នៅមកទល់នឹងថ្ងៃព្រហស្បតិ៍ទី១៩ ខែមិថុនាម្សិលម៉ិញនេះ ចំនួនកម្មករខ្មែរ ដែលថៃបានធ្វើនិរទេសមកកម្ពុជាវិញ មានចំនួនសរុបប្រមាណ ជាង២២ម៉ឺននាក់។ ពីចំណោមប្រជាពលករខ្មែរទាំងនោះ បានរៀបរាប់ថា ពួកគេខ្លះ​នៅបន្ត​ធ្វើការក្នុងប្រទេសថៃ ខ្លះត្រូវបានថៃចាប់បង្ខំឲ្យចាកចេញ និងខ្លះទៀតបានរត់ភៀសចូលព្រៃ។

ក្រុមពលករ-កម្មករខ្មែរ ដែលត្រូវបានអាជ្ញាធរបញ្ជូនត្រឡប់មកវិញ។ (រូបថត MONOROOM.info/ S. Tith)

ពលករកម្ពុជា - ក្នុងកិច្ចសម្ភាសជាមួយសារព័ត៌មានចិន ស៊ីនហ៊ួ លោក ពេជ្រ វណ្ណា ប្រធានការិយាល័យកិច្ចការ​ទំនាក់ទំនងព្រំដែនកម្ពុជាថៃ បានលើកឡើងថាមកទល់នឹងថ្ងៃ១៩ ខែមិថុនាម្សិលម៉ិញនេះ មានកម្មករចំណាក​ស្រុក​កម្ពុជា ប្រហែល២២៥.០០០នាក់ ភាគច្រើនខុសច្បាប់ បានធ្វើមាតុភូមិនិវត្តន៍មកពីប្រទេសថៃ។ លោកបាននិយាយ​ថា៖ «កម្មករប្រមាណជា ៥០០០នាក់ ត្រូវបានគេបញ្ជូនពីប្រទេសថៃ ត្រឡប់មកប្រទេសកម្ពុជាថ្ងៃនេះ (ថ្ងៃព្រហស្បតិ៍)។»

គេបានធ្វើការប៉ាន់ប្រមាណថា ពលករកម្ពុជា ជាងសែសិបម៉ឺននាក់ ត្រូវបានធ្វើការនៅក្នុងប្រទេសថៃ មុនពេលដែល​ប្រទេសមួយនេះ បានធ្វើការជម្លៀសចេញមកកម្ពុជាវិញ។ ពលករខ្មែរបានចាកចេញពីថៃមកកម្ពុជាវិញ ជាបន្តបន្ទាប់​ពីថ្នាក់ដឹកនាំប្រទេសមួយនេះបានប្រកាស និងព្រមានថា កម្មករបរទេសដែលខុសច្បាប់ទាំងអស់ អាចប្រឈមមុខ​នឹងការចាប់ខ្លួន។

រដ្ឋមន្ត្រីក្រសួងមហាផ្ទៃ លោក ស ខេង កាលពីថ្ងៃទី១៧ ខែមិថុនា បានលើកឡើងថា រដ្ឋាភិបាលកម្ពុជាមានការខកចិត្ត ចំពោះរបបយោធាថៃ ដែលបានបញ្ជូនពលករខ្មែរ មកស្រុកកំណើតវិញយ៉ាងតក់ក្រហល់ ដោយមិនបានជូនដំណឹង និងសហការជាមួយរដ្ឋាភិបាលកម្ពុជា ហើយករណីនេះ ភាគីថៃ ត្រូវតែទទួលខុសត្រូវ។

ឯកអគ្គរាជទូតកម្ពុជា ប្រចាំប្រទេសថៃក្នុងថ្ងៃទី១៧ ខែមិថុនានេះដែរ ក៏បានជួបជាមួយរដ្ឋមន្ត្រីស្តីទីក្រសួង​ការបរទេស​ថៃ ធ្វើការពិភាក្សាលើមូលហេតុភាគីថៃ សម្រេចបញ្ជូនពលករខ្មែររាប់ម៉ឺននាក់ ត្រឡប់មកកម្ពុជាវិញ។ ករណីនេះ ត្រូវ​បានភាគីថៃបញ្ជាក់មកវិញថា ថៃមិនមានគោលការណ៍ ឬផែនការណ៍ណាមួយ បណ្ដេញពលករខ្មែរនោះទេ។ តែភាគី​ថៃក៏បានបញ្ជាក់បន្ថែមថា ថៃចង់ឲ្យពលករខ្មែរ«ខុស»ច្បាប់ទាំងអស់ក្លាយជាពលករ«ស្រប»ច្បាប់វិញ ជៀសវាងការ​កេងប្រវ័ញ្ច ការជួញដូរកម្លាំងពលកម្ម។ ហើយភាគីថៃក៏បានស្នើសុំឲ្យពលករខ្មែរ ដែលថៃចាប់បញ្ជូនមក​កម្ពុជាវិញ​នោះ បើចង់ត្រឡប់ទៅធ្វើការនៅថៃវិញ ត្រូវរៀបចំឯកសារស្របច្បាប់ជាមុន។

កាលពីថ្ងៃទី១៩ ខែមិថុនាកន្លងទៅនេះ គណបក្សសង្គ្រោះជាតិ ដែលជាគណបក្សប្រឆាំងធំមួយនៅកម្ពុជា ក៏បានធ្វើ​ការ​ថ្គោលទោស ទៅលើរបបគ្រប់គ្រងដោយយោធានៃប្រទេសថៃ ក្នុងការបញ្ជូនពលករកម្ពុជា តាមរថយន្​តប៉ូលីស​ដោយចាក់សោរ តាមរថយន្តទ្រុងខ្ពស់ៗ ដោយដឹកយកមកចាក់ចោល នៅច្រកព្រំដែនកម្ពុជា-ថៃដូវសត្វធាតុ។ គណបក្សប្រឆាំងរបស់ប្រទេសកម្ពុជា បានបញ្ជាក់ទៀតថា៖ «អំពើអមនុស្សធម៌នេះ ត្រូវបានរំលោភបំពានលើសិទ្ធិ​មនុស្ស»។

ដោយឡែកប្រធានក្រុមការងារ របស់គណបក្សប្រជាជនកម្ពុជា ខេត្តបន្ទាយមានជ័យលោក កែ គឹមយ៉ាន និងអតីត​អគ្គមេបញ្ជាការកងយោពលខេមរភូមិន្ទ ក៏ធ្លាប់លើកឡើងថា រដ្ឋាភិបាលកម្ពុជាបានចំណាយថវិកា ប្រមាណប្រាំលាន​ដុល្លារអាមេរិករួចទៅហើយ ក្នុងការដឹកជញ្ជូន ម្ហូបអាហារ និងការថែទាំវេជ្ជសាស្រ្ត សម្រាប់ការត្រឡប់មកវិញ​នូវ​កម្មករទាំងនោះ។ លោកក៏បានបញ្ជាក់ផងដែរថា កម្មករដែលត្រូវបានរដ្ឋាភិបាលយោធាថៃ ដឹកមកទំលាក់​ចោល​នៅព្រំដែកកម្ពុជាថៃ ច្រកអន្តរជាតិប៉ោយប៉ែតនេះ ត្រូវបានរថយន្តយោធា និងរថយន្តក្រុងមួយចំនួន ដឹកបញ្ជូនពួក​គាត់ត្រឡប់ទោផ្ទះវិញដោយមិនគិតថ្លៃ។

សម្រាប់អង្គការសង្គមស៊ីវិលជាតិ និងអន្តរជាតិ រិះគន់ពីបញ្ហានៃការចាប់បញ្ជូនពលករខ្មែរយ៉ាងគំហុក មកកម្ពុជាវិញ​នេះថា រដ្ឋាភិបាលយោធាថៃ មិនបានគោរពសិទ្ធិមនុស្សទេ ក្នុងការចាប់បញ្ជូនពលករខ្មែរ ដោយគ្មានក្រមសីលធម៌ ដោយការសម្លុត ការគំរាម ការកំហែង ក្នុងបំណងបំបាក់ស្មារតីនោះ។

សូមរំលឹកថាចាប់ពីថ្ងៃទី០៦ មកដល់ថ្ងៃទី១៩ ខែមិថុនានេះ ពលករខ្មែរដែលរដ្ឋាភិបាលយោធាថៃ ដឹកមកទម្លាក់ចោល​នៅច្រកទ្វារអន្តរជាតិប៉ោយប៉ែតនោះ មានចំនួនជាងម្ភៃពីរម៉ឺននាក់។ ចំនួននេះ នឹងអាចកើនឡើងជាបន្តបន្ទាប់ សម្រាប់​ថ្ងៃខាងមុខ។ ដោយឡែកសម្រាប់ថ្ងៃព្រហស្បតិ៍ម្សិលម៉ិញនេះ ប្រជាពលករខ្មែរដែលថៃជម្លៀស​មកកាន់​កម្ពុជា មានចំនួនសរុប៤០៧២នាក់ ក្នុងនោះមានស្ត្រីចំនួន១៣៨៥នាក់ និងកុមារចំនួន២២៩នាក់៕