ដើម្បីទប់ស្កាត់ការធ្វើចំណាកស្រុក ស្វែងរកការងារធ្វើដោយខុសច្បាប់ នៅក្នុងប្រទេសថៃ កម្ពុជា-ថៃ បាន​ព្រម​ព្រៀង​គ្នាបង្កើតច្រកចេញចូលតែមួយ។ ក្រសួងការងារ ក៏នឹងរៀបចំចេញប័ណ្ណការងារ សម្រាប់ពលករ ដែលទៅធ្វើការ​នៅ​ប្រទេសថៃផងដែរ។

លោក អ៊ិត សំហេង (រូបកណ្ដាល)។ (រូបថត MONOROOM.info/ S.tih)

សេវ៉ាសាធារណៈ - ខណៈពេល ដែលកម្ពុជា-ថៃបានព្រមព្រៀងគ្នា បង្កើតច្រកចេញចូលតែមួយរវាងកម្ពុជា-ថៃ នៅ​ក្នុងខែកក្កដាខាងមុខនេះ លោក អ៊ិត សំហេង រដ្ឋមន្រ្តីក្រសួងការងារ និងបណ្តបណ្តាលវិជ្ជាជីវៈ បានថ្លែងឱ្យដឹង​នៅថ្ងៃ​ទី២០ ខែមិថុនានេះថា ក្រសួងការងារនឹងចេញប័ណ្ណការងារ សម្រាប់ពលករ ដែលមានបំណងទៅធ្វើការ​នៅប្រទេស​ថៃ។ ហើយតាមរយៈប័ណ្ណការងារនេះ ភាគីថៃនឹងផ្តល់ប័ណ្ណការងារ សម្រាប់ធ្វើការក្នុងប្រទេសថៃ និងប័ណ្ណស្នាក់នៅ រួមទាំងបញ្ជូនពលករទៅតាមក្រុមហ៊ុន ដែលស្របច្បាប់ ដើម្បីធានាសុវត្តិភាពការងារ និងភាពស្របច្បាប់របស់ពលករ​ខ្មែរ។

លោកបញ្ជាក់ទៀតថា៖ «ហើយការចំណាយដែលកង្វល់នោះ គឺមុននឹងចូលទៅដល់ ច្រកចេញចូលតែមួយនេះ គឺ​ពលករចាំបាច់ត្រូវមានលិខិតឆ្លងដែន។»

កន្លងមក ខាងមន្រ្តីសង្គមស៊ីវិលធ្លាប់បានលើកជាក្តីបារម្ភថា ពលករអាចនឹងចំណាយច្រើនសម្រាប់ថ្លៃសេវានានា ដែលជាផលលំបាកដ៏សន្ធឹកសន្ធាប់ ដល់ពលករ។ ប៉ុន្តែបញ្ហានេះ ត្រូវលោករដ្ឋមន្រ្តី អ៊ិត សំហេង បានបកស្រាយថា៖ «បញ្ហាលើលិខិតស្នាម ខ្ញុំគិតថា វាមិនមានអីបង្កើន ឱ្យមានបញ្ហាជាធំដុំអីនោះទេ។ បញ្ហាលិខិតឆ្លងដែន អាហ្នឹង​គឺវា​មានការកំណត់ច្បាស់លាស់ហើយ ឯបញ្ហាប័ណ្ណកាងារ សម្រាប់ពលករទៅក្រៅប្រទេស យើងក៏កំណត់ឱ្យច្បាស់ ជូន​ពលកររបស់យើងដោយតម្លាភាព ហើយមិនឱ្យមានតម្លៃសេវាបន្ថែម លើសពីហ្នឹងទៀងទេ។»

លោកពន្យល់បន្ថែមថា ការបង្កើតច្រកចេញចូលនេះ មានសារៈសំខាន់ណាស់ ក្នុងការគ្រប់គ្រងពលករ ដែលទៅ​ធ្វើ​ការរវាងប្រទេសទាំងពីរ ឱ្យមានលក្ខណៈស្របច្បាប់ យ៉ាងណាម៉ិញពលករទៅធ្វើការនៅទីនោះ នឹងមិនភ័យព្រួយ​ខ្លាចគេធ្វើបាប និងបណ្តេញចេញឡើយ។ ច្រកចេញចូលតែមួយ នឹងផ្តល់នូវសេវាផ្លូវការរបស់រដ្ឋាភិបាលទាំងពីរ បាន​ន័យថាភាគីថៃ ដែលបង្កើតការិយាល័យនៅក្បែរគ្នានេះ គេនឹងផ្ដល់ព័ត៌មានថា តើសហគ្រាសណាខ្លះនៅប្រទេសថៃ ដែលអាចមានសិទ្ធិប្រើប្រាស់ពលករពីកម្ពុជាទៅដោយស្របច្បាប់។

សូមព្ជាក់ផងដែរថា កិច្ចព្រមព្រៀងនេះ បានធ្វើឡើង កាលពីថ្ងៃទី២៨ ខែមេសា ឆ្នាំ២០១៤ ក្នុងជំនួបបច្ចេកទេស នៃ​អគ្គនាយកការងារ នៃក្រសួងការងារប្រទេសទាំងពីរ ។ ការបង្កើតច្រកចេញចូលតែមួយនេះ មានបំណង​ដើម្បីកាត់​បន្ថយ បញ្ហាកម្មករធ្វើចំណាកស្រុកខុសច្បាប់ ទៅកាន់ប្រទេសថៃ ហើយក៏រៀបចំឱ្យកម្មករធ្វើការនៅប្រទេសថៃ​ទាំងអស់ ទទួលបានភាពស្របច្បាប់ និងការទទួលស្គាល់ពីប្រទេសទាំងពីរ តាមរយៈការបង្កើតប្រសិទ្ធភាព ក្នុងកិច្ច​សហប្រតិបត្តិការ ឱ្យកាន់តែល្អ រវាងគ្នានិងគ្នា ក្នុងនាមជាប្រទេសជិតខាង ព្រមទាំងរៀបចំបែបបទ ឱ្យពលករធ្វើការ​ដោយ​ស្របច្បាប់នៅប្រទេសគេ។

ក្នុងនោះកម្ពុជាកំណត់យកខេត្តចំនួន៣ ខេត្តប៉ៃលិនកោះកុង និងខេត្តបន្ទាយមានជ័យ ធ្វើជាច្រក ចេញចូល នាំ​ពលករ​ខ្មែរទៅធ្វើការនៅប្រទេសថៃ ក្នុងការកាត់បន្ថយ គ្រោះថ្នាក់ដែលកើតឡើង ដោយការនាំចូលខុសច្បាប់ ពី​សំណាក់មេខ្យល់ នាពេលកន្លងមក។ ចំពោះខេត្តទាំង៣ ដែលកម្ពុជាបានកំណត់យក គឺតភ្ជាប់គ្នារវាងខេត្តមានដូចជា ខេត្តប៉ៃលិន តភ្ជាប់ជាមួយខេត្តច័ន្ទបូរី ខេត្តកោះកុង ភ្ជាប់ជាមួយខេត្ត ត្រាត និងខេត្តបន្ទាយមានជ័យ ភ្ជាប់ជាមួយ​ខេត្តស្រះកែវ ប្រទេសថៃ៕