកម្មខាងលើ បានបញ្ចេញការយល់ឃើញថា «គួរតែមានបទណា ដែលធ្វើអោយយុវវ័យស្គាល់ពីសីលធម៌ខ្មែរ ខ្ញុំគិតថា វាមិនពិរោះអីត្រង់ចំអេះចំអាសទេ»។
Theavy Kaem ជាអ្នកគាំទ្រផលិតកម្មថោនមួយរូប ប៉ុន្តែអ្នកគាំទ្ររូបក៏រិះគន់ដែរ ទៅលើចំណងជើងបទចម្រៀងមួយចំនួនថា «ឆ្នាំនេះមានបទចំរៀងពីរោះច្រើនដែល Town និពន្ធខ្លួនឯង ខ្ញុំសុំសរសើរនិងគាំទ្រ តែហេតុអីចំណងជើងបទចំរៀងខ្លះ មានន័យហួសហេតុ ទៅលើរឿងអាសអាភាសម្លេះ? ដូចជាបទដួលគងចំប៉ាន់ ខ្ញុំគិតថាបទចំរៀងពីរោះ តែចំណងជើងវិញពិបាកស្តាប់ ហើយនឹងបទមួយចំនួនផ្សេងទៀត។ នៅពេលបទចំរៀងចេញ មានអ្នកស្តាប់ទូទាំងប្រទេស និងមានក្មេងៗច្រើនច្រៀងតាម ខ្ញុំគិតថាគួរតែរកចំណងជើងដាក់អោយសមរម្យជាងនេះ។»
អ្នកនិពន្ធវ័យក្មេងប្រចាំផលិតកម្មថោន លោក យឹម តាស្រង់ បានសរសេរលើទំព័រហ្វេសប៊ុកមួយ របស់ផលិតកម្មនេះ ដែលមានគណនីឈ្មោះ Official Town Production ជាការឆ្លើយតបទៅកាន់អ្នកដែលរិះគន់ និងអ្នកគាំទ្ររបស់ខ្លួនកន្លងមកថា «សូមអ្នករិះគន់មេត្តាពិចារណាផង ខំនិពន្ធMelodyថ្មី មិនចំលងដើម្បីកុំអោយប្រទេសជិតខាងមាក់ងាយ បែរជាត្រូវជួបការរិះគន់ បំបាក់ទឹកចិត្តខ្ញុំទៅវិញ ខ្ញុំពិតជាហួសចិត្តហើយ ខ្ញុំមិនដែលខ្លាចការរិះគន់ទេ ប៉ុន្តែការរិះគន់ខ្លះហាក់ដូចជាហួសហេតុពេក»។
បើទោះបីជាអ្នកនិពន្ធខាងលើ រងការរិះគន់ថា និពន្ធបទមិនទំនងសំរាប់អបអរបុណ្យចូលឆ្នាំប្រពៃណីជាតិ តែមានប្រិយមិត្តមួយចំនួនដែលនៅតែគាំទ្រ និងលើកទឹកចិត្តសំរាប់ស្នាដៃ ដែលនិពន្ធដោយខ្លួនឯងមិនចម្លងគេ។ Dada Yuki ដែលគាំទ្រកាលើកឡើងរបស់អ្នកនិពន្ធខាងលើ បានយល់ស្របថា «គេនិពន្ធចំរៀងចឹង ថាគេឈ្លើយ ដល់គេយកចំរៀងបរទេសមកច្រៀង ថាខ្មែរយកតែចំរៀងគេមកច្រៀង គេនិពន្ធអោយស្ដាប់ហើយ ជួយលើកស្ទួយចំរៀងខ្មែរផងទៅអ្នកទាំងអស់គ្នា»។
ចំណែក Srey Noch បន្ទរដែរថា «ខ្ញុំគាំទ្របង កាត់ន័យតែខ្លួនឯង ហើយមករិះគន់គេទៀត បើខ្លាំងកុំស្តាប់ទៅវាចប់ហើយ មានអ្នកចង់ស្តាប់ច្រើនណាស់»។ Poipet Bmc «តាស្រង់ កុំខ្វល់ពីការរិះគន់គេអី ព្រោះនេះមកពីគេកាត់ន័យផ្ដេសផ្ដាសខ្លួនគេទេ»។
យ៉ាងណាក៏ដោយ ក៏មជ្ឈដ្ឋានអ្នកស្រឡាញ់វប្បធម៌ ប្រពៃណីជាតិ និងបញ្ញាជនជាច្រើន នៅតែបានធ្វើការរំលឹកជាញយដង ទៅដល់អ្នកនិពន្ធ ទោះជាទៅលើស្នាដៃអ្វីក៏ដោយ ត្រូវដាក់«ព្រលឹង»នៅក្នុងខ្លួនទៅក្នុងស្នាដៃរបស់ខ្លួន ទើបនឹងស្នាដៃនោះអាចមានការគាំទ្រ និងមានជីវិតមិនស្លាប់ទៅវិញភ្លាមៗ។ «អ្នកនិពន្ធ អ្នកចម្រៀង និងតន្រីករ អាចស្លាប់ តែព្រលឹងនៃស្នាដៃមិនស្លាប់ទេ»៕
-----------------------------------------------
ដោយ ក. ចាន់នីតា (ទំនាក់ទំនង៖ [email protected] ) - ភ្នំពេញ ថ្ងៃទី ១៤ មិនា ២០១៤